Kownukondre preikiman e fruteri

Sma e memre ’den wan di de na frigitibuku aladi den nyan pina na wan ogri-ati fasi’

NA INI a bigin fu a yari 2001, Haykaz, wan Kotoigi fu Yehovah di abi 15 yari, go na wan eksposisi di nen, ‘Den wan di de na frigitibuku aladi den nyan pina na wan ogri-ati fasi’. Na eksposisi ben hori na ini a foto Bern, Switserland, èn a ben e sori sani di ben abi fu du nanga a frufolgu di den Nazi ben frufolgu Yehovah Kotoigi. Na a kaba fu a fisiti, Haykaz ben taki: „Mi ben yere fa a Nazi tirimakti ben handri na wan ogri-ati fasi nanga Kotoigi fu Yehovah èn fa den pina den, ma disi ben de a fosi leisi di mi si trutru dokumenti nanga fowtow fu a ten dati. Den sani di sma sori, den ondrofenitori di sma di ben de drape ben fruteri, nanga den sani di historia sabiman taki na a eksposisi naki mi ati trutru, èn noiti mi sa frigiti den sani di mi yere.”

Wan pisi ten baka dati, di Haykaz ben de na ini a lasti klas fu middelbaar skoro, dan a ben musu skrifi wan tori. A teki a bosroiti fu skrifi fu a tori: ’Yehovah Kotoigi—Sma di de na frigitibuku aladi den nyan pina na wan ogri-ati fasi ondro a Nazi tirimakti’. A leriman fu en ben agri nanga a tori fu san a ben e wani taki, ma a taigi Haykaz taki a ben e musu teki sani puru tu fu buku di grontapusma skrifi. Haykaz ben breiti taki a ben mag du dati. „Mi ben skrifi syatu fu sonwan fu den buku di mi ben leisi, èn di ben e taki fu Yehovah Kotoigi na a ten fu den Nazi. Mi ben skrifi sosrefi fu san mi ben leri na a eksposisi di ben abi a nen ‘Den wan di de na frigitibuku aladi den nyan pina na wan ogri-ati fasi’. A tori di ben abi 43 bladzijde, ben abi prenki nanga fowtow na ini tu.”

Na ini november 2002, Haykaz ben pristeri a tori fu en na den skoro kompe, den skoromeester nanga skoromisi, en famiri, nanga den mati fu en. Bakaten, sma ben kisi na okasi fu poti aksi, èn Haykaz ben piki den. Disi ben gi en na okasi fu tyari kon na krin san a e bribi. Di wan meisje na ini a publiki aksi en fu san ede a bosroiti fu skrifi a tori disi, Haykaz fruteri taki furu historia buku no e taki fu Yehovah Kotoigi, èn dati a ben wani taki sma kon sabi fa den Kotoigi ben sori deki-ati di den ben opo taki gi a Kresten bribi fu den. San ben de a bakapisi fu a takimakandra fu en?

„Den skoro kompe fu mi ben fruwondru”, Haykaz ben taki. „Den no ben sabi srefisrefi taki Yehovah Kotoigi leki wan grupu ben kisi frufolgu na wan ogri-ati fasi. Èn sosrefi furu fu den sma no ben sabi taki den Kotoigi di ben de na ini den Nazi strafuman kampu ben weri wan spesrutu marki fu meki sma sabi suma na den, namku wan persi dri-uku.”

Baka a takimakandra fu en, Haykaz kisi moro okasi fu taki nanga tra studenti fu en klas, èn fu taki fu sani di Kotoigi e bribi akruderi Bijbel; tori soleki brudutransfusie, sopi, nanga a fasi fa sma musu tyari densrefi. „Nowan fu den skoromati ben spotu mi”, Haykaz taki. Boiti dati, a tori fu en poti now na a presi pe sma kan leni buku fu a skoro. Disi sa meki taki sma no sa frigiti a fasi fa Yehovah Kotoigi ben tanapu kánkan.