Aksi fu leisiman

San a seti fu a Yubelyari di kari na ini Lefitikus kapitel 25 wani taki?

A Wet fu Moses ben sori taki „na ini a di fu seibi yari wan Sabat musu hori pe a gron sa rostu dorodoro”. Den Israelsma ben kisi wan komando di ben abi fu du nanga a yari dati, namku: „Un no musu sai nowan siri na den gron fu unu, èn un no musu koti den taki fu den droifibon na ini a droifidyari fu unu. Un no musu piki den sani di gro komoto fu den siri di fadon na gron di unu ben koti a nyanyan na den gron, èn un no musu piki den droifi fu den droifibon fu san unu no koti den taki. A musu de wan yari pe a gron musu rostu dorodoro” (Lefitikus 25:4, 5). Sobun, ibri seibi yari ben musu de wan Sabatyari gi a gron. Èn ibri feifitenti yari, a yari di ben kon baka a di fu seibi Sabatyari, ben de wan Yubelyari. San ben musu pasa na ini a yari dati?

Nanga yepi fu Moses, Yehovah ben taigi Israel: „A di fu feifitenti yari musu de santa gi unu èn un musu meki bekènti taki ala sma di e libi na ini a kondre de fri. A sa de wan Yubelyari gi unu, èn ibriwan sma musu kisi en gudu baka èn ibriwan fu unu musu drai go baka na en famiri. A di fu feifitenti yari sa de wan Yubelyari gi unu. Un no musu sai nowan siri, un no musu koti nowan fu den sani di gro komoto fu siri di ben fadon na gron, èn un no musu piki den droifi fu den droifibon fu san unu no koti den taki” (Lefitikus 25:10, 11). A Yubelyari ben kon baka wan Sabatyari, so taki a gron ben kisi tu Sabatyari baka makandra. Ma gi den sma fu a kondre, a Yubelyari ben tyari fri kon. Iniwan Dyu di ben seri leki srafu ben musu kon fri. Sma di ben kon na ini wan situwâsi pe den ben musu seri a famirigudu fu den, ben musu kisi den gudu disi baka na ini a Yubelyari. A Yubelyari ben musu de wan yari pe sani ben kon bun baka, èn pe na Israel fu owruten ben kon fri. San disi wan taki gi Kresten na ini a ten disi?

Di a fosi man, Adam, opo ensrefi teige Gado, dan a tyari a libisma famiri na ini katibo fu sondu. A sani di Gado seti fu fri a libisma famiri fu a katibo fu sondu, na a frulusu-ofrandi fu Yesus  Krestes * (Mateyus 20:28; Yohanes 3:16; 1 Yohanes 2:1, 2). O ten Kresten e kon fri fu a wet fu sondu? Di na apostel Paulus ben e taki nanga salfu Kresten, a taki: „A wet fu a yeye di e gi libi na ini wánfasi nanga Krestes Yesus, meki taki unu kon fri fu a wet fu sondu nanga dede” (Romesma 8:2). Den sma di abi a howpu fu libi na ini hemel, e kisi a fri disi te den salfu nanga a santa yeye. Aladi den abi wan skin di meki fu meti nanga brudu, èn aladi den na sondu libisma, toku Gado e fruklari taki den regtfardiki èn a e teki den leki en yeye manpikin (Romesma 3:24; 8:16, 17). Gi den salfuwan leki wan grupu a Kresten Yubelyari bigin na a Pinksterfesa fu 33 G.T.

Fa a de nanga den „tra skapu” di abi a howpu fu libi fu têgo na grontapu? (Yohanes 10:16) Gi den tra skapu, a Dusun Yari Tiri fu Krestes sa de wan ten pe ala sani sa kon bun baka, èn pe den sa de fri. Na a ten fu a Dusun Yari Tiri disi, di de wan Yubelyari, dan Yesus sa gebroiki a lusu paiman fu en fu du bun gi a libisma famiri di e bribi, èn a sa puru den bakapisi fu sondu (Openbaring 21:3, 4). Na a kaba fu a Dusun Yari Tiri fu Krestes, a libisma famiri sa kon de volmaakti, èn den sa kon fri dorodoro fu sondu nanga dede (Romesma 8:21). Te dati pasa kaba, dan a Kresten Yubelyari sa kon na wan kaba.

[Futuwortu]

[Prenki na tapu bladzijde 26]

A Dusun Yari Tiri na wan Yubelyari pe ala sani sa kon bun baka èn pe den „tra skapu” sa kon fri