Kownukondre preikiman e fruteri

A fasi fa wi e preiki gi sma na den wrokope

PE DEN apostel Mateyus, Petrus, Andreas, Yakobus, nanga Yohanes ben de di den ben kisi wan kari fu waka baka Yesus? Yesus ben kari den alamala di den ben de na den wrokope. Petrus, Andreas, Yakobus, nanga Yohanes ben abi furu fu du na ini a fisi bisnis fu den di Yesus kari den èn ben taki: „Un kon waka na mi baka.” Mateyus ben de na a belasting kantoro di a ben kisi a kari fu tron wan disipel fu Yesus.—Mateyus 4:18-21; 9:9.

A kan abi bun bakapisi te wi e preiki gi sma na den wrokope. Fu di Yehovah Kotoigi na ini Yapan sabi disi, meki taki no so langa pasa den seti sani fu meki moro muiti fu preiki na a fasi disi. San ben de den bakapisi? Baka wan tu mun, den ben abi dusundusun gobaka èn den ben bigin sowan 250 bijbelstudie. Luku den ondrofenitori di e kon now.

Wan furuten dinari na ini Tokio ben miti wan basi fu wan restaurant di ben taki nanga wan Kotoigi sowan 30 yari pasa di a ben de na skoro ete. Aladi a basi no ben frustan den sani di a ben yere na a ten dati, toku a ben wani sabi moro fu Bijbel. Now a kisi a faya baka fu kon sabi moro èn a bigin studeri Bijbel nanga yepi fu a buku Sabi di e tjari joe go na têgo libi. * Boiti dati, ensrefi meki wan schema so taki a kan leisi Bijbel ibri neti bifo a e go sribi.

Wan spesrutu pionier ben go na wan kantoro fu preiki. Aladi a basi no ben de, toku a yongu uma di e teki a telefon gi a basi fu en, ben aksi: „Yu wani fu taki nanga mi?” Baka di den taki syatu na telefon, dan na uma ben kon na doro èn a taki dati a ben wani leisi Bijbel. A spesrutu pionier ben seti sani fu go baka na en nanga wan Bijbel èn na so a ben bigin wan bijbelstudie nanga na uma. Bifo na uma e go na wroko dan den e hori bijbelstudie fruku mamanten na wan presi pe sma e koiri. A presi disi de krosibei fu a wrokope fu na uma.

Na wan tra kantoro, wan man ben si fa wan uma nanga suma a e wroko ben teki A Waktitoren nanga Ontwaakt! Ma di a Kotoigi ben gowe, dan na uma ben trowe den tijdschrift esi-esi. Di a man ben go na oso, dan a taigi en wefi di de wan Kotoigi san ben pasa èn a ben taki dati efu a ben de en, dan awansi fa a no fa a ben o arki. Na umapikin fu en, di ben yere san a ben taki, ben fruteri dati na wan Kotoigi di e wroko na ini a bisnis kontren dati. Syatu baka dati a Kotoigi ben go na a kantoro fu fisiti a man èn a bigin studeri Bijbel nanga en. Heri esi baka dati, a man bigin go doronomo na den konmakandra, di e hori tapu sonde.

A e tyari tra winimarki te wi e preiki gi sma na wrokope. Furu preikiman na ini Yapan kon sabi fa fu tyari gobaka na presi pe sma e bai sani, na fabriki, èn na kantoro. Boiti dati, fu di den e preiki na so wan fasi meki taki den ben man miti furu sma di no ben e preiki moro èn den bigin studeri nanga den sma disi. Den ben abi tumusi bun bakapisi. No so langa pasa, den preikiman fu wán gemeente na a mindrisei pisi fu a foto Tokio ben abi 108 bijbelstudie, dati na tu tron moro furu leki san den ben abi a yari di pasa.

[Futuwortu]