Aksi fu leisiman

Fa Kresten musu si diriston di sma e weri fu sori na ini sortu mun den gebore?

Na ini son kulturu, sma e weri diriston fu sori na ini sortu mun den gebore. Efu wan Kresten wani weri wan linga di abi wan spesrutu sortu diriston, dan ensrefi musu bosroiti san a sa du ini a tori disi (Galasiasma 6:5). Te a sa teki a bosroiti disi, dan a musu hori wan tu prenspari sani na prakseri.

Na Encyclopaedia Britannica e sori taki a diriston di sma e weri spesrutu fu sori na ini sortu mun den gebore, na wan „diriston di abi fu du nanga wan sma en friyaridei, èn furu sma e denki taki a e tyari koloku nanga wan gosontu libi te wan sma e weri so wan ston”. A buku disi e taki moro fara: „Langa ten kaba, astrologiaman taki dati son diriston abi aparti krakti.”

Spesrutu na ini owruten, furu sma ben e bribi taki wan sma e kisi koloku te a e weri wan diriston di e sori na ini sortu mun a gebore. Wan tru Kresten e bribi a sani disi? Nôno, fu di a sabi taki Yehovah ben krutu den wan di ben gowe libi en èn di ben poti den frutrow na ini „a gado fu Koloku”.​—Yesaya 65:11.

Na ini a pisi ten fu 500 G.T. te go miti 1500 G.T., lukuman ben teki wan diriston gi ibri mun fu a yari. Den ben gi sma deki-ati fu weri a diriston fu a mun di den gebore, kande fu meki taki ogri no miti a sma di e weri a ston. Ma akruderi den Buku fu Bijbel, a ben o de wan fowtu sani gi wan Kresten fu gi yesi na san lukuman e taki, fu di Bijbel e krutu den sma disi.​—Deuteronomium 18:9-12.

A no ben o fiti sosrefi efu Kresten e si wan linga leki wan spesrutu sani soso fu di a linga abi wan diriston di e sori na ini sortu mun a sma gebore. Yehovah Kotoigi no e hori friyaridei. Den no e du disi, fu di na den sortu fesa disi sma e poti tumusi furu prakseri na wan sma. Boiti dati, den wan-enkri friyaridei fu san Bijbel e taki ben de fu tiriman di no ben e dini Gado.​—Genesis 40:20; Mateyus 14:6-10.

Son sma e denki taki te wan sma e weri wan linga di abi wan diriston fu a mun di a gebore, dan dati abi bun krakti tapu fasi fa a sma dati de. Ma tru Kresten no e bribi na ini a sani disi, fu di den e frustan taki den e kon tron „nyun sma” fu di a santa yeye fu Gado abi krakti na den tapu èn fu di den e libi akruderi den gronprakseri fu Bijbel.​—Efeisesma 4:22-24.

Wan tumusi prenspari sani di wan sma musu hori na prakseri, na fu san ede a wani weri so wan diriston. Te wan Kresten o bosroiti efu a sa weri wan linga di abi wan diriston di e sori na ini sortu mun a gebore, dan a kan aksi ensrefi: ’Mi wani weri a linga disi soso fu di a diriston moi gi mi, aladi na a diriston fu a mun di mi gebore? Noso a de so taki mi wani weri a diriston fu di mi e bribi pikinso na ini a kruktubribi di son sma abi fu den sortu diriston disi?’

Wan Kresten musu ondrosuku en ati fu sabi nanga sortu marki a e weri a diriston. Den Buku fu Bijbel e taki: „Kibri yu ati, moro leki ala tra sani di de fu kibri, bika na drape den rutu fu a libi de” (Odo 4:23). Ibri Kresten di o teki a bosroiti efu a sa weri so wan diriston, sa kisi wini te a e meki muiti fu prakseri fu san ede a e du so wan sani èn sortu krakti disi kan abi tapu ensrefi èn tapu trawan.​—Romesma 14:13.