Fa Yu Kan De Sondro Broko-ede?

A ten fu wi e difrenti furu fu a ten fu Thoreau, di wi ben taki fu en na ini a fosi artikel. Wan prenspari difrenti na taki na ini a ten disi, wi e kisi furu rai di e sori wi fa fu meki wi ati firi korostu. Psygologiaman nanga sma di e skrifi pisi poti na ini buku noso koranti, e sori fa den e denki fu a tori disi. A rai di den e gi kan de wan yepi gi wan syatu pisi ten nomo. Ma efu wi wani feni wan lusu di de gi wan langa pisi ten, dan wi abi wan sani fanowdu di de moro tranga. Den sma di wi ben kari na ini a fosi artikel, ben si a srefi sani disi.

ANTÔNIO, Marcos, Gerson, Vania, nanga Marcelo, ben kweki na difrenti fasi èn den ben abi difrenti sortu problema. Ma den ben abi no moro mendri leki dri sani di ben de a srefi. Fosi, wan ten ben de taki den ’no ben abi howpu èn taki den ben de sondro Gado na ini grontapu’ (Efeisesma 2:12). A di fu tu sani, na taki den ben wani wan libi sondro tumusi furu broko-ede. Èn a di fu dri sani, na taki den alamala ben kisi wan korostu firi na ini den ati, baka di den ben bigin wan bijbelstudie nanga Kotoigi fu Yehovah. Ala di den ben go na fesi, den ben kon frustan taki Gado ben abi den na prakseri. Trutru, neleki fa Paulus ben fruteri den sma fu Ateine na ini den dei fu en, dan Gado „no de fara fu ibriwan fu wi” (Tori fu den Apostel 17:27).  Wan prenspari sani di de fanowdu efu wan sma wani kisi wan korostu firi na ini en ati, na taki a musu abi a trutru overtoigi taki Gado e prakseri en.

Fu San Ede So Furu Broko-ede De?

Bijbel e gi tu prenspari reide fu san ede so furu broko-ede de na grontapu. A e taki fu san ede sma no abi wan korostu firi na ini den ati èn fu san ede wánfasi no de na mindri sma. Wi e feni a fosi reide na ini Yeremia 10:23: „A no de na a sma fu grontapu fu bepaal en pasi. A no de na wan man di e waka srefi fu bepaal pe fu poti en futu na pasi”. Libisma no abi nofo koni èn den no man si na fesi san o pasa na ini a tamara. So bun, den no man tiri densrefi sondro yepi. A wan-enkri yepi di warti trutru e kon fu Gado. Libisma di no e suku a tiri fu Gado noiti sa kisi wan korostu firi na ini den ati, di e tan fu ala ten. A di fu tu reide fu san ede so furu broko-ede de, de fu feni na ini den wortu fu na apostel Yohanes: „A heri grontapu e didon na ini a makti fu a godelowsuwan” (1 Yohanes 5:19). Wi no man si Satan, „a godelowsuwan”. Ma Satan de trutru èn a abi furu makti. Efu libisma e du muiti fu kisi sani sondro a tiri fu Gado, dan ala ten Satan sa meki den kon bruya.

A libisma famiri de na ini wan sari situwâsi fu den tu reide disi ede: furu sma no e suku a tiri fu Gado èn Satan abi furu makti na ini grontapu. Na apostel Paulus ben taki fu disi na wan moi fasi: „Ala den sani di Gado meki e tan geme makandra èn den abi pen makandra” (Romesma 8:22). Suma no ben sa agri nanga a fasi disi fu si sani? Na ini gudu kondre èn na ini pôti kondre, sani soleki problema na ini osofamiri, ogridu, kruktudu, a feni di sma no man feni en nanga makandra, a broko-ede di sma abi fu wroko moni, a si di sma fu a wan lo no wani si sma fu wan tra lo na ai, kwinsi, siki, èn moro furu sani ete, e meki taki sma no man abi wan libi sondro broko-ede.

Fa fu De Sondro Broko-ede

Di Antônio, Marcos, Gerson, Vania nanga Marcelo ben studeri a Wortu fu Gado, Bijbel, den ben leri sani di kenki a libi fu den. Den leri fu eksempre, taki wan dei e kon pe a situwâsi na ini grontapu sa de heri tra fasi. A no de so taki wi e howpu nomo taki ala sani sa kon bun te fu kaba. Wi abi bun reide fu bribi taki Gado abi wan sani na prakseri gi libisma èn taki a sa pasa trutru. Wi kan bribi tu taki srefi now kaba wi kan nyan bun fu a prakseri dati, efu wi e du Gado wani. Den sma di wi ben kari na fesi ben libi akruderi den sani di den ben leri fu Bijbel, èn sani ben go moro bun nanga den. Den no ben denki taki oiti den ben o de so koloku èn taki den ben o abi so wan korostu ati.

Antônio no e meki opruru na publiki moro fu sori taki a no e agri nanga sani èn a no e feti gi wrokoman moro. A sabi taki kenki di ben sa kon na so wan fasi, ben o de gi wan syatu pisi ten nomo. A man disi di ben de fesiman fu wan vakbontu fosi, leri sani fu a Kownukondre fu Gado. Milyunmilyun sma e begi fu a Kownukondre, te den e taki den wortu fu a Begi fu Masra (noso a Wi Tata Begi), èn den e taigi Gado: „Yu kownukondre [musu] kon” (Mateus 6:10a, New International Version). Antônio ben leri taki a Kownukondre fu Gado na wan trutru tiri di de na hemel. A tiri disi trutru sa tyari wan libi sondro broko-ede kon gi a libisma famiri.

Marcos ben leri fu gebroiki a koni Bijbel rai di abi fu du nanga a trowlibi. Wan bakapisi fu dati de, taki a man disi di ben de wan politiek man fosi, e libi makandra nanga en wefi baka. Ensrefi e luku go na fesi na a ten, di de fu kon heri esi, te a Kownukondre fu Gado sa kenki a seti fu sani disi na ini grontapu fu poti wan moro bun sistema leki a gridi sistema di wi abi now, pe sma e prakseri densrefi nomo. A e frustan a lin na ini a Begi fu Masra moro bun, di e taki: „Yu wani [musu] pasa, soleki na hemel, so tu na grontapu” (Mateus 6:10b, NIV ). Te sma e du a wani fu Gado na grontapu, dan den sa abi wan fasi fu libi di den noiti ben abi bifo.

Fa a de nanga Gerson? A no e go moro fu a wan presi na a trawan èn a no de wan fufuruman moro. A libi fu a pikin disi di ben tan na tapu strati fosi abi  wan marki now, fu di a e gebroiki en krakti fu yepi trawan so taki den kan kisi wan libi sondro broko-ede. Soleki fa den ondrofenitori disi e sori, efu wan sma e studeri Bijbel èn e libi akruderi den leri fu en, dan dati sa kenki en libi krinkrin èn a sa meki taki a o abi wan moro bun libi.

Wan Libi Sondro Broko-ede na ini wan Grontapu Di Bruya

A moro prenspari sma di e yepi meki a wani fu Gado kon tru, na Yesus Krestes. Te sma e studeri Bijbel nanga Kotoigi fu Yehovah, dan den e leri furu fu Yesus. A neti di a gebore, den engel ben singi glori singi gi Gado: „Glori na ini den moro hei presi na Gado, èn na grontapu vrede na mindri sma fu bun wani” (Lukas 2:14). Di Yesus ben gro kon bigi, dan a ben broko en ede fu meki a libi fu sma kon moro bun. A ben frustan san den ben firi èn a ben sori furu sari-ati gi den wan di ben de na nowtu èn gi den sikiwan. Èn akruderi den wortu fu den engel, dan a ben tyari pikinso kowru-ati gi den safri-ati wan. Na a kaba fu en diniwroko, a ben taigi de disipel fu en: „Vrede mi e libi gi unu, mi e gi unu a vrede fu mi. Mi no e gi unu soleki fa grontapu e gi dati. No meki un ati kon bruya èn no meki a krempi fu frede ede”.—Yohanes 14:27.

Yesus ben de moro leki wan sma di ben wroko nomo fu yepi meki a libi fu tra sma kon moro bun. A ben agersi ensrefi nanga wan skapuman èn a ben teki den safri-atiwan gersi nanga skapu, di a ben taki: „Mi kon so taki den ben kan abi libi, èn so taki den ben kan abi en pasa marki. Mi na a bun skapuman; a bun skapuman e gi en sili abra gi a bun fu den skapu” (Yohanes 10:10, 11). Iya, tra fasi leki so furu tiriman na ini a ten disi di na a fosi presi e ke gi densrefi nomo, dan Yesus ben gi en libi gi den skapu fu en.

Fa wi kan kisi wini fu san Yesus ben du? Furu sma sabi den wortu disi: „Gado ben lobi grontapu sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Yohanes 3:16). Fu poti bribi na ini Yesus wani taki dati, na a fosi presi, wi musu abi sabi fu en èn fu en Tata, Yehovah. Te wi abi sabi fu Gado nanga Yesus Krestes, dan wi kan kisi wan krosibei matifasi nanga Yehovah Gado. A matifasi disi sa yepi wi fu kisi wan korostu firi na ini wi ati.

Yesus ben taki: „Mi skapu e arki mi sten, èn mi sabi den, èn den e waka na mi baka. Èn mi e gi den têgo libi, èn noiti den sa kisi pori kwetikweti, èn no wan sma sa hari den puru fu mi anu” (Yohanes 10:27, 28). Den wortu disi trutru e waran wi ati èn e gi wi trowstu! A tru taki Yesus ben taki den wortu disi pikinmoro tu dusun yari pasa kaba. Ma den abi a srefi krakti na ini a ten disi, leki fa den ben abi na a ten dati. No frigiti noiti taki Yesus Krestes de na libi ete èn taki a e wroko. Now a e tiri leki a Kownu di Gado poti tapu a kownusturu fu en hemel Kownukondre. Neleki fa a ben du na a ten di a ben waka na grontapu furu yari pasa, na so a e du ete. A e prakseri den safri-atiwan di trutru wani abi wan libi sondro broko-ede. Moro fara, a de a Skapuman ete fu den skapu fu en. Efu wi e waka na en baka, a sa yepi wi fu kisi wan korostu firi na ini wi ati. Disi wani taki dati wi kan fruwakti èn wi kan frutrow taki wi sa kisi wan libi pe wi no sa abi broko-ede srefisrefi. So srefi ogri di sma e du nanga tranga, orloku nanga takrudu, no sa de moro.

Wi sa kisi trutru winimarki te wi kon sabi Yehovah èn te wi e bribi taki a sa yepi wi nanga yepi fu Yesus. Yu e memre Vania ete, di ben abi someni frantwortu leki wan yongu umapikin èn di ben denki taki Gado ben frigiti en? Vania sabi now taki Gado no gowe libi en. A e taki: „Mi leri taki Gado na wan trutru sma di abi moi eigifasi di e hari sma. A lobi di a abi ben meki taki a seni en Manpikin kon na grontapu fu gi wi libi. A de prenspari srefisrefi fu sabi disi.”

Marcelo e taki dati a matifasi di a abi nanga Gado, na wan trutru matifasi. A man disi di ben lobi go na furu fesa fosi, e taki: „Furutron yongu sma no sabi san fu du. Te fu kaba den e du densrefi ogri èn den e du trawan, ogri. Son wan e go gebroiki  drug, neleki fa mi ben du dati. Mi e howpu taki moro furu yongu sma sa kisi blesi, neleki fa mi ben kisi dati, fu di den e kon sabi a waarheid fu Gado èn fu en Manpikin.”

Nanga yepi fu wan finifini studie fu Bijbel, Vania nanga Marcelo ben kweki wan tranga bribi na ini Gado. Den ben kisi frutrow tu taki Gado wani yepi den fu lusu den problema. Efu wi e du san den ben du – e studeri Bijbel èn e libi akruderi dati – dan wi sa si taki wi sa abi wan trutru korostu ati, neleki fa den ben abi dati. Dan wi trutru sa man gebroiki a deki-ati di na apostel Paulus e gi: „No broko un ede nanga noti, ma meki Gado kon sabi den faya begi fu unu na ini ala sani nanga yepi fu begi nanga tranga begi makandra nanga tangi; èn a vrede fu Gado, di e pasa ala prakseri, sa kibri un ati nanga un krakti fu denki nanga yepi fu Krestes Yesus”.—Filipisma 4:6, 7.

Abi wan Trutru Korostu Ati na ini a Ten Disi

Yesus Krestes e tyari sma di e angri fu waarheid na a pasi di e go na têgo libi ini wan paradijs na grontapu. Ala di a e tyari den go na a soifri anbegi fu Gado, den e kisi a srefi korostu firi na ini den ati noso a srefi vrede di Bijbel e taki fu en: „Mi pipel musu tan na ini wan presi pe vrede de èn na tanpresi di sma e frutrow dorodoro èn na rostupresi pe sma no abi no wan broko-ede” (Yesaya 32:18). Èn den e tesi nomo fa a vrede sa de di den sa abi na ini a ten di e kon. Wi e leisi: „Den safri-ati sma srefi sa abi grontapu leki a gudu fu den, en den sa feni trutru switi prisiri na ini vrede pasa marki. Na den regtfardiki sma sa abi grontapu leki a gudu fu den, èn den sa libi na tapu fu têgo”.—Psalm 37:11, 29.

So bun, wi kan de sondro broko-ede na ini a ten disi? Iya. Boiti dati, wi kan de seiker taki na ini a ten di e kon heri esi, Gado sa blesi a libisma famiri di e gi yesi fu di a sa gi den kowru-ati leki noiti bifo. Fu san ede yu no e aksi en dan na ini begi fu a gi yu kowru-ati? Efu yu abi problema di e meki taki yu no man kisi wan korostu firi na ini yu ati, begi dan na a fasi fa Kownu David ben begi: „Den nowtu fu mi ati kon moro furu; O tyari mi komopo na den banawtu fu mi. Luku den nowtu fu mi nanga den trobi fu mi, èn gi mi pardon fu ala mi sondu” (Psalm 25:17, 18). Yu kan abi a frutrow taki Gado e arki den sortu begi disi. A e langa en anu èn a e gi kowru-ati na ala den sma di e suku dati nanga wan opregti ati. Na wan lobi-ati fasi wi e kisi a dyaranti: „Yehovah de krosibei fu ala den wan di e kari en, fu ala den wan di e kari en na ini trufasi. A sa satisferi a lostu fu den wan di e frede en, a sa yere a babari di den e meki fu kisi yepi, èn a sa frulusu den”.—Psalm 145:18, 19.

[Prenspari pisi na tapu bladzijde 5]

Libisma no abi nofo koni èn den no man si na fesi san o pasa na ini a tamara. So bun, den no man tiri densrefi sondro yepi. A wan-enkri yepi di warti trutru e kon fu Gado

[Prenspari pisi na tapu bladzijde 6]

Te wi abi sabi fu Gado nanga Yesus Krestes, dan wi kan kisi wan krosibei matifasi nanga Yehovah Gado. A matifasi disi sa yepi wi fu kisi wan korostu firi na ini wi ati.

[Prenki na tapu bladzijde 7]

Te wi e waka baka a rai di Bijbel e gi, dan wi sa abi wan osofamiri-libi sondro furu broko-ede