WI ALAMALA wani de koloku, a no so?— Ma furu sma no de koloku trutru. Yu sabi fu san ede?— Na fu di den no kon sabi san e meki sma de koloku. Den e denki taki den sa de koloku te den abi furu gudu. Ma te den abi den sani disi kaba, dan den no e tan koloku fu ala ten.

Disi na a prenspari sani di e yepi wi fu de koloku. A Bigi Leriman ben taki: „Wan sma sa de moro koloku te a e gi sani, leki te a e kisi sani” (Tori fu den Apostel 20:35). Sobun, fa wi kan de koloku?— Iya, te wi e gi trawan sani èn te wi e du sani gi den. Yu ben sabi dati?—

Meki wi denki a sani disi moro fara. Yesus ben taki dati wan sma di kisi wan kado no ben o de koloku?— Nôno, a no ben taki dati. Yu lobi fu kisi kado, a no so?— Ala sma lobi dati. Wi breiti te wi e kisi moi sani.

 Ma Yesus ben taki dati wi sa firi moro koloku te wi e gi trawan sani. Suma gi libisma moro sani leki iniwan tra sma? Suma yu denki?— Iya, Yehovah Gado.

Bijbel e taki dati Gado „e gi ala sma libi, a e meki den bro, èn a e gi den ala sani”. A e gi wi alen komoto fu hemel èn sosrefi a waran fu a son, so taki sani kan gro èn wi kan abi nyanyan (Tori fu den Apostel 14:17; 17:25). Fu dati ede a no e fruwondru wi taki Bijbel e kari Yehovah „a koloku Gado”! (1 Timoteyus 1:11). Wan fu den sani di e gi Gado prisiri, na fu gi sani na trawan. Èn te wi e gi sani, dan dati kan gi wi prisiri tu.

We, san wi kan gi tra sma? San yu denki?— Son leisi wi abi moni fanowdu fu man bai wan kado. Efu a de wan kado di yu e bai na wan wenkri, dan yu sa musu pai gi dati. Sobun, efu yu wani gi wan sma so wan kado, dan kande yu sa musu poti moni na wan sei teleki yu abi nofo moni fu bai a kado.

Ma a no ala ten wi abi fu gi wan sma wan sani di wi bai. Fu gi wan eksempre, tapu wan waran dei, ala sma lostu wan grasi nanga kowru watra. Sobun, te yu e gi wan sma pikinso watra te watra e kiri en, dan yu sa firi prisiri fu di yu gi en wan sani fu dringi.

Kande yu nanga yu mama e baka kuku wan dei. Dati ben o de wan prisiri sani. Ma san yu ben kan du nanga wan tu fu den kuku dati? San ben o gi yu moro prisiri leki te yu wawan en nyan alamala?— Iya, yu ben kan gi wan fu den mati fu yu wan tu fu den kuku dati. Yu ben sa wani du dati wan leisi?—

 A Bigi Leriman nanga den apostel fu en ben sabi taki wan sma e kon de koloku te a e gi sani. Yu sabi san den ben gi tra sma?— Dati ben de a moro bun sani na grontapu! Den ben sabi a waarheid fu Gado, èn den ben e prisiri fu prati a bun nyunsu disi nanga tra sma. Den ben e du disi sondro fu meki sma pai fu san den ben gi den.

Wan dei, na apostel Paulus nanga en bun mati, a disipel Lukas, miti wan uma di ben wani gi trawan sani so taki a ben kan de koloku tu. Den miti en na libasei. Paulus nanga Lukas ben go drape fu di den ben yere taki sma ben e begi drape. Èn na so a ben de trutru; di den doro drape, den feni wan tu uma di ben e begi.

Paulus bigin fruteri den uma disi a bun nyunsu di ben abi fu du nanga Yehovah Gado nanga en Kownukondre. Wan fu den ben nen Lidia, èn a ben e arki bun. Bakaten Lidia ben wani du wan sani fu sori taki trutru a ben lobi a bun nyunsu di a ben yere. Fu dati ede, a begi Paulus nanga Lukas: „Efu un feni taki mi na wan sma di de getrow na Yehovah, dan kon tan na mi oso.” Èn a meki den kon na en oso.​—Tori fu den Apostel 16:13-15.

Lidia ben breiti taki a ben abi den futuboi disi fu Gado na ini en oso. A ben lobi den fu di den ben yepi en fu kon sabi Yehovah nanga Yesus, èn den ben fruteri en sosrefi fa sma ben man libi fu têgo. A ben prisiri taki a ben man gi Paulus nanga Lukas nyanyan nanga wan presi fu rostu. Sobun, Lidia ben e prisiri fu gi den man den sani disi, fu di ensrefi ben wani dati. Dati na wan sani di wi musu hori na prakseri. Wan sma ben kan taigi wi taki wi musu gi wan sma wan kado. Ma efu wisrefi no wani du dati trutru, dan wi no sa de koloku te wi e gi a sma a kado.

Fu gi wan eksempre, kon meki wi taki dati yu abi sukrusani di yu wani nyan. Efu mi ben o taigi yu taki yu ben musu gi wan tra pikin wan tu fu den sukrusani dati, dan yu ben o breiti fu du so?— Ma san yu ben o du efu yu ben abi wan tu sukrusani èn yu e miti wan  mati di yu lobi trutru? Efu yusrefi e kon nanga a prakseri fu prati den nanga yu mati, dan dati ben o gi yu prisiri, a no so?—

Son leisi wi lobi wan sma so te taki wi wani gi en ala sani, èn wi no wani hori noti gi wisrefi. Te a lobi di wi abi gi Gado e kon moro tranga, dan wi musu wani gi En ala sani tu.

A Bigi Leriman ben sabi wan pôti uma di ben abi a denki dati. A ben si na uma disi na a tempel na ini Yerusalem. Na uma ben abi tu pikin sensi nomo; dati na ala san a ben abi. Ma a gi den ala tu so taki sma ben kan gebroiki den gi a tempel. Nowan sma ben dwengi en fu du dati. Furu fu den sma drape no ben sabi srefi san a ben du. A ben du dati fu di ensrefi ben wani, èn fu di a ben lobi Yehovah trutru. A ben prisiri taki a ben man gi wan sani.​—Lukas 21:1-4.

Furu fasi de fa wi kan gi sani. Yu sabi wan tu fasi fa wi kan du dati?— Te wi e gi trawan sani fu di wisrefi wani dati trutru, dan wi sa de koloku. Na fu dati ede meki a Bigi Leriman e taigi wi: „Abi a gwenti fu gi sma sani” (Lukas 6:38). Te wi e du dati, dan wi sa meki tra sma firi koloku. Èn wi sa de a moro kolokuwan fu den alamala!