FA A ben o de efu wan heri pipel nanga a tiriman fu den ben o teki Yehovah leki a Moro Heiwan èn den ben o gi yesi na den wet fu en? A piki tapu na aksi disi e kon na krin te wi e luku fa sani waka na ini den 40 yari di Kownu Salomo tiri.

Bifo David dede, a poti en manpikin Salomo leki a sma di o tron kownu baka en. Na ini wan dren, Gado taigi Salomo fu aksi en san a wani. Salomo aksi en fu gi en koni nanga sabi fu tiri a pipel na wan reti fasi èn na wan koni fasi. A sani disi ben plisi Yehovah, èn fu dati ede a gi Salomo koni nanga sabi. Yehovah ben pramisi en sosrefi gudu, glori, nanga wan langa libi efu a ben o tan gi yesi na En.

Salomo ben kon kisi biginen fu di a ben krutu sani na wan koni fasi. Wan leisi, tu uma ben kon na en, fu di den ala tu ben feni taki wan beibi ben de fu den. Salomo ben gi a komando taki sma koti a beibi na ini tu, èn taki ibri uma kisi wan pisi. A fosi uma ben feni dati bun, ma wantewante a trutru mama begi en taki a gi a beibi na a tra uma. Now Salomo ben si krin taki na uma di ben abi sari-ati ben de a trutru mama fu a beibi, èn fu dati ede a gi a boi na a uma disi. A no teki langa, fosi ala sma na ini Israel yere fu a krutu afersi disi. Den sma ben kon si taki Salomo ben abi a koni fu Gado.

Wan fu den moro bigi wroko di Salomo du, na taki a bow a tempel fu Yehovah. A tempel disi di ben de na ini Yerusalem ben moi srefisrefi, èn a ben o de a moro prenspari presi pe den Israelsma ben o anbegi Gado. Di den ben gi a tempel abra na Gado, dan Salomo ben begi: „We, hemel, iya, srefi den moro farawe pisi fu hemel no bigi nofo fu yu tan na ini. Dan fa na oso disi di mi bow, kan bigi nofo gi yu?”—1 Kownu 8:27.

Sma na ini tra kondre ben yere tu fu Salomo, srefi te na Skeiba na ini Arabia, sma ben yere fu en. Na umakownu fu Skeiba ben teki waka fu go luku a glori fu Salomo nanga den gudu fu en, èn a ben wani sabi o koni a ben de. Na umakownu ben feni en wan kefalek sani fu si fa Salomo ben koni èn fa sani ben e go bun nanga Israel. Disi ben meki a prèise Yehovah taki a poti so wan koni kownu fu tiri. Iya, Yehovah ben blesi Salomo, èn dati meki na a ten fu a tiri fu en sani ben waka bun èn vrede ben de. Na nowan tra ten sani ben waka so bun na ini Israel.

A de wan sari sani taki Salomo no tan gebroiki a koni di Yehovah ben gi en. Salomo no ben gi yesi na a komando fu Gado, fu di a trow nanga hondrohondro uma, èn furu fu den uma disi ben e anbegi gado fu tra kondre. Safrisafri den wefi disi meki taki a drai baka gi Yehovah, èn a go anbegi kruktugado. Yehovah ben taigi Salomo taki a ben o puru wan pisi fu a kownukondre fu en. Ma wan pisi nomo ben o tan na ini en famiri, fu David ede, a papa fu Salomo. Aladi Salomo no ben tan gi yesi na Yehovah, toku Yehovah ben tan hori ensrefi na a Kownukondre frubontu, di a ben meki nanga David.

—Den tori disi teki puru fu 1 Kownu kapitel 1 te go miti 11; 2 Kroniki kapitel 1 te go miti 9; Deuteronomium 17:17.