IA TAGAʻI i se nusipepa. Ia maimoa i le TV, pe faafofoga foʻi i le leitiō. O loo iai le tele o tala i solitulafono, taua ma faiga faatupu faalavelave. Ia mafaufau i mea o loo e atugalu ai. Atonu o loo e mafatia ona ua gasegase po ua maliu foʻi se tasi e pele iā te oe. E ono pei oe o Iopu, o lē na fai mai ua ʻtumu aʻu i le māsiasi ma ua lofia i tigā.’—Iopu 10:15.

Fesili ifo iā te oe lava:

• Po o le finagalo lea o le Atua mo aʻu ma isi tagata?

• O fea ou te maua ai se fesoasoani mo oʻu faafitauli?

• Pe e iai ea se taimi o le a filemu ai le lalolagi?

E maua i le Tusi Paia tali faamalieloto i fesili nei.

“E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.”—Faaaliga 21:4

ʻO le a osooso lē ua pipili e pei o le ʻaila.’—Isaia 35:6

ʻO le a faapupulaina mata o ē ua pō le vaai.’—Isaia 35:5

 ʻO le a ō mai i latou uma o loo i tuugamau.’—Ioane 5:28, 29

“E lē fai mai foʻi se tasi ua nofo ai: ʻOu te maʻi.’”—Isaia 33:24

“O le a tele saito i le laueleele.”—Salamo 72:16

O mea o loo taʻua i itulau o muamua atu, e lē na o ni mea o moomoo i ai. O folafolaga na a le Atua, ma ua taʻua i le Tusi Paia le auala o le a ia faataunuu ai.

E tele aogā o le Tusi Paia. E mafai ona e olioli i se olaga faamalieloto i le taimi nei ona o le Tusi Paia. Seʻi manatu ifo i mea o loo e fāʻatu ai ma ou faafitauli. Atonu ua lē lava lau faasoa, o faafitauli i lou aiga, ua apoia i maʻi po ua maliu sē e pele iā te oe. E mafai ona fesoasoani le Tusi Paia iā te oe e faafetaiaʻia faafitauli i aso nei, ma saunia se mapusaga e ala i le taliina o fesili nei:

• Aiseā ua tatou mafatia ai?

• E faapefea ona tatou feagai ma popolega o le olaga?

• E faapefea ona fiafia atili o tatou aiga?

• O le ā le mea e tupu pe a tatou feoti?

• Po o le a tatou toe feiloaʻi ma ē pele ua maliliu?

• E faapefea ona tatou mautinoa o le a faataunuu e le Atua ana folafolaga i le lumanaʻi?

 O lou faitauina o lenei tusi, e faaalia ai o loo e fia malamalama i aʻoaʻoga a le Tusi Paia. O le a fesoasoani lenei tusi iā te oe. Ia mātau, e iai fesili o palakalafa i le pito i lalo o le itulau. E toʻatele tagata e fiafia e tagaʻi i fesili na ma suʻe le tali, pe a talanoa ma Molimau a Ieova i le Tusi Paia. Matou te faamoemoe o le a e fiafia e fetufaaʻi faapena. Ia faamanuia le Atua iā te oe a o e suʻesuʻeina aʻoaʻoga moni a le Tusi Paia, lea e maua ai le lotomalie ma le olioli!