1, 2. (a) Na faapefea ona faamamafa mai e Iesu le tāua o le muai fuafuaina o se mea? (e) I le ā le itu patino e matuā tāua ai le muai fuafuaina o se mea?

O LE fausiaina o se fale e manaomia ai sauniuniga maeʻaeʻa. A o lei faataatiaina le faavae, e tatau ona iai se fanua ma tusia lelei ni atatusi o le fausaga o le fale. Ae peitai, e iai ma se isi mea e matuā tāua. Na fetalai Iesu: “O ai foi so outou ua fia fai se ʻolo, e le muai nofo i lalo e faitau tupe e totogi aʻi, po ua lava ana mea e faauma ai?”​—Luka 14:28.

² O mea moni e faatatau i le fausiaina o se fale e faatatau foi i le atiina aʻe o se faaipoipoga manuia. E toatele ua faapea mai: “Ua ou fia faaipoipo.” Ae  toafia ua muamua ona iloiloina mea e aofia ai? E ui ina taʻuleleia e le Tusi Paia le faaipoipoga, ae ua ia faatepaina foi manatu i luʻi e aumaia e le faaipoipoga. (Faataoto 18:22; 1 Korinito 7:28) O lea la, o i latou ua fuafua e fia faaipoipo e manaomia ona ia i latou se vaaiga mautinoa e lē gata i faamanuiaga ae o mea e aofia ai i le faaipoipo.

3. Aisea ua avea ai le Tusi Paia o se fesoasoani aogā ia i latou o loo sauni mo se faaipoipoga, ma o ā fesili e tolu o le a fesoasoani mai ia i tatou le Tusi Paia ina ia taliina?

³ E mafai ona fesoasoani le Tusi Paia. O ana fautuaga ua faagaeeina e Lē na Amataina le faaipoipoga, o Ieova le Atua. (Efeso 3:14, 15; 2 Timoteo 3:16) I le faaaogaina o mataupu silisili o loo iai i lenei tusi taʻiala ua āutausagā ae o loo aogā pea, seʻi o tatou faamautinoaina ai (1) Pe e mafai faapefea e se tagata ona iloa pe ua ia sauni mo le faaipoipoga? (2) Pe o le ā le ituaiga o paaga e tatau ona sailia? ma le (3) Pe e mafai faapefea ona tausia pea le mamalu o le faigauo?

4. O le ā le vala e matuā tāua i le tausisia o se faaipoipoga manuia, ma aisea?

⁴ Atonu e taugata le fausiaina o se fale, ae taugata foi lona tausia ina ia umi o iai i se tulaga lelei. E talitutusa lea ma le faaipoipoga. O le faaipoipo e foliga mai o se matuā luʻi lava; ae peitai, o le tausisia o se faiā faalefaaipoipoga i lea tausaga ma lea tausaga e tatau foi ona manatunatu i ai. O le ā e aofia ai i le tausisia o sea faiā? O le vala e matuā tāua o se feagaiga e faia ma le loto atoa. O le auala lenei ua faamatala ai e le Tusi Paia le faiā faalefaaipoipoga: “E tuua . . . e le tane lona tamā ma lona tinā, a e faatasi ma lana avā; ona avea ai lea o i laua ma tino e tasi.” (Kenese 2:24) Na tuuina mai e Iesu Keriso le na o le tasi le faavae faale-Tusi Paia mo talagā faaipoipoga ma maua ai se avanoa mo le toe faaipoipo​—o le “mulilua” lea, o lona uiga, o feusuaiga lē  mamā i fafo atu o le faaipoipoga. (Mataio 19:9) Pe afai o loo e fuafua e faaipoipo, ia manatua nei tapulaa faale-Tusi Paia. Afai e te lei sauni mo lenei feagaiga uigā, e te lei sauni la mo le faaipoipoga.​—Teuteronome 23:21; Failauga 5:4, 5.

5. E ui lava o le faia o se feagaiga uigā o le faaipoipoga ua faapopoleina ai nisi, ae aisea ua tatau ai ona matuā faatāuaina e i latou o loo fuafua e faaipoipo?

⁵ Ua faapopoleina le toatele e uiga i le manatu o le faia o se feagaiga uigā. Na taʻutino mai se tasi taulealea: “O le manatu atu i le nonofo faatasi o i maʻua e toalua mo le olaga atoa na ou lagona ai le matuā saisaitia, faasāsā, ma le leai atoatoa o se saʻolotoga.” Ae afai e te alofa moni i le tagata ua e fuafua e faaipoipo i ai, o le a lē foliga mai la o se avega mamafa le faia o se feagaiga. Nai lo lea, o le a manatu i ai o se puna mo le saogalemu. O le uiga o le feagaiga o loo aofia i le faaipoipoga o le a oo ai i le ulugalii se manaoga o le fia mafuta faatasi i taimi o sologa lelei ma taimi loulouā, ma ia lagolagosua le tasi i le isi i so o se mea e tupu mai. Na tusi le aposetolo Kerisiano o Paulo e faapea, o le alofa moni “e lavātia mea uma” ma ʻonosai i mea uma.’ (1 Korinito 13:4, 7) Ua fai mai se tasi tamaitai: “O le feagaiga o le faaipoipoga ua ou lagona ai le tele o le saogalemu. E tāua ia te au le faamafanafanaga o le taʻutino ia i maʻua lava ma i le lautele e faapea ua ma malilie e mafuta faatasi.”​—Failauga 4:9-12.

6. Aisea e sili ai ona lelei pe a lē vavevave e faaipoipo a o avea ma talavou laitiiti?

⁶ O le ola e tusa ai ma lea feagaiga e manaomia ai le taʻumatuaina. O lea, ua fautua mai ai Paulo e faapea, e lelei mo Kerisiano ina ia lē faaipoipo seia latou “pasia le tauosoosoga o le talavou,” o le vaitaimi e malolosi ai faalogona faaleituaiga ma e mafai ona faaseseina ai le faaiuga saʻo a se tasi. (1 Korinito 7:36, NW) E vave lava ona suia le ʻau talavou a o faasolo ina latou matutua  aʻe. O le toatele o ē faaipoipo a o talavou lava, ua latou iloaina ina ua mavae ni tausaga, ona toe suia ai lea o o latou manaoga ma faanaunauga, e faapena foi i a latou paaga. Ua faailoa mai i fuainumera faamaumau e faapea, o ē ua faaipoipo a o talavou pea, ua tele ina foliga mai ua lē fiafia ma saili atu mo talagā faaipoipoga, nai lo o i latou e faatalitali teisi sei faaipoipo pe a matutua. Ia aua la neʻi vavevave e faaipoipo. O le faaaluina o ni nai tausaga e avea ai o se tagata talavou nofofua e mafai ona avatua ai ia te oe le tomai tautele lena o le a atili ai ona e taʻumatuaina ma agavaa lelei e avea ma paaga talafeagai. O le faatuatuai e faaipoipo e mafai foi ona fesoasoani ia te oe ina ia e malamalama lelei ai ia te oe lava​—o se mea e manaomia pe afai e te fia atiina aʻe se faiā manuia i lau faaipoipoga.

7. Aisea e tatau ai ia i latou o loo fuafua e faaipoipo ona latou muai iloiloina i latou lava?

⁷ Pe e faigofie ea ona e lisiina uiga e te manaomia i se paaga? E toatele latou te mafaia. Peitai, ae faapefea ou lava uiga? O ā uiga o ia te oe o le a fesoasoani i lou mauaina o se faaipoipoga manuia? O le ā le ituaiga o tane po o se avā o le a e iai? Mo se faaaoaoga, pe e faigofie ea ona e taʻutino atu ou masei ma talia fautuaga, pe e te tetee lava i taimi uma pe a faasaʻoina oe? Pe e te masani i le uiga fiafia ma le maliegofie, pe e te mātele lava ina faaʻuʻu, ma faitio soo? (Faataoto 8:33; 15:15) Ia manatua, o le a lē suia e le faaipoipoga ou uiga totino. Afai e te faamaualuga, maʻaleʻale naʻuā, pe soona loto faanoanoa a o e nofofua, o le tulaga lava foi lena o le a e iai pe a e faaipoipo. Talu ai e faigata ona tatou iloaina i tatou lava i le tulaga o loo iloa mai ai i tatou e isi, aisea la e te lē fesili atu ai i sou matua po o sau uo e te maufaatuatuaina, mo ni manatu saʻo ma  ni faufautuaga? Pe afai ua e iloa ni suiga e mafai ona faia, ia faaleleia na mea a o lei oo atu i laasaga o le faaipoipo.

8-10. O ā fautuaga ua aumaia e le Tusi Paia o le a fesoasoani i se tasi e sauniuni ai mo le faaipoipoga?

⁸ Ua faalaeiauina e le Tusi Paia i tatou ina ia faaavanoa le agaga paia o le Atua e galue i totonu o i tatou, e fuaina mai ai uiga e pei “o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le amio mamā.” Ua ia taʻu mai foi ia i tatou ina ia “toe fuataiina manao o o [tatou] loto” ma ia “oofu i le tagata fou ua faia e foliga i le Atua, i le amiotonu ma le amio lelei e faamaoni.” (Kalatia 5:22, 23; Efeso 4:23, 24) O le faatatauina o lenei fautuaga a o e nofofua pea, o le a faatusa i le teuina o se tupe i le faletupe​—o se mea o le a mautinoa le aogā tele i le lumanai pe a e faaipoipo.

⁹ Mo se faaaoaoga, pe afai o oe o se tamaitai, ia taumafai ina ia tele lou uaʻi atu i “le tagata lilo o le loto” nai lo lou uaʻi atu i ou foliga faaletino atu i fafo. (1 Peteru 3:3, 4) O le agamalu ma le faautauta o le a fesoasoani ia te oe e maua ai le atamai, o le “palealii lalelei” moni lea. (Faataoto 4:9; 31:10, 30; 1 Timoteo 2:9, 10) Pe afai o oe o se taulealea, ia e taumafai e feutagai ma tamaitai i se auala agalelei ma le faaaloalo. (1 Timoteo 5:1, 2) A o taumafai ina ia faia filifiliga ma amo le tiute tauave, ia taumafai foi ina ia agamalu ma lotomaulalo. O se uiga fia pulepuletutū o le a taʻitaʻia atu ai i faalavelave i se faaipoipoga.​—Faataoto 29:23; Mika 6:8; Efeso 5:28, 29.

¹⁰ E ui lava e lē faigofie le faia o se filifiliga i nei itu, ae o se mea e tatau i Kerisiano uma ona galulue e faaleleia. Ma o le a fesoasoani ina ia avea ai oe o se paaga faaipoipo e sili ona lelei.

11, 12. E mafai faapefea e ni tagata se toalua ona la iloaina po ua fetaui le tasi mo le isi?

¹¹ Po o se tū masani ea i le atunuu o loo e nofo ai le filifilia e le tagata lava ia o sana paaga faaipoipo? Afai o le tulaga lena, o le ā e tatau ona e faia pe afai ua e tosina atu i se tasi o le isi ituaiga? Muamua lava, ia e fesili ifo ia te oe, ʻPo o oʻu fuafua moni lava e faaipoipo?’ O se faiga lē alofa le taalo i faalogona o le isi tagata e ala i le faatupuina aʻe o ni faamoemoega sese. (Faataoto 13:12) Ona e fesili ifo lea ia te oe, ʻPe ua ou oo ea i le tulaga ua tatau ai ona ou faaipoipo?’ Afai o le ioe le tali i na fesili uma, o laasaga la o le a sosoo ai o le a fuafua i le aganuu a lena atunuu. I nisi atunuu, pe a uma ona mataʻiina le tagata mo se taimi umi, e mafai loa ona e faailoa atu i le tagata ma faaali atu i ai se faanaunauga o le fia faamasani atili i ai. Pe afai e lē taliaina lou manao, aua e te tauanau ai lava seia oo ina ua avea oe ma sē ua faatigā. Ia manatua, e iai foi le aiā a le isi tagata e faia ai lana filifiliga i le mataupu. Ae afai e talia mai lou manao, e mafai ona e fuafua ina ia faaalu faatasi ni taimi e faia ai ni gaoioiga aogā. O lenei faiga o le a e maua ai se avanoa e iloa ai pe o le a atamai le faaipoipo atu i lenei tagata. * O ā mea e tatau ona e vaavaai i ai i lenei taimi?

¹² Ina ia taliina lena fesili, seʻi faaāta i le mafaufau ni mea faifaʻili se lua, atonu o se ukulele ma se kitara. Pe afai e saʻo ona faatonutonuina ki, e mafai e na mea faifaʻili taitasi ona tāina mai ai se musika mālie. Ae o le ā e tupu pe afai o le a tā faatasi nei mea faifaʻili? Ua tatau loa la ona fesootai lelei o la leo. E talitutusa lena ia te oe ma lē o le a avea ma au paaga. E mafai e oulua uma ona galulue ma le maelega ina ia “fesootai lelei” lua uiga  totino o le tagata lava ia. Ae o le fesili lenei: Pe ua fesootai lelei oulua, o le tasi i le isi? I se isi faaupuga, pe ua fetaui le tasi mo le isi?

13. Aisea ua matuā lē atamai ai ona faauo atu i se tasi e lē tutusa o oulua talitonuga?

¹³ E tāua le tutusa o o oulua talitonuga ma lua tulaga tau amio. Na tusi le aposetolo o Paulo e faapea: “Aua tou te amo faalegatasi ma e le faatuatua.” (2 Korinito 6:14; 1 Korinito 7:39) O le faaipoipo atu i se tasi o lē e lē tutusa o oulua talitonuga i le Atua, ua matuā foliga mai ai o le a iai ni feeseeseaiga matuia. I le isi itu, o se lua tuutoina māfana atu o oulua ia Ieova le Atua o le faavae malosi lea mo le autasi. E finagalo Ieova ina ia e fiafia ma olioli i se fusi e sili ona māfana e mafai ai, ma le tagata e te faaipoipo atu i ai. E finagalo o ia ina ia autasia oulua ia te Ia ma ia autasia foi oulua e ala i le fusi e sautuatolu o le alofa.​—Failauga 4:12.

14, 15. Po o le tutusa ea o talitonuga ua na o le pau lena o le vala e autasi ai i se faaipoipoga? Ia faamatala.

¹⁴ E ui o le tapuai faatasi i le Atua o le vala e sili lea ona tāua i le autasi, ae e tele foi isi mea e aofia ai. Ina ia fesootai lelei le tasi i le isi, e tatau ia te oe ma lē o le a avea ma au paaga ona tutusa o oulua sini. O ā lua sini? Mo se faaaoaoga, e faapeī oulua faalogona uma e faatatau i le faia o se fanau? O ā mea e faamuamua i o oulua olaga? * (Mataio 6:33) I se faaipoipoga manuia, e avea ai le ulugalii o se uo lelei ma e olioli le tasi i le faauooga a le isi. (Faataoto 17:17) I lenei itu, e manaomia ai ona tutusa mea la te fiafia i ai. E faigata ona faatumauina se faauooga māfana​—e sili foi ona faigata mo se faaipoipoga​—pe afai e lē o le tulaga lena o loo iai. Peitai, afai e iai se gaoioiga patino e fiafia i ai lē o le a avea ma au paaga, e pei o le taele i le sami, ae e te lē fiafia  i ai, pe o le uiga ea la e lē tatau ia te oulua ona faaipoipo? Atonu e lē faapena. E lē taumate o loo lua tutusa i nisi gaoioiga e tele ma sili atu ona tāua. E lē gata i lea, atonu o le a e faafiafiaina lē o le a avea ma au paaga e ala i lou auai i ni gaoioiga aogā ona o loo olioli ai lea tagata.​—Galuega 20:35.

¹⁵ O le mea moni, i se tulaga e sili ona tāua, o le fetaui lelei e filifilia i le auala e mafai e oulua uma ona faafetaui atu ai le tasi i le isi nai lo le auala e tutusapau ai oulua uma. Nai lo le fesili ifo, “Pe ma te malilie faatasi ea i mea uma?” o nisi fesili e lelei pe a faapea: “O le ā e tupu pe a ma lē malilie faatasi? Pe mafai ea ona ma talanoaina mataupu i se auala toafilemu, e avatu ai le faaaloalo ma le faamamalu o le tasi i le isi? Pe e masani pea ona iu atu talanoaga i ni fefinauaiga aasa?” (Efeso 4:29, 31) Pe afai e te fia faaipoipo, ia e mataalia i so o se tasi e faamaualuga ma taofiofi mamau i ona lava manatu, e lē taitai malie e fetuutuunai, po o lē e tagisā lava i taimi uma ma manao ia malo lana auala.

16, 17. O le ā atonu e taulai atu i ai le vaai a se taulealea po o se tamaitai pe a manatunatu mo se tasi ua fuafua e avea ma paaga faaipoipo?

¹⁶ I le faapotopotoga Kerisiano, o i latou ua faatuatuaina atu i ai tiute tauave e tatau ona “muamua ona tofotofoina o i latou.” (1 Timoteo 3:10) E mafai foi ona e faaaogaina lenei mataupu silisili. Mo se faaaoaoga, e ono fesili le tamaitai, “O le ā le ituaiga o talaaga o loo iai i lenei taulealea? O ai ana uo? Pe na te faaalia ea le pulea totino? E faapeī ona ia feutagai ma tagata matutua? O le ā le ituaiga o aiga e tupuga mai ai o ia? E faapeī ona uiga i lona aiga? O le ā lana vaaiga i tupe? Pe na te faaaogaseseina ea le ava malosi? Pe o ia ea o sē e itaitagofie, pe faasauā? O ā ni tiute tauave faalefaapotopotoga o loo ia tauavea, ma o faapeī ona ia taulimaina? Pe mafai ea ona ou faaaloalo loloto ia  te ia?”​—Levitiko 19:32; Faataoto 22:29; 31:23; Efeso 5:3-5, 33; 1 Timoteo 5:8; 6:10; Tito 2:6, 7.

¹⁷ E ono fesili le taulealea, “Pe o faaalia ea e lenei tamaitai le alofa ma le faaaloalo i le Atua? Pe e agavaa o ia mo le tausia o se aiga? O le ā o le a faatalitalia mai e lona aiga ia i maʻua? Po o ia ea o se tagata e atamai, e toʻaga, e faasoasoa lelei? O ā mea e talanoa i ai o ia? Pe manatu mamafa moni ea o ia i lelei o isi, pe manatu faapito mo ia lava, o sē e isuisu fua i olaga o isi? Po o ia ea o sē e maufaatuatuaina? Pe lotomalie ea o ia e gauai i le tulaga ulu, pe o ia o sē e lotomaaa, atonu foi e fouvale mai?”​—Faataoto 31:10-31; Luka 6:45; Efeso 5:22, 23; 1 Timoteo 5:13; 1 Peteru 4:15.

18. Pe afai ua aliaʻe ni vaivaiga laiti a o faagasolo le faigauo, o le ā e tatau ona manatuaina?

¹⁸ Aua neʻi galo, o loo e feutagai ma se tasi e lē lelei atoatoa na tupuga mai ia Atamu, ae e lē o se tama taʻutaʻua ua atoatoa ona lelei po o se tamaitai taʻutaʻua foi. E tofu tagata uma ma vaivaiga, ma o nisi o nei vaivaiga o le a tatau ona faagalo​—o ou lava vaivaiga ma vaivaiga o lē o le a avea ma au paaga. (Roma 3:23; Iakopo 3:2) E lē gata i lea, o se vaivaiga ua aliaʻe e mafai ona aumaia ai se avanoa e malosi aʻe ai faaleagaga. Mo se faaaoaoga, seʻi faapea ua mapuna aʻe se lua finauga a o faagasolo le lua faigauo. Ia manatu: E oo lava i tagata e alolofa ma faaaloalo le tasi i le isi e iai taimi e lē malilie faatasi ai i se mea. (Faatusatusa i le Kenese 30:2; Galuega 15:39.) Pe atonu ea e na o le pau le mea lua te manaomia uma o le ʻpulea o o oulua loto’ ma ia iloa po o le ā le auala e foia ai mataupu i se tulaga e sili atu ona filemu? (Faataoto 25:28) Pe o faaalia ea e lē o le a avea ma au paaga se faanaunauga ina ia faaleleia? Ae ā oe? Pe mafai ea ona e taumafai e aua e te soona maʻaleʻale, aua le soona inainā? (Failauga 7:9) O le taumafai e foia faafitauli e mafai ona faamausalīina ai se  faiga o fesootaiga faamaoni lea e manaomia tele pe afai e faaipoipo.​—Kolose 3:13.

19. O le ā e mafai ona avea o se gaoioiga atamai pe afai ua tutupu aʻe ni faafitauli matuia a o faagasolo le faigauo?

¹⁹ Ae faapefea, pe afai e te mātauina ni mea e te matuā faapopoleina ai? O na lē mautonu e tatau ona iloiloina ma le faaeteete. E tusa lava po o ā faalogona alofa ua e lagonaina po o le ā foi sou naunautai e te fia faaipoipo, ae ia aua neʻi tauaso lau vaai i ni sese matuia. (Faataoto 22:3; Failauga 2:14) Pe afai o iai sau faiā ma se tasi o lē ua iai ni ou masalosaloga matuia ia te ia, o se gaoioiga atamai la pe a faamuta le faiā, ma ia taumamao mai le fai atu o se taʻutinoga tumau i lena tagata.

20. E mafai faapefea e ni tagata se toalua o loo faauo ona tausia pea le lē taʻuleagaina o a la amio mamā?

²⁰ E mafai faapefea ona e tausia pea le mamalu o lau faigauo? Muamua, ia faamautinoa e lē mafai ona taʻuleagaina lau amio mamā. I le atunuu o loo e nofo ai, pe o se tulaga talafeagai ea mo ni tagata se toalua e lei faaipoipo, ona uulima, feasogi, pe fusifusi? E tusa lava po o na fefaaaliaiga o le alofa e lē leaga i le vaai, ae na o le pau le taimi e tatau ona faatagaina ai pe afai ua oo atu le faiā i se tulaga ua fuafua mautinoa ai e faaipoipo. Ia faaeteete ina ia lē matuā oo atu na faaaliga o le alofa i ni amioga ua lē mamā po o le oo atu foi i le faitaaga. (Efeso 4:18, 19; faatusatusa i Le Pese a Solomona 1:2; 2:6; 8:5, 9, 10.) Talu ai o le loto e taufaaʻoleʻole, o le a atamai ai mo oulua uma le alofia o le iai na o oulua i se fale, i se potu, i se taavale, pe i se isi lava nofoaga e ono maua ai se avanoa mo le faia o amioga sese. (Ieremia 17:9) O le tausia pea o le mamā tau amio o lau faigauo o se faamaoniga manino lea e faapea, o loo ia te oe le pulea totino ma o loo e faamuamuaina lou manatu mamafa lē manatu faapito mo le lelei o le isi tagata, nai lo o ou lava faanaunauga. O le itu e sili ona tāua, o se  faigauo e mamā o le a fiafia ai Ieova le Atua, o lē ua ia poloaia ana auauna ina ia taumamao mai amioga lē mamā ma le faitaaga.​—Kalatia 5:19-21.

21. O ā talanoaga faamaoni atonu e manaomia ina ia mafai ona tausia ai pea le mamalu o se faigauo?

²¹ Lona lua, o se faigauo e mamalu e aofia ai foi ni talanoaga faamaoni. A o agaigai atu la oulua faigauo i le tulaga o le faaipoipoina, e iai ni mataupu o le a manaomia ona talanoa maeʻaeʻa i ai. O fea o le a lua nonofo ai? Pe o le a lua tau fai faigaluega uma? Pe lua te mananao e faia se fanau? O se itu talafeagai foi le faailoa mai o ni mea, atonu o le olaga o se tasi i aso ua mavae, lea e ono aafia ai le faaipoipoga. O nei mea atonu e aofia ai ni aitalafu tetele po o ni tiutefai o loo tauaveina po o faafitauli tau i le soifua maloloina, e pei o so o se faamaʻi po o se tulaga matuia o loo e maua ai. Talu ai e toatele tagata o loo aafia i le HIV (le siama e faapogaia le AIDS), e lē vave ona aliali mai āuga, o le a lē sese ai mo se tasi po o mātua alolofa ona tagisia le sueina o le toto pe lē o maua i le AIDS se tasi na faia ni ana feusuaiga lē mamā ma ni tagata eseese i aso ua mavae, pe sa avea foi o sē na tuiina i lona tino vailaau faasaina. Pe afai e faamaonia i le suesuega le aafia ai, e lē tatau la i le tagata o loo aafia ona ia tauanauina pea lē na fuafua e avea ma ana paaga ina ia faaauau le faiā pe afai ua manao nei lena tagata e faamuta. O le mea moni, o so o se tasi ua aafia i na ituaiga o olaga matautia o le a lelei mo ia ona malie e suesueina lona toto pe lē o maua i le AIDS a o ia lei amataina se faigauo.

22, 23. (a) E mafai faapefea ona mou ese atu le vaaiga paleni lelei a se tasi a o sauniuni mo le aso o le faaipoipoga? (e) O le ā le vaaiga paleni lelei e tatau ona tausisia a o manatunatu i le aso o le faaipoipoga ma le uiga moni o le faaipoipoga?

²² I le gasologa o masina faaiuiu a o lei faia le faaipoipoga, e foliga mai o le a matuā pisi uma oulua  i le faatulagaina o le faaipoipoga. E mafai ona lua tuumāmāina le tele o le mafatia pe a faia i se tulaga onomea. O se faaipoipoga e soona faatelē atonu e faafiafiaina ai tauaiga ma le nuu, ae atonu e tuua ai le ulugalii fou ma o la aiga i le mafatia i le tino ma alu uma ai tupe. O le faia e tusa ai o nisi tū masani a se atunuu e talafeagai, ae o le faataʻitaʻi fua i isi ma atonu ua faia i se uiga faatauvā e mafai ona punitia ai le uiga moni o le faatasiga, ma atonu e mou ese atu ai le lua olioli sa tatau ona lua mauaina. E ui e tatau ona manatunatu i faalogona o isi, ae o le tama faaipoipo ua paʻū i ai le tiute tauave mo le filifilia po o ā mea o le a faia i le ʻaiga o le faaipoipoga.​—Ioane 2:9.

²³ Ia manatua e na o le tasi lava le aso o le sauniga o le faaipoipoga, ae o la oulua faaipoipoga e tumau i le olaga atoa. Ia alofia le soona uaʻi atu i le aso e faaipoipo ai. Ae ia saili atu ia Ieova le Atua mo taʻiala, ma ia fuafua mamao atu mo se olaga ua faaipoipo. Ona saunia lelei ai lea o oulua mo se faaipoipoga manuia.