Galuega a le ʻAuaposetolo 20:1-38

  • Paulo i Maketonia ma Eleni (1-6)

  • Toe faatūina Eutiko i Teroa (7-12)

  • Mai Teroa agaʻi i Meleto (13-16)

  • Feiloaʻi Paulo ma toeaina mai Efeso (17-38)

    • Aʻoaʻo mai lea fale i lea fale (20)

    • “Sili le fiafia e maua i le foaʻi atu” (35)

20  Ua uma le vāvāō, ona aami lea e Paulo o le ʻausoo; ma ina ua uma ona ia faalaeiau ma faamavae atu iā i latou, ona malaga atu loa lea o ia i Maketonia.  Ua alu atu o ia i nisi o na vaipanoa ma faalaeiau i le ʻausoo i le tele o upu, ona alu atu lea o ia i Eleni.  E tolu masina na nofo ai o ia i inā, ae ona sa faia e tagata Iutaia+ se taupulepulega faasaga iā te ia a o sauni o ia e folau atu i Suria, ona manatu ai lea o ia e toe foʻi e ui atu i Maketonia.  O ē ua faatasi ma ia, o Sopata le atalii o Purou mai i Perea, o Aritako+ ma Sekuno mai i Tesalonia, o Kaio mai i Teipe, o Timoteo,+ ma Tuiko+ ma Tofimo mai i le itumalo o Asia.+  Na muamua atu i latou na, ma faatali mai iā i matou i Teroa;  ma ina ua mavae aso o Falaoa e Lē Faafefeteina,+ ona matou tuuvaa atu lea mai i Filipi, ua matou taunuu atu iā i latou i Teroa i aso e lima, ona matou nonofo ai lea i inā mo aso e fitu.  I le aso muamua o le vaiaso, a o matou faapotopoto faatasi e aai, na lauga atu ai Paulo iā i latou ua faapotopoto ai, auā o le a alu ese o ia i le aso e sosoo ai; ua faaumiumi foʻi lana lauga seʻia oo i le vaeluapō.  E tele ni molī i le potu i luga i le mea ua matou faapotopoto faatasi ai.  E iai se tama talavou e igoa iā Eutiko, ua nofo o ia i le faamalama. Ua moe o ia a o faaauau pea ona lauga atu Paulo, ma ona ua gase lana moe, ua paʻū ai o ia mai i le fogāfale lona tolu, ona latou sii aʻe lea o ia ua oti. 10  Ae ua alu ifo i lalo Paulo, ua faō i ona luga ma fusi iā te ia,+ ma faapea atu: “Soia le pisapisaō, auā o loo ola o ia.”+ 11  Ona alu aʻe lea o ia i le fogāfale i luga, ma ua fai la latou meaʻai.* Ua faaauau ona talatalanoa o ia mo sina taimi seʻia oo i le tafa o ata, ona alu ai lea o ia. 12  Ua latou ave le tama o loo ola, ma ua matuā faamāfanafanaina ai i latou. 13  Ona matou ō atu lea i le vaa ma folau atu i Aso, ae ua savali atu Paulo. O i inā na tatau ona matou feiloaʻi ai ma Paulo ma matou ō faatasi ai i le vaa, e pei ona ia faatonuina ai i matou. 14  Ina ua ia taunuu atu iā i matou i Aso, ona matou ave lea o ia i le vaa ma folau atu i Metulene. 15  I le aso na sosoo ai, ona matou folau atu lea ma taunuu i gatai o Kioi, a o le isi aso ua matou ui atu ai i Samo, ma i le aso ua sosoo ai ua matou taunuu atu ai i Meleto. 16  Ua manatu Paulo e lē afe i Efeso,+ ina neʻi umi se taimi e nofo ai i le itumalo o Asia, auā ua fia vave oo atu o ia i Ierusalema+ i le aso o le Tausamiga o le Penetekoso, pe afai e mafai ai. 17  Peitaʻi, ua ia auina atu se feʻau mai i Meleto i toeaina o le faapotopotoga i Efeso, ina ia ō mai iā te ia. 18  Ina ua latou oo mai iā te ia, ona ia faapea atu lea: “Ua outou iloa lelei aʻu gaoioiga sa fai a o ou faatasi ma outou, mai lava i le uluaʻi aso na ou taunuu atu ai i le itumalo o Asia;+ 19  na ou pologa i le Alii ma le lotomaulalo,+ ma loimata, ma puapuaga na oo iā te aʻu, ona o faufauga leaga a tagata Iutaia; 20  ou te leʻi taofia foʻi le taʻuina atu iā te outou o mea aogā,* ma aʻoaʻo atu iā te outou i luma o le lautele,+ ma mai i lea fale i lea fale.+ 21  Ae ua ou molimau māeʻaeʻa atu i tagata Iutaia ma Eleni, e faatatau i le salamō+ i le Atua ma le faatuatua i lo tatou Alii o Iesu.+ 22  A o lenei, faauta! o le faamalosi mai o le agaga, ou te alu atu ai i Ierusalema, e ui ou te lē iloa mea o le a tutupu iā te aʻu i inā, 23  ae ua molimau mai pea le agaga paia iā te aʻu mai i lea aai i lea aai e faapea, o loo faatali mai noanoataga ma puapuaga iā te aʻu.+ 24  Peitaʻi, ua ou manatu e lē tāua loʻu ola iā te aʻu, ae tau lava ina ia ou faauma laʻu tamoʻega,+ ma le faiva na ou maua mai i le Alii o Iesu, ina ia ou molimau māeʻaeʻa i le tala lelei o le agalelei faifua o le Atua. 25  “Faauta! ua ou iloa, o outou uma na ou talaʻia atu i ai le Malo, tou te lē toe vāai mai lava iā te aʻu. 26  O le mea lea ou te fai atu ai iā te outou, ia outou molimau i lenei lava aso, ua mamā aʻu mai i le toto o tagata uma,+ 27  auā ou te leʻi taofia le taʻuina atu iā te outou o mea uma e finagalo i ai le Atua.+ 28  O lea, ia outou uaʻi iā te outou lava+ ma le lafu mamoe uma, o ē ua tofia i ai outou e le agaga paia e fai ma ovasia,+ ina ia leoleo le faapotopotoga a le Atua,+ lea ua ia faatauina mai i le toto o lona lava Alo.+ 29  Ua ou iloa pe a ou alu ese, ona ō mai lea o luko feʻai iā te outou,+ ma e latou te lē faapelepeleina le lafu, 30  ma e maua foʻi iā te outou ni tane e latou te faauiga sesē mea, ina ia taaʻina ese ai soo e mulimuli atu iā i latou.+ 31  “O lea, ia outou mataala ai ma ia manatua, e tolu tausaga+ o oʻu apoapoaʻi atu pea ma loimata iā te outou taʻitoʻatasi i le ao ma le pō. 32  O lenei ou te tuuina atu ai outou i le Atua, ma le upu o lona agalelei faifua, lea e mafai ona atiaʻe ai outou ma avatu ai iā te outou le tofi faatasi ma i latou uma ua faapaiaina.+ 33  Ou te leʻi manaʻo i le siliva, po o le auro, po o se ofu o se tasi.+ 34  Ua outou iloa, o galuega a oʻu lava lima ua ou maua ai mea ou te manaʻomia,+ atoa ma mea e manaʻomia e i latou ua faatasi ma aʻu. 35  Ua ou faaali atu iā te outou i mea uma lava, o galuega faapenei+ e tatau ona outou fesoasoani atu ai iā i latou ua vaivai, ma ia manatua foʻi upu a le Alii o Iesu, ina ua ia fetalai mai: ‘E sili le fiafia e maua i le foaʻi atu+ i lo o le talia mai.’” 36  Ina ua ia fai atu nei upu, ona ia tootuli lea faatasi ma i latou ma ua ia tatalo. 37  O le mea moni, ua matuā fetagisi i latou uma, ua latou fusi iā Paulo* ma sogi atu ma le alofa iā te ia, 38  auā ua matuā ootia i latou i upu ua ia fai atu ai e faapea, e latou te lē toe vāai lava iā te ia.+ Ona latou momoli atu lea o ia i le vaa.

Faamatalaga Pito i Lalo

Ele., “ua vaevae le falaoa ma ʻai.”
Po o “mea mo lo outou lelei.”
Po o le “fusi i le ua o Paulo.”