Alu i mataupu o loo iai

Alu i le lisi o mataupu

Pe e Mafai Moni Ona Tatou Faafiafiaina le Atua?

Pe e Mafai Moni Ona Tatou Faafiafiaina le Atua?

Pe na e faitau e faatatau i tagata o loo matuā lelei o latou talaaga i le Tusi Paia, ona e faapea ifo lea, ʻE lē mafai ona ou pei o i latou,’ pe ʻE lē o aʻu o se tagata e amiotonu, ma e lē o taimi uma ou te faia ai le mea tonu.’

O Iopu o sē e “leʻi taʻuleagaina ma na amio saʻo.”​—Iopu 1:1

Ua faamatalaina le augātamā o Iopu o sē e “leʻi taʻuleagaina ma na amio saʻo.” (Iopu 1:1) Na taʻua Lota o se “tagata amiotonu.” (2 Peteru 2:8) Ua taʻua Tavita o sē na ʻfaia mea ua tonu’ i le silafaga a le Atua. (1 Tupu 14:8) Peitaʻi, seʻi o tatou iloilo olaga o i latou nei o loo taʻua i le Tusi Paia. O le a tatou iloa ai (1) na latou faia mea sesē, (2) e tele aogā e tatou te maua mai i a latou faaaʻoaʻoga, ma (3) e mafai e tagata lē lelei atoatoa ona faafiafia le Atua.

SA LATOU FAIA MEA SESĒ

ʻNa laveaʻiina e le Atua Lota le tagata amiotonu, o lē na matuā mafatia ona ua sasao faaafi amioga matagā a tagata solitulafono.’​—2 Peteru 2:7

Sa tele tulaga faigatā na oo iā Iopu, ma na foliga mai e lē tonu na tulaga. Na sesē manatu o Iopu ma fai ai lana faaiʻuga, e lē popole mai le Atua e tusa pe e faatuatua atu iā te Ia pe e leai. (Iopu 9:20-22) O le mautinoa naʻuā o Iopu i lona amiotonu, na foliga atu ai i isi ua manatu Iopu e sili atu lona amiotonu nai lo o le Atua.—Iopu 32:1, 2; 35:1, 2.

 Na faatalatū Lota e fai se filifiliga sa tatau ona manino ma faigofie ona fai. Sa matuā lē fiafia o ia i amioga lē mamā a tagata o Sotoma ma Komoro, ma na “matuā tigā le loto o lenā tagata amiotonu” i na amioga. (2 Peteru 2:8) Sa faailoa mai e le Atua o le a ia faaumatia na aai amioleaga, ma tuu atu le avanoa e faasaoina ai Lota ma lona aiga. E tatou te ono manatu o Lota o le a muamua tuua na aai. Peitaʻi na faifaiaga o ia, ma sa tatau i agelu na auina atu e faasaoina o ia ma lona aiga, ona uu o latou lima ma tataʻi atu i se mea saogalemu.​—Kenese 19:15, 16.

Na “mulimuli” Tavita i le Atua ma “lona lotoatoa, i le faia o mea ua tonu” i le silafaga a le Atua.​—1 Tupu 14:8

Na iai se taimi na lē faaalia ai e Tavita le pulea totino, ma la faia ai le mulilua ma le avā a se isi tamāloa. E lē gata i lea, na faatonu e Tavita le fasiotia o le tane a le fafine ina ia ufiufi ai lenā tulaga. (2 Samuelu, mataupu 11) Ua taʻua i le Tusi Paia “ua leaga i le silafaga a Ieova le mea na faia e Tavita.”​—2 Samuelu 11:27.

Na faia uma e Iopu, Lota, ma Tavita ni mea sesē, ma e matuiā nisi o mea sesē na latou faia. Peitaʻi, e pei ona o le a tatou iloiloina, na latou naunau ma le lotoatoa e auauna ma le usiusitaʻi i le Atua. Na latou faaalia le salamō ma lotomalilie e faia suiga manaʻomia. O lea, na latou maua le finagalo malie o le Atua, ma na taʻua i latou i le Tusi Paia o ni ē e faamaoni.

O Ā NI LESONA MO I TATOU?

E lē lelei atoatoa tagata uma, ma e lē mafai ona tatou ʻalofia le faia o mea sesē. (Roma 3:23) Ae pe a tatou faia se mea sesē, e manaʻomia ona tatou salamō, ma faia ni gaoioiga e faasaʻo ai lenā mea sesē.

 Na faapefea ona faasaʻo e Iopu, Lota, ma Tavita a latou mea sesē? O Iopu o se tagata na amio saʻo. Ina ua fefulifulisaʻi le Atua ma Iopu, sa toe faasaʻo loa ona manatu sesē ma toe faafoʻi mai ana upu na fai. (Iopu 42:6) Sa ōgatusa manatu o Lota ma le silafaga a le Atua i amioga lē mamā a tagata Sotoma ma Komoro, ae o le faafitauli o Lota o le faifaiaga. Na mulimuli ane sola ese o ia mai i na aai, ma faasaoina mai ai i le toʻasā o le Atua. Sa usitaʻi o ia e aua neʻi toe tepa i tua i mea ua ia tuua. E ui lava na faia e Tavita se mea sesē matuiā i le solia o le tulafono a le Atua, ae na faaalia le mea moni sa i lona loto e ala i le salamō moni, ma ʻaiʻoi atu i le Atua mo lana faamagaloga.​—Salamo 51.

O le finagalo malie o le Atua i na tane, e fua i mea e na te faatalitalia mai i tagata lē lelei atoatoa. ʻUa silafia lelei e le Atua le mea na faia ai i tatou, ua ia manatua o le efuefu lava i tatou.’ (Salamo 103:14) Pe afai e silafia e le Atua e lē mafai ona tatou ʻalofia le faia o mea sesē, o le ā la e na te faatalitalia mai iā i tatou?

ʻUa silafia lelei e le Atua le mea na faia ai i tatou, ua ia manatua o le efuefu lava i tatou.’​—Salamo 103:14

E FAAPEFEA I TAGATA LĒ LELEI ATOATOA ONA FAAFIAFIA LE ATUA?

O le fautuaga a Tavita i lona atalii o Solomona, ua tatou iloa mai ai le auala e faafiafia ai le Atua. “O oe foʻi, Solomona e, loʻu atalii, ia e iloa le Atua o lou tamā ma ia auauna atu iā te ia ma le lotoatoa.” (1 Nofoaiga a Tupu 28:9) O le ā le lotoatoa? O se loto e alofa i le Atua ma manaʻo e iloa o ia ma faia lona finagalo. E lē o se loto e lelei atoatoa, a o se loto e naunau e auauna ma le usiusitaʻi i le Atua ma talia faasaʻoga. O le alofa i le Atua ma se faanaunauga e usiusitaʻi, na māfua ai ona taʻua Iopu o sē e “lē taʻuleagaina,” o Lota o sē e “amiotonu,” a o Tavita o sē e ʻfaia mea ua tonu’ i le silafaga a le Atua. E ui na latou faia mea sesē, ae na mafai lava ona latou faafiafiaina le Atua.

O le lotoatoa, o se loto e manaʻo e fai le finagalo o le Atua ma uunaʻia i se faanaunauga malosi e auauna ma le usiusitaʻi iā te ia

Pe afai e iai ni o tatou mafaufauga lē lelei ae mulimuli ane toe salamō ai, faia se faamatalaga ae mulimuli ane faalumaina ai, pe faia se mea e uma ane faatoʻā tatou iloa e sesē, ia tatou maua le lototele mai i faaaʻoaʻoga na talanoaina. E silafia e le Atua e lē mafai ona tatou ausia le tulaga lelei atoatoa i le taimi nei. E ui i lea, o loo ia faatalitalia i tatou ia alolofa ma taumafai e usiusitaʻi iā te ia. Pe a atoatoa o tatou loto i lea itu, e mautinoa la e mafai ona tatou faafiafiaina le Atua.