Skip to content

Skip to table of contents

 SUIA E LE TUSI PAIA OLAGA

Sa Faasolo Ina Matuā Leaga Loʻu Olaga

Sa Faasolo Ina Matuā Leaga Loʻu Olaga
  • TAUSAGA FANAU: 1952

  • ATUNUU: IUNAITE SETETE

  • TALAAGA: ITA LEAGA

OLAGA SA IAI:

Sa ou ola aʻe i Los Angeles, i Kalifonia, i le Iunaite Setete, i ni vaipanoa e lauiloa i kegi leaga ma fualaau faasāina. E toʻaono le fanau a oʻu mātua, ma o aʻu e lona lua.

Sa alu loʻu tinā ma ave i matou i le lotu evagelia. Ae a o oʻu talavou, sa ou ola i se olaga uigalua. Ou te pese i le Aso Sa i le ʻaufaipese a le lotu, ae i aso o le vaiaso, ou te alu i patī, faaaogā fualaau faasāina, ma faia feusuaʻiga.

O aʻu o se tagata e maitaita ma ita leaga. Ou te faaaogā so o se mea e fai ma auupega pe a ou ita. E leʻi aogā iā te aʻu mea na ou aʻoaʻoina i le lotu. Sa masani ona ou faapea ifo, “O le Alii e faia le tauimasui, a o aʻu o lana meafaigaluega e faataunuu ai!” A o ou iai i aʻoga maualuluga i le taufaaiʻuiʻuga o vaitausaga mai i le 1960, sa taaʻina oʻu manatu e le Black Panthers, o se vaega faapolotiki e lauiloa i le faia o ni faiga faamalosi, ina ia aumaia ai ni suiga i mataupu tau aiā tatau a tagata lautele. Na ou auai i se vaega e puipuia aiā tatau a tamaiti aʻoga. O nisi taimi e faia ai ni a matou solo tetee, ma tapunia lē tumau ai le aʻoga.

E leʻi gata ai i solo tetee oʻu uiga sauā. Sa ou faia ni soligatulafono ona o loʻu ita tele. O se faaaʻoaʻoga, a o matou iai ma aʻu uō i se tifaga, na faaali ai se ata o tagata Aferika sa faileagaina o ni pologa i le Iunaite Setete. Sa matou matuā feitai i na faiga lē tonu, ma na matou fasia ai loa talavou papaʻe i le fale tifaga. Ina ua uma, sa matou ō atu i vaipanoa e nonofo ai tagata papaʻe, ina ia toe suʻe nisi e matou te fasia.

A o leʻi atoa le 20 o oʻu tausaga, e tele soligatulafono sauā na matou faia ma oʻu uso, ma na molia i matou i le tulafono. Sa auai se tasi o oʻu uso laʻitiiti i se kegi na lauiloa i mea leaga, ma na ou aufaatasi ma i latou. Sa faasolo ina matuā leaga loʻu olaga.

SUIA E LE TUSI PAIA LOʻU OLAGA:

O se tasi o aʻu uō e Molimau a Ieova ona mātua. Na la valaaulia aʻu i a latou sauniga, ma na ou auai ai. O le sauniga muamua lava na ou iloa ai e ese Molimau. Sa tofu tagata uma ma le Tusi Paia ma na faaaogā a o faagasolo le sauniga. Sa fai foʻi lauga a talavou i le polokalame! Na ou maofa ina ua ou aʻoaʻoina e iai le suafa o le Atua, o Ieova, ma faalogo atu o loo faaaogā. (Salamo 83:18) Sa faia aʻe le faapotopotoga i tagata mai i atunuu eseese, ma e leai se faailogalanu na vaaia ai.

 Ou te leʻi manaʻo e suʻesuʻe le Tusi Paia ma Molimau, ae na ou fiafia e auai i a latou sauniga. I se tasi pō a o ou auai i se sauniga, sa ō ai nisi o aʻu uō i se koneseti, ma latou fasia ai se talavou ma oti ai, ona na musu e avatu lona ofu taugatā iā i latou. I le aso na sosoo ai, na latou talaʻi solo le tala e faatatau i le tagata na latou fasiotia. Na manatu māmā i le matuiā o la latou solitulafono, a o faagasolo le faamasinoga. O le toʻatele o i latou na soloatoa i le falepuipui. Ou te faafetai ona ou te leʻi faatasi ma i latou i lenā pō. O lea, na ou filifili ai loa e sui loʻu olaga ma amata saʻu suʻesuʻega faale-Tusi Paia.

O loʻu ola aʻe i se siʻomaga e tumu i le faailogalanu, na faateʻia ai aʻu i le tulaga na ou vaaia i Molimau. O se faataʻitaʻiga, pe a faimalaga se Molimau palagi, sa tuu lana fanau e vaavaai e se aiga o tagata uli. E lē gata i lea, na talia e se aiga palagi se talavou uli e latou te nonofo, ina ua leai se mea e nofo ai. Ua ou talitonu ai e talafeagai lelei i Molimau a Ieova fetalaiga a Iesu o loo i le Ioane 13:35: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” Ua ou iloa ua ou maua se ʻauuso moni.

Na ou iloa mai i aʻu suʻesuʻega i le Tusi Paia, e tatau ona suia oʻu manatu ina ia tausia le filemu, ma ia talitonu o le olaga sili lea. (Roma 12:2) Na faasolosolo ona ou agaʻigaʻi i luma, ma ou papatiso ai loa o se Molimau a Ieova iā Ianuari 1974.

Sa tatau ona suia oʻu manatu ina ia tausia le filemu, ma ia talitonu o le olaga sili lea

Peitaʻi, e ui ua uma ona ou papatiso, ae sa manaʻomia lava ona ou galue e pulea loʻu ita. O se faaaʻoaʻoga, i se tasi talaʻiga mai lea fale i lea fale, na ma tuli ai ma se gaoi na gaoia le leitiō o laʻu taavale. Na toeitiiti lava oʻu mauaina le gaoi ae ia faapaʻū loa le leitiō ma sola ese. Ina ua ou faamatala atu i isi le mea na tupu, na fesili mai se toeaina, ʻA Stephen, o le ā la lau mea e fai pe ana e maua le gaoi?’ Na ou mafaufau loloto i lenā fesili, ma uunaʻia ai aʻu e galue pea i le tausia o le filemu.

Iā Oketopa 1974, na avea ai aʻu o se tagata talaʻi faataimi atoa, lea e faaalu le 100 itula i le masina e aʻoaʻo atu ai le Tusi Paia i isi. Mulimuli ane, na ou maua le faaeaga e galue tauofo ai i le ofisa ulu o Molimau a Ieova i Brooklyn, i Niu Ioka. I le 1978, na ou toe foʻi ai i Los Angeles e tausi si oʻu tinā ua maʻi. I le lua tausaga mulimuli ane ai, na ma faaipoipo ai ma si aʻu avā pele o Aarhonda. Na avea o ia o se lagolagosua lelei a o ma tausia si oʻu tinā seʻia oo ina maliu. A o faagasolo taimi, na ma auai ma Aarhonda i le Aʻoga Faale-Tusi Paia a le Olomatamata o Kiliata, ma na tofia i maʻua i Panama, lea o loo ma auauna ai pea o ni misionare.

Ina ua ou papatiso, na iai tulaga na toetoe lava a ou toe foʻi ai i oʻu uiga sauā. Peitaʻi, ua mafai ona ou savali ese mai i tagata e taumafai e faaita aʻu, pe ou te taumafai foʻi e fai se isi auala e faatupu ai le filemu. Ua faamālō mai le toʻatele o tagata e aofia ai ma laʻu avā, ona o le auala na ou taulima ai na tulaga. Ou te maofa ai foʻi i isi taimi, ae ou te lē viiviia aʻu i nei suiga lelei. Nai lo o lea, ua ou faamaonia ai o loo iai i le Tusi Paia le mana e suia ai uiga o tagata.​—Eperu 4:12.

AOGĀ IĀ TE AʻU:

O le Tusi Paia ua mafai ai ona maua se fuafuaga moni o loʻu olaga ma ou iloa ai faatupu le filemu. Ou te lē o toe fasia ni tagata, ae ua ou fesoasoani iā i latou ia malolosi faaleagaga. Na ma suʻesuʻe foʻi le Tusi Paia ma se tasi sa fai ma oʻu fili a o iai i le aʻoga maualuga. Ina ua uma ona papatiso o ia, sa ma nonofo faatasi i se fale e tasi. E oo mai i le asō, o loo māfana pea la maʻua faigāuō. Ua silia i le 80 tagata ua ma fesoasoani i ai ma laʻu avā, ina ia avea ma Molimau a Ieova e ala i le suʻesuʻeina o le Tusi Paia ma i latou.

Ou te matuā faafetaia Ieova ona ua ou maua se olaga faamalieina, ma fiafia i le iai faatasi ma se ʻauuso moni.