Skip to content

Skip to table of contents

Taliina Fesili Faale-Tusi Paia

Taliina Fesili Faale-Tusi Paia

O fea e māfua mai ai mea leaga?

O ai na taumafai e uunaʻia Iesu ia faia se mea leaga?​—Mataio 4:8-10

E masani ona mananaʻo tagata ia faatupu le filemu, ia faamaoni ma agalelei. Ae aiseā la e fai ai ma tatou vaaia faiga sauā, faiga lē tonu, ma le lē alofa? Ua taatele tala o mea mataʻutia o loo tutupu. Po o iai se tasi o loo uunaʻia tagata ia faia mea leaga?​—Faitau le 1 Ioane 5:19.

Pe na foafoaina e le Atua le tagata ma tuu i ai ni faanaunauga leaga? E leai, na foafoaina e Ieova le Atua le tagata i lona faatusa, ma tuu i ai le faanaunauga ia faaaʻoaʻo i lona alofa. (Kenese 1:27; Iopu 34:10) Peitaʻi, na faamamaluina foʻi e le Atua tagata e ala i le tuu i ai o le filifiliga saʻoloto. Ina ua filifili o tatou uluaʻi mātua e fai le mea e leaga, sa la teena le faaaʻoaʻoga a le Atua ma lē lelei atoatoa ai. Ua la tuufaasolo mai iā i tatou faanaunauga agasala.​—Faitau le Teuteronome 32:4, 5.

Po o le a faaauau ona iai mea leaga?

E finagalo le Atua ia tatou teena faanaunauga leaga. (Faataoto 27:11) O lea ua ia aʻoaʻoina ai i tatou i le auala e ʻalofia ai le faia o mea sesē, ma le auala e maua ai le fiafia moni. Peitaʻi i le taimi lenei, e lē o mafai ona tatou faaaʻoaʻo atoatoa i le alofa o le Atua.​—Faitau le Salamo 32:8.

E ui ua faateteleina mea leaga i aso nei, ae e lē o taofia e le Atua mo sina taimi, ina ia iloa ai e tagata uma āuga faanoanoa e oo i ai. (2 Peteru 3:7-9) Peitaʻi, e lē o toe umi ona faatumulia lea o le lalolagi i tagata fiafia o ē e usiusitaʻi i le Atua.​—Faitau le Salamo 37:9-11.