O le Tusi Lona Lua o Samuelu 11:1-27

  • Mulilua a Tavita ma Patesepa (1-13)

  • Fafau e Tavita le fasiotia o Uria (14-25)

  • Ave e Tavita ia Patesepa e fai ma ana avā (26, 27)

11  I le amataga o le tausaga* i le taimi e faia ai osofaʻiga a tupu, na aauina atu ai e Tavita o Ioapo ma ana auauna, ma le ʻautau uma a Isaraelu, ina ia faatama‘ia le fanauga a Amoni ma siʻomia Rapa+ ina ia faoa, a o nofo Tavita i Ierusalema.+  I se tasi afiafi, na tulaʻi ai Tavita mai i lona moega ma fesavaliaʻi solo i luga o le fale o le tupu; ona ia iloa atu lea mai i luga o le fale o se fafine o loo tāʻele, ua matuā lalelei lava.  Ua auina atu e Tavita se tasi e fesili po o ai le fafine, ma ua fai mai lea tagata: “Pe e lē o Patesepa+ ea lea le afafine o Eliamu,+ ma o le avā a Uria+ le tagata Hetī?”+  Ona aauina atu lea e Tavita o avefeʻau ina ia aami iā te ia.+ Ua sau o ia iā te ia ma ua la momoe.+ (Na tupu lenei mea a o faamamā e le fafine o ia mai i lona leaga.*)+ Mulimuli ane, ua toe foʻi o ia i lona fale.  Ua tō le fafine, ona ia auina atu lea o se feʻau iā Tavita, e faapea: “Ua ou tō.”  Ona auina atu lea e Tavita o le feʻau iā Ioapo, e faapea: “Ia auina mai iā te aʻu Uria le tagata Hetī.” Ona auina mai lea e Ioapo o Uria iā Tavita.  Ina ua sau Uria iā te ia, ua fesili atu Tavita po o ā mai Ioapo ma le ʻautau, ma po o ā mai foʻi le taua.  Ona fai atu lea o Tavita iā Uria: “Inā alu ifo ia i lou fale e fai sau mālōlōga.”* Ina ua alu ese Uria mai i le fale o le tupu, ona auina atu lea e mulimuli atu iā te ia, o le meaalofa mai i le tupu.*  Ae ua moe Uria i le faitotoʻa o le fale o le tupu faatasi ai ma auauna uma a lona alii, ae e leʻi alu ifo o ia i lona fale. 10  Ona taʻu atu lea iā Tavita e faapea: “E leʻi alu ifo Uria i lona fale.” Ua fai atu Tavita iā Uria: “Pe e te leʻi sau ea mai i se malaga? Aiseā ua e lē alu ifo ai i lou fale?” 11  Ona fai mai lea o Uria iā Tavita: “O le Atolaau,+ ma Isaraelu, ma Iuta, o loo nonofo i faleʻie, ma o loo tolauapi foʻi i le fanua loʻu alii o Ioapo ma auauna a loʻu alii. Pe e tatau ea la ona ou alu i loʻu fale e ʻai ma inu, ma momoe ma laʻu avā?+ Ou te tautō iā te oe o lē e soifua, ou te lē faia lava lenei mea!” 12  Ua fai atu Tavita iā Uria: “Ia e nofo i inei i le asō, ae ou te auina ese atu oe taeao.” Ona nofo ai pea lea o Uria i Ierusalema i lenā aso, ma le aso na sosoo ai. 13  Ua aami o ia e Tavita ina ia ʻai ma inu faatasi ma ia, ma ua ia faaonā iā Uria. Ae i le afiafi, ua alu atu Uria ma moe i lona moega faatasi ai ma auauna a lona alii, ae e leʻi alu ifo o ia i lona fale. 14  Ua oo i le taeao, ona tusia lea e Tavita o se tusi iā Ioapo, ma auina atu e ave e Uria. 15  Ua ia tusi i le tusi e faapea: “Ia tuu Uria i le pito i luma o le taua pe a vevela le taua, ona outou tuumuli lea mai iā te ia, ina ia fasia o ia ma oti ai.”+ 16  A o siʻomia e Ioapo le aai, na ia tuuina Uria i le mea na ia iloa o loo iai fitafita malolosi a le fili. 17  Ina ua ō mai tagata o le aai e tau ma Ioapo, ona paʻuʻū lea o nisi o auauna a Tavita, ua oti ai foʻi Uria le tagata Hetī.+ 18  Ona auina atu lea e Ioapo o se tasi e taʻu atu tala uma o le taua iā Tavita. 19  Ua ia fai atu i le avefeʻau: “Pe a uma ona e taʻu atu tala uma o le taua i le tupu, 20  ae matuā ita le tupu ma faapea mai iā te oe, ‘Aiseā na outou soona faalatalata ai i le aai e tau ai? Pe e tou te leʻi iloa ea e latou te tafana mai i luga o le pā? 21  O ai na fasiotia Apimeleko+ le atalii o Ierupese?+ Pe e lē o le fafine ea na ia lafo ifo se maa e olo ai saito i ona luga, mai i luga o le pā ma oti ai o ia i Tipesa? Aiseā na outou soona faalatalata ai i le pā?’ Ona e faapea atu lea, ‘Ua oti foʻi lau auauna o Uria le tagata Hetī.’” 22  Ona sau lea o le avefeʻau ma taʻu mai iā Tavita mea uma na auina mai ai o ia e Ioapo. 23  Ua fai mai le avefeʻau iā Tavita: “Na malolosi atu o latou tagata iā i matou, ma na latou siitaua mai iā i matou i le fanua; ae ua matou tetee atu pea iā i latou e oo atu i le faitotoʻa o le pā. 24  Na tafana mai e tagata fanafana ū au auauna mai i luga o le pā, ua feoti ai nisi o auauna a le tupu; ua oti ai foʻi lau auauna o Uria le tagata Hetī.”+ 25  Ona fai atu lea o Tavita i le avefeʻau: “O lau tala lenei e fai iā Ioapo, ‘Aua e te atuatuvale ona o lenei mea, auā e fasiotia ma e lē faailogaina e le pelu se tasi. Ia e faamalosi e tau ma le aai ma ia faatoʻilaloina.’+ Ia e faalaeiau atu foʻi iā te ia.” 26  Ina ua faalogo le avā a Uria ua oti Uria lana tane, ona ia faavauvau ai lea ona o lana tane. 27  Ina ua mavae le taimi e faavauvau ai, ona auina atu loa lea e Tavita o le feʻau ma aumai o ia i lona fale, ua fai foʻi o ia ma ana avā,+ ma ua ia fanaua lona atalii. Ae ua matuā leaga i le silafaga a Ieova le mea na faia e Tavita.+

Faamatalaga Pito i Lalo

E faasino atu i le tau e totogo ai mea.
Pe atonu o le lē mamā ona o lona maʻi masina.
Epe., “e mulumulu ou vae.”
Atonu e faasino atu i meaʻai e auina atu e lē na talimālō mo lana mālō faaaloalogia.