Alu i mataupu o loo iai

Alu i le lisi o mataupu

 MATAUPU AUTŪ | AUALA E FEAGAI AI MA POPOLEGA

Popole e Faatatau i Tupe

Popole e Faatatau i Tupe

Ua faapea mai Paulo, o se tane e toʻalua lana fanau: “Ina ua sii le tau o oloa i lo matou atunuu, sa taugatā ma tau leai ni meaʻai. Sa umi ona matou tutū i laina i faleoloa, ae e masani ona uma meaʻai a o matou leʻi oo atu i luma. Sa matuā paeee tagata ona o le fia aai, ma o nisi na matapogia i le ala tele. Sa siitia i le miliona ma faasolo atu i le faitau piliona le tau o mea na manaʻomia e ola ai. Mulimuli ane na matuā lē aogā le tupe a le atunuu, na leai ai saʻu teugātupe i le faletupe, laʻu inisiua ma le penisione.”

Paulo

Sa iloa e Paulo e tatau ona ia faaaogā le “atamai aogā” ina ia faasaoina ai lona aiga. (Faataoto 3:21) Ua ia faapea mai: “O aʻu o se faieletise ae sa ou talia so o se galuega, e tusa pe e itiiti loʻu totogi mai i le totogi masani. O nisi tagata sa totogi aʻu i meaʻai po o isi mea masani. Pe afai o loʻu totogi e fā fasimoli, ou te faaaogā fasimoli e lua ae faatau atu le isi lua. A o faagasolo taimi, sa maua ni aʻu tamaʻi moa se 40. Ina ua tetelē, sa ou faatau atu ma maua mai ai isi moa e 300. Mulimuli ane, sa ou faafesuiaʻi moa e 50 i taga meaʻai e lua e fai mai i saga, ia e taʻi 110 pauna (50 kg). O na taga meaʻai sa fafaga ai loʻu aiga ma nai isi aiga mo se taimi umi.”

Sa iloa foʻi e Paulo, o le mea e sili ona tāua e mafai ona fai e so o se tasi, o le faatuatuaina lea o le Atua. Pe a tatou faia mea ua poloaʻia mai e le Atua, e fesoasoani mai o ia iā i tatou. E tusa ai o le mauaina o mea e ola ai, na fetalai Iesu: ʻAua tou te toe soona popole auā ua silafia e lo outou Tamā, o mea ia o loo outou manaʻomia.’​—Luka 12:29-31.

Pagā lea, ua maileia e le fili sili o le Atua, o Satani, le toʻatele o tagata ina ia taulaʻi atu i manaʻoga faaletino. Ua matuā popole tagata i o latou manaʻoga, o mea e manaʻomia moni ma mea e mafaufau o loo manaʻomia. O lea ua taumafai ai ma le popole ia maua mea e latou te lē o manaʻomia moni. Ua faia e le toʻatele ni aitalafu, ma ua tofo i le faigatā o le ʻauauna o le tagata aitalafu i le tagata na nonō mai ai.’​—Faataoto 22:7.

 O nisi tagata ua faia ni filifiliga e mafatia ai. Ua faapea mai Paulo: “O le toʻatele o tagata o loʻu vaipanoa ua tuua o latou aiga ma uō ae saʻili manuia atu i isi atunuu. O nisi na ō e aunoa ma le faia lelei o ni pepa malaga ma na lē mafai ona maua ni a latou galuega. Sa latou fesolasolataʻi mai i leoleo ma momoe i nofoaga faitele. E latou te leʻi tuu atu se avanoa i le Atua e fesoasoani mai ai iā i latou. Peitaʻi, na matou filifili e fesagaʻia faatasi o se aiga ia faafitauli tau tupe, faatasi ai ma le fesoasoani a le Atua.”

IA MULIMULI I LE FAUTUAGA A IESU

Ua faapea atili mai Paulo: “Na fetalai Iesu: ʻIa aua neʻi outou popole mo le aso a taeao, auā e iai foʻi popolega o le aso a taeao. Auā e tofu lava le aso ma mea leaga e tutupu ai.’ O lea, sa ou tatalo i aso uma i le Atua ia ʻfoaʻi mai i le aso nei a matou meaʻai mo le asō,’ ina ia mafai ona faasaoina i matou. Sa fesoasoani mai le Atua e pei lava ona folafola mai e Iesu. E lē o taimi uma na maua ai mea sa matou mananaʻo i ai. I se tasi taimi, na ou tū ai i se laina i se faleoloa ae ou te leʻi iloa po o ā mea o loo faatau ai. Ina ua oo atu i luma, sa ou vaaia ai o yogurt. Ou te lē fiafia i yogurt, ae o le meaʻai, ma o le yogurt la matou meaʻai i lenā pō. Ou te faafetaia le Atua ona e leʻi fia aai loʻu aiga i lenā taimi atoa.” *

Ua folafola mai e le Atua: “Ou te lē tuua lava oe, ma ou te lē tuulafoaʻia lava oe.”​—Eperu 13:5

“Ua faigofie mea mo i matou i lenei taimi i le tulaga tau tupe. Ae o mea na tutupu ua matou aʻoaʻoina ai, o le auala sili e feagai ai ma popolega, o le maufaatuatuaina lea o le Atua. E fesoasoani mai Ieova * i taimi uma pe afai e faaauau ona tatou faia lona finagalo. Ua matou tofo i le moni o le Salamo 34:8: ʻInā outou tofotofo ia ma iloa ai e lelei Ieova; E fiafia foʻi le tagata e sulufaʻi atu iā te ia.’ O le iʻuga, e matou te lē popole pe a toe fesagaʻi ma faigatā i le tulaga tau tupe.

E fesoasoani le Atua i ē e faatuatua ina ia maua a latou “meaʻai mo le asō”

“Ua matou malamalama nei, o mea e manaʻomia e tagata ina ia ola ai, e lē o galuega po o tupe, ae o meaʻai. O loo matou faatalitali ma le naunau i le taimi o le a faataunuu ai le folafolaga a le Atua e faapea: ʻO le a tele saito i le laueleele.’ Ae i le taimi nei, ʻafai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.’ Ua faamalosia i matou i upu nei i le Tusi Paia: ʻIa aunoa o outou olaga ma le manaʻo tele i tupe, a ia outou lotomalilie i mea ua iai iā te outou. Auā na fetalai o ia: “Ou te lē tuua lava oe, ma ou te lē tuulafoaʻia lava oe.” Ia tatou lototetele ma faapea atu: “O Ieova o loʻu fesoasoani ia; ou te lē fefe lava.”’” *

E manaʻomia le faatuatua moni ina ia ʻsavavali ai ma le Atua’ e pei ona faia e Paulo ma lona aiga. (Kenese 6:9) E tusa pe o loo tatou feagai ma se tulaga faigatā tau tupe i le taimi nei pe i le lumanaʻi, ae ua tatou aʻoaʻoina ni lesona aogā mai i le faaaʻoaʻoga a Paulo, o le faatuatua ma le faaalia o le atamai aogā.

Ae faapefea pe afai o loo faapopoleina i tatou ona o faafitauli i le aiga?

^ pala. 10 I le Tusi Paia, o Ieova o le suafa lea o le Atua.