TALA A TAGATA

Pe afai e te manaʻo ia tumau lau galuega, e tatau ona avea lau galuega ma mea e sili ona tāua i lou olaga. O lenei manatu ua iʻu ai ina alu uma le taimi o nisi i a latou galuega, ae lē amanaʻia ai o latou aiga ma soifua mālōlōina.

LE MANATU O LE TUSI PAIA

O loo faalaeiau i le Tusi Paia se vaaiga paleni i galuega. E viiviia le galue mamafa ae e inosia le paiē. (Faataoto 6:6-11; 13:4) I le taimi e tasi, e lē o faalaeiau mai le Tusi Paia ia faaalu uma lo tatou taimi ma le malosi i galuega. Nai lo lea, o loo faalaeiau i tatou ia lava le mālōlō. Ua taʻua i le Failauga 4:6: “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.” E lē tatau la ona alu uma lo tatou taimi i galuega, ae lē amanaʻia ai o tatou aiga ma le soifua mālōlōina. E leai se aogā o le soona galue ae maʻimau ai le ola!

“E leai se mea e sili i le tagata nai lo o le ʻai ma inu, ma iloa e ia mea lelei ona o lana galuega mamafa.”​—Failauga 2:24.

TALA A TAGATA

A lelei le totogi, e tatau la ona e talia lenā galuega. O lenā manatu faatasi ai ma le manaʻo tele i tupe, ua uunaʻia ai nisi e fai ni faiga faapisinisi piʻopiʻo, ma talia galuega e solitulafono.

O nisi ua latou talia na o galuega e fiafia i ai. Pe afai e lē tau o latou loto i le galuega pe lē ausia le mea o loo naunau i ai mo lenā galuega, e latou te manatu e lē manaia lenā galuega. O lea, ua iai iā i latou se vaaiga sesē i le galuega ma tau ai ina faataunuu. E latou te ono lē talia foʻi avanoa lelei e faigaluega ai ona e manatu faatauvaa i na galuega.

LE MANATU O LE TUSI PAIA

E lē talia i le Tusi Paia galuega e lē faamaoni pe e afāina ai tagata i so o se itu. (Levitiko 19:11, 13; Roma 13:10) O galuega lelei e aogā i isi ma e fesoasoani i le tagata faigaluega, ina ia “taofimau i se lotofuatiaifo lelei.”​—1 Peteru 3:16.

Ua aʻoaʻo e le Tusi Paia o le māfuaaga tāua e faigaluega ai, ina ia tausia ai le tagata ma lona aiga, ae e lē tau ina ia maua ai le faamalieina. E lē leaga le fiafia i a tatou galuega totogi, ae e lē tatau ona avea ma mea e sili ona tāua i o tatou olaga.

O le mea moni, o le siisii i luga o le tau o le soifuaga, e ono faapopoleina ai i tatou po o le a faapefea ona totogi tupe faaalu, ae o loo faamamafa i le Tusi Paia le paleni. Ua faapea mai: “Afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.” (1 Timoteo 6:8) E lē faapea la o le a tatou lē popole i le tausiaina o i tatou lava. Ae e tatau ona amanaʻia le mea e tatou te gafatia, ma ia faaeteete i le tele o meafaitino e tatou te faatauina.​—Luka 12:15.

LE UIGA MO OE

Ia toʻaga i lau galuega ma ia fiafia i ai. E tusa pe e foliga mai e faatauvaa pe e lē o le ituaiga galuega lea sa e manaʻo i ai, ae ia taumafai e te tomai i lau galuega. O le toʻaga i le galuega o le a e lagona ai le fiafia, ma o le faaleleia pea o lou tomai atonu o le a atili ai ona faamalieina oe i lau galuega.

I le taimi e tasi, ia paleni. Ia iai ni taimi e mālōlō ma tafafao ai. O le a sili ona fiafia i nei faigāmālōlōga pe afai na tatou galulue mamafa. E lē gata i lea, pe afai ua maua mea e manaʻomia, o le a tatou lagona le faamalieina ma faaaloalogia i tatou e isi, e aofia ai o tatou aiga.​—2 Tesalonia 3:12.

“Ia aua lava neʻi outou popole ma faapea ane,ʻO le ā se mea tatou te aai ai?’ ʻO le ā se mea tatou te inu ai?’ ʻO le ā foʻi se mea tatou te oofu ai?’ . . . Ua silafia e lo outou Tamā o i le lagi, o mea uma ia o loo outou manaʻomia.”​—Mataio 6:31, 32.