Alu i mataupu o loo iai

Alu i le lisi o mataupu

 ATUNUU MA TAGATA

Se Asiasiga i Mongolia

Se Asiasiga i Mongolia

O GENGHIS KHAN, o se toa malosi i le senituri lona 12, ma o ia na faavaeina le emepaea sili o Mongol. E na o se vaega o le laufanua o lenā emepaea o loo iai Mongolia i aso nei, e tau leai nisi o nonofo ai, ma o Mongolia e i le va o Rusia ma Saina.

E valevalenoa ma lanulauʻava laufanua o Mongolia, e iai mauga maualuluga, vaitafe, ma ālia. O loo iai i le itu i saute le toafa o Gobi, lea e lauiloa ona e maua ai toega o dinosaur. E taʻua Mongolia e ona tagatānuu o le “Atunuu e Lagi Lelei,” ona e silia i le 250 aso o le tausaga e lagi lelei ai Mongolia!

Nameri i le tau mālūlū

O le tau i Mongolia e matuā mālūlū ma matuā vevela. I le tau māfanafana, e oo atu le vevela i le 104 tikeri Fahrenheit (40°C), a o le tau mālūlū e paʻū i le 40 tikeri Fahrenheit (-40°C) i lalo o le 0 tikeri. E toetoe tasi vaetolu o tagata e nonofo i Mongolia e maumausolo. E amata a latou feʻau o le aso i le tatauina o susu  o ʻoti, povi, kamela, ma solofanua. O meaʻai a tagata Mongolia e tele ina fai mai i le susu ma aano o manufasi, ma o lo latou maʻoi o le mamoe.

O keke (aaruul) e fai mai i suāsusu to‘a, ma e faamago i le lā

O tagata Mongolia e talimālō tele. O o latou fale e tai pei o ni faleʻie e faalapotopoto (gers), e feaveaʻigofie ma e lē lokaina ina ia mafai ona mālōlō atu i ai tagata femalagaaʻi ma fai sina taumafataga. E masani ona avatu i mālō se iputī e faasusu ma tuu i ai sina masima.

O le lotu autū i Mongolia i aso nei o le lotu Puta. E iai foʻi faiga faataulāitu, le lotu Isalama ma le faa-Kerisiano, ae o le toʻatele lava e lē lolotu. E silia i le 350 Molimau a Ieova i Mongolia, ma o loo latou aʻoaʻo atu le Tusi Paia i le silia ma le 770 tagata.

O le kamela o le Bactrian e lua patu i lona tua, ma e mafai ona ia tauaveina uta i le tau mālūlū