Ee, Daawuloosi no. Isi ‘tenne gobba [alame] gashshaanchooti’; kuni ayyaanu kalaqami busha sokkaancho ikke Maganoho finqilinoho. (Yohaannisi 14:30; Efesooni Sokka 6:11, 12) Qullaawu Maxaafi Daawuloosi ayimma kulate aante noo suˈmuwa horoonsiˈranno:

•   Sheexaane; hatto yaa “Hettisamaancho” yaate.—Iyyoobi 1:6.

•   Daawuloosi; hatto yaa “Suˈma hunannoho” yaate.—Yohaannisi Ajuuja 12:9.

•   Hamashsho; kuni qaali Qullaawu Maxaafi giddo “Soˈrisiisaancho” yitanno tiro afiˈrino.—2 Qorontoosi 11:3.

•   Jifannoho.—Maatewoosi 4:3.

•   Kaphaancho.—Yohaannisi 8:44.

Busha hedo woy akata diˈˈikkino

 Mitu manni, Sheexaanu Daawuloosi mannu giddo noote busha hedooti woy akataati yee hedanno. Ikkollana, Qullaawu Maxaafi Sheexaanu Maganu ledo hasaawinota kulanno. Maganu guuta ikkino daafira, giddosi noote busha hedo ledo hasaawara didandaanno. (Marro 32:4; Iyyoobi 2:1-6) Qoleno, Sheexaanu cubbu noosikkiha Yesuusano jifino. (Maatewoosi 4:8-10; 1 Yohaannisi 3:5) Hakko daafira, Qullaawu Maxaafi Sheexaanu mannu giddo noota busha hedo ikkikkinni addanka nooha ikkinota kulanno.

 Batinyu manni Sheexaanu addanka noota ammana hoogansa dhagge ikkitannonke? Diˈˈikkitannonke; mayira yiniro, Qullaawu Maxaafi Sheexaanu hedinore wonshiˈrate manna dogannota kulanno. (2 Teselonqe 2:9, 10) Isi manna dogannote qara doogga giddo mitte, batinyu manni Sheexaanu dino yee hedanno gede wodanansa beeshshate.—2 Qorontoosi 4:4.

  Soˈrote hedo: Maganu, manna qorichishate Sheexaane horoonsiˈranno.

 Halaale: Daawuloosi Maganoho baarigaaraho ikkinnina soqqamaancho diˈˈikkino. Sheexaanu Daawuloosi Maganoho soqqamanno manna giwanno hattono beebbate kassasanno.—1 Pheexiroosi 5:8; Yohaannisi Ajuuja 12:10.