Maariyaami Maganu Amaati?
Qullaawu Maxaafi mayyaanno?
Deeˈni. Qullaawu Maxaafi, Maariyaami Maganu amaati diyaanno; qoleno ise magansiˈra woy isera kumbuula hasiissanno diyaanno. a Hanni aane noore hedi:
Maariyaami ‘Ani Maganu amaati’ horo diyitino. Qullaawu Maxaafi, ise iltinohu Magano ikkikkinni “Maganu Beetto” ikkinota xawise kulanno.—Maarqoosi 1:1; Luqaasi 1:32.
Yesuusi Kiristoosi, Maariyaami Maganu amaati yee dirosiisino; qoleno ise magansiˈra hasiissanno diyiino. Isinni mitte mancho Maariyaami iso iltino daafira maassantinote yite guwissuta Yesuusi, “Maassantinori Maganu qaale macciishshite hajajantannoreeti” yee qolino.—Luqaasi 11:27, 28.
“Maganu Ama” hattono “Tiotokoosi” (Magano Iltinoti) yaanno qaali Qullaawu Maxaafi giddo dino.
Qullaawu Maxaafi giddo “Gordu Mootitte” yinoonniti Maariyaami ikkitukkinni, kaadaasine Israeele magansidhinote kaphu maganchooti. (Ermiyaasi 44:15-19) “Gordu Mootitte” yiniti Baabiloonete daga magansidhannota Ishitaari (Astaarte) ikkitukkinni digattino.
Hundi Kiristaani Maariyaami dimagansiˈrino; qoleno isera baxxino ayirrinye diuyino. Mittu xaggete fullahaanchi yiino garinni, hundi Kiristaani “wosincho ammaˈno effire giwino; qoleno Maariyaamira quwa saino ayirrinye aa, meya magano magansidhannoreeti yinanninke gede assitara dandiitanno yee waajjikki digatino.”—Ini Kuwesti ofi ze Jiwishi Meerii.
Qullaawu Maxaafi, Maganu woˈmanka woyite nooha ikkinota kulanno. (Faarso 90:1, 2; Isayaasi 40:28) Isira hanafo noosikki daafira, ama dinosi. Qoleno, Maariyaami Magano godowisera duha didandiitanno; Qullaawu Maxaafi, Magano gordu nafa haaˈre afannokkita xawise kulanno.—1 Mootoolla 8:27.
Maariyaami Yesuusi Amaati Ikkinnina “Maganu Ama” Diˈˈikkitino
Maariyaami Yihudu manni widooti; qoleno ise ayiddi Moote Daawiti gaˈre widira kiiramanno. (Luqaasi 3:23-31) Maariyaami ammana noosetanna Magano waajjitannota ikkitino daafira isi albaanni ayirrinye afidhino. (Luqaasi 1:28) Maganu ise Yesuusi ama ikkitanno gede doorino. (Luqaasi 1:31, 35) Maariyaami Yooseefira assidhe wole oosono iltino.—Maarqoosi 6:3.
Qullaawu Maxaafi, Maariyaami gedensoonni Yesuusi rosaancho ikkitinota qummi assannoha ikkirono, hakkunni kaˈa ise daafira garire kulannori dino.—Soqqamaasinete Looso 1:14.
a Duucha ammaˈno Maariyaami Maganu amaati yite rosiissanno. Insa ise “Gordu Mootitte” woy Tiotokoosi (Giriikete Afiinni, “Magano Iltinoti” yaate) yitanno.