Alamete goofimarchi daanno yanna afate, “alame” yaanno qaale Qullaawu Maxaafi giddo horoonsiˈnoonni gara afa hasiissanno. Roore woyite “tini gobba” woy “alame” yine tirrannihu kosmos yaannohu Giriikete Afii qaali, roore anga mannu ooso, roorenkanni Maganunna fajjosi ledo sumuu yaannokki manna kulannoho. (Yohaannisi 15:18, 19; 2 Pheexiroosi 2:5) Mito woyite, kosmos yaanno qaali dagoomu galino wodho, lawishshaho daddalu, poletikunna ammaˈnote uurrinshuwa kulanno.—1 Qorontoosi 7:31; 1 Yohaannisi 2:15, 16. a

“Alamete goofimarcho” yaa mayyaate?

 Batinye Qullaawu Maxaafi tiro giddo nooha “alamete goofimarcho” yaanno qaale, ‘diru goofimarcho’ yineno tira dandiinanni. (Maatewoosi 24:3) Kuni qaali, baatto baˈannota woy mannu sirchi coˈo yee baˈˈannota kulannoha ikkikkinni, baattote aana nooti mannu wodho baˈannota kulannoho.—1 Yohaannisi 2:17.

 Qullaawu Maxaafi, danchu manni uullate aana hagiidhanni heeˈranno gede, “bunshe assitannori [murantannota]” kulanno. (Faarso 37:9-11) Tini bao daggannohu “lowo qarri” yannaraati; konni qarrira gumulote Armagedooni yinanni oli kaˈˈanno.—Maatewoosi 24:21, 22; Yohaannisi Ajuuja 16:14, 16.

Alamete goofimarchi daannohu mamooteeti?

 Yesuusi togo yiino: “Hakkonne barranna hattenne saate Maganu Annu kaˈa, gordu sokkaasineno ikkito, Beettono ikko, afinohu dino.” (Maatewoosi 24:36, 42) Qoleno isi goofimarchu hedeweelcho daannota kulanni, “Heddinoonnikki saatera daanno” yiino.—Maatewoosi 24:44.

 Barranna saate bande afa dandiineemmokkiha ikkirono, Yesuusi addi addi ikkito mitteenni amadino ‘malaate’ kulinonke; tini addi addi ikkito alamete goofimarchi gambise dayinota afate kaaˈlitannote. (Maatewoosi 24:3, 7-14) Qullaawu Maxaafi tenne yanna, ‘kalqete goofimarcho,’ hattono “goofimarchu barra” yaanno.—Daanieeli 12:4; 2 Ximootewoosi 3:1-5.

Alamete goofimarchi gedensaanni gatannori heeˈranno?

 Ee, heeˈranno. Baatto dibaˈanno; mayira yiniro, Qullaawu Maxaafi togo yaanno: “Baatto xintise aana kaajjishshe uurrisootto daafira, horontanni dishashshafantanno.” (Faarso 104:5) Qoleno Maganu Qaali, “Keeraano baatto ragidhanno; ise aanano hegerera heedhanno” yaanno daafira, uullate aana mannu woˈmanno. (Faarso 37:29) Maganu hunda hedinori baattote aana woˈmanno gede assanno:

•   Uulla gannate ikkitanno.—Isayaasi 35:1; Luqaasi 23:43.

•   Mannu waajjishannori nookkiha harshammi yee heeˈranno.—Mikiyaasi 4:4.

•   Mannu baalunku kaaˈlannonna hagiirsiisanno looso loosanno.—Isayaasi 65:21-23.

•   Dhibbunna geedhimma diheedhanno.—Iyyoobi 33:25; Isayaasi 33:24.