Iyyaasu 4:1-24
-
Malaate ikkitanno kinna (1-24)
4 Israeelete daga baalanti Yordaanoosi Laga tayisse saꞌuta, Yihowa Iyyaasu togo yii:
2 “Dagate giddonni 12 manna yaano mitte mittente gaꞌrenni mitto mitto mancho doorte
3 togo yite hajaji: ‘Yordaanoosi mereero kakkalaano uurritino baychinni 12 kinna haadhe; hakkiinni massitine galtinanni baycho worre.’”
4 Konnira Iyyaasu Israeelete giddonni doorinoha 12 manna yaano mitte mittente gaꞌrenni mitto mitto mancho woshshi;
5 Iyyaasuno togo yiinsa: “Maganiꞌne Yihowa Taawoota balaxxine Yordaanoosi mereerira saꞌe; mittu mittunku Israeelete gaꞌre kiironni mitto mitto kincho haadhine qotiꞌnera dukke;
6 tini kinna kiꞌne mereero malaate ikkitanno. Albillitte oosoꞌne, ‘Kuri kinna koye mayra wortinoonni?’ yite xaꞌmituꞌnero
7 togo yitine kullensa: ‘Yordaanoosi way Yihowahu gondooru taawooti albaanni lolaha agure uurrino daafiraati. Taawootu Yordaanoosi tayse sai woyte, Yordaanoosi way lolaha agure uurrino. Tini kinna Israeelete dagara hegerera qaagooshshe ikkite heedhanno.’”
8 Konnira Israeele Iyyaasu hajajinonsare assitu. Insano Yihowa Iyyaasu hajajino garinni, Israeelete gaꞌre kiironni Yordaanoosi mereerinni 12 kinna haadhu. Hakkiinni massite galtannowa wortu.
9 Iyyaasuno Yordaanoosi mereero gondooru taawoota dukkino kakkalaano uurritino basera 12 kinna wori; tini kinna xaa geeshsha hakko no.
10 Muse Iyyaasura uyno hajajo garinni, Yihowa Iyyaasura mannaho kulanno gede hajajinori woꞌma geeshsha, Taawoota dukkino kakkalaano Yordaanoosi mereero noowa uurrite keeshshitu. Hatte mereero mannu rahe tayse sai.
11 Mannu baalu tayse saihu gedensaanni, Yihowa Taawootinna kakkalaano mannu laꞌꞌanna tayisse saꞌu.
12 Roobeeli gaꞌre, Gaadi gaꞌrenna Minaase gaꞌre darati Muse hajajinonsa garinni, olaho qixxaabbe wole Israeelete manna balaxxe saꞌu.
13 Mito 40,000 ikkitannoti bagado qodhitino olanto Yihowa albaanni Iyyaarkonnita halallitte baatto saꞌu.
14 Hakko barra, Yihowa Iyyaasu Israeelete manni baalu albaanni gotti gotti assisi; mannuno Muse lowo geeshsha ayirrisinte gede,* isono heeshshosi diro woꞌma lowo geeshsha ayirrisi.
15 Hakkiinni Yihowa Iyyaasu togo yiisi:
16 “Naqaashshete taawoota dukkino kakkalaano Yordaanoosi giddonni fultanno gede hajaji.”
17 Konnira Iyyaasu kakkalaano, “Yordaanoosi giddonni fulle” yee hajaji.
18 Yihowaha gondooru taawoota dukkino kakkalaano Yordaanoosi mereerinni fultutanna lekkansa moola baatto kadduta, Yordaanoosi way albi gede ikke daadanna woꞌme gobbaanni fule lolaha hanafi.
19 Mannuno umikki aganira tonnikki barra Yordaanoosinni fule Iyyaarkote soojjaatoonni noo dannira Gilgaali dukkaꞌni.
20 Iyyaasuno Yordaanoosinni fushshitinota 12 kinna Gilgaali uurrisi.
21 Hakkiinni Israeeloota togo yiinsa: “Albillitte oosoꞌne, ‘Tini kinna mayinnite?’ yite xaꞌmitannoꞌne woyte,
22 oosoꞌnera togo yiiyye: ‘Israeele Yordaanoosi giddoonni moola baatto tayisse saꞌino;
23 kuni ikkinohu Maganiꞌne Yihowa Duumo Baara tayinse saꞌnammo geeshsha baara mooshshinte gede, Maganiꞌne Yihowa Yordaanoosi waano tayinse saꞌnammo geeshsha waa mooshshi yannaraati.
24 Isi tenne assinohu uullate aana heedhanno daga baala, Yihowa anga mageeshshi geeshsha wolqaataame ikkitinoro affanno gedeetinna kiꞌneno woꞌmanka woyte Maganoꞌne Yihowa waajjitinanni gedeeti.’”
Lekkaalliidi Qaagiishshuwa
^ Noo gedeenni tirriro, “waajjinte gede.”
