Iyyaasu 2:1-24
2 Hakkiinni, Newe beetti Iyyaasu Shitiiminni lame qotaano maaxe soy. Isi, “Hadhiꞌne gobba hakko iso Iyyaarko laꞌine amme” yiinsa. Insano hadhe Reaabi yinannite mitte foora mancho minira eꞌe hakko fooliishshidhu.
2 Iyyaarkote mootera, “Kuneeti! Israeelete manni gobba qotara techo hashsha kawira dayno” yine kullisi.
3 Hatte yannara Iyyaarkote moote, “Insa dagginohu gobba baala qottaraatina, minikkira daye noo manna fushshi” yee Reaabira sokka soy.
4 Mancho kayinni lamenka manna maaxxu. Hakkiinni togo yitu: “Mannootu daate woyte anewa dagginona, mamiinni dagginoreetiro kayinni diafoomma.
5 Hawarro katamu waalcho cunfara kaꞌne heeꞌneenna fulte hadhino. Hiikka higge hadhinoro diafoommana, kayinni rakkine hordoffiniro iillitinanni.”
6 (Ikkollana ise mannoota mineho aanaanni seekkinoonni darga fushshite, hakko dirre worroonnite shalaalate nadalla mereero maaxxe no.)
7 Moote soyno mannootino qotaano hordoffanni Yordaanoosi lawo* wido higge hadhu; hordoffannori fultuta katamu waalcho cunfi.
8 Qotaano goxxara albaanni ise insa noowa mineho aanaanni seekkinoonni darga martu.
9 Hakkiinni togo yitunsa: “Yihowa tenne gobba aanoꞌneta afoomma; qoleno kiꞌne waajjine qece yinoommo. Kiꞌnenni kainohunni tenne gobbara heeꞌranno manni baalu waajje quubbi yiino;
10 korkaatuno, Gibitsetenni fultini waro Yihowa albaꞌneenni Duumo Baara mooshshino gara, hattono Yordaanoosira widoonni* lame Amooraawootu mootoolla yaano Sihooninna Oogi assitinoonnita macciishshinoommo. Insa coꞌo assitine huntinoonni.
11 Tenne macciishshinummo yannara manse shiilloommo;* kiꞌnenni kainohunni wolqa bainokkihu mittuno dino; korkaatuno Maganiꞌne Yihowa iima gordoho uulla baattoteno Maganoho.
12 Ani ammanamino baxille leellishummaꞌnente gede, kiꞌneno anniꞌya mini mannira ammanamino baxille leellishshinannie gede, Yihowa suꞌminni xaarreꞌꞌe ballo; qoleno hawaqiꞌnanni* malaate uyiyyeꞌꞌe.
13 Annaꞌyanna amaꞌya hattono roduuwaꞌyanna insaha ikkinore baala huntinoonte; reyotennino gatissenke.”*
14 Hatte yannara qotaano togo yituse: “Kiꞌnera yine heeshshonke uyneemmo!* Dangoommo hajo daafira wolootaho kula hoogittaro, Yihowa tenne baatto aannonke yannara ammanamino baxillenna ammanama leellinsheemmoꞌne.”
15 Hakkiinni ise minise katamu huxxi ledo xaadinse minnoonniha ikkino daafira, maskootete widoonni siiwotenni dirrissunsa. Isinni minise noohu katamu huxxi aanaati.
16 Hakkiinni ise togo yitunsa: “Hordoffanni nooꞌneri affannoꞌnekki gede, ilaallate qooxeessa hadhine sasu barri geeshsha hakko maaxamme. Hordoffannoꞌneri higguhu gedensaanni, doogoꞌne haꞌra dandiitinanni.”
17 Qotaanono togo yituse: “Kulleemmohere assa hoogittaro xaarsiisoottanke xaarora dixaꞌmammeemmo;
18 tenne gobba dangeemmo woyte, tenne duume siiwo ninke dirrisitta maskoote aana rarraasi. Annakkinna amakki hattono roduuwakkinna annikki mini manna baala minekki gamba yaanno gede assa hasiissannohe.
19 Aye manchino minikkinni gobbara fuliro reyosira umisi xaꞌmamanno;* tennera ninke dixaꞌmammeemmo. Ikkollana ate ledo minekki noohura aye manchirano dano iillituro* mundeesira ninke xaꞌmammeemmo.
20 Dangoommo hajo daafira wolootaho kulittaro kayinni xaarsiisoottanke xaarora dixaꞌmammeemmo.”
21 Iseno, “Maahoyye; yitinoonnire asseemmana” yite qoltu.
Hakkiinni haꞌrissunsa; insano hadhu. Hakkunni gedensaanni duume siiwo maskootete rarraasse agurtu.
22 Insano ilaallate qooxeessa hadhe, hordoffannonsari agurte higga geeshsha hakko sase barra keeshshitu. Hordoffannonsarino doogga baalate insa hasse hooggu.
23 Qotaanono ilaallate qooxeessinni dirrite laga tayisse Newe beetti Iyyaasuwa daggu. Ikkino coye baalano isira kultu.
24 Hakkiinni insa Iyyaasu togo yitu: “Yihowa gobba baala angankera sayse uynonke. Isinni hatte gobbara heeꞌranno manni baalu ninkenni kainohunni waajje quubbi yiino.”
Lekkaalliidi Qaagiishshuwa
^ Lawo tayinse saꞌꞌa dandiinanniho diime ikkinokki baychooti.
^ Soojjaati widoonni yaate.
^ Noo gedeenni tirriro, “wodaninke daaqino.”
^ Woy “ammannanni.”
^ Woy “lubbonke reyotenni gatisse.”
^ Woy “Kiꞌnera yineenna lubbonke reytanno.”
^ Noo gedeenni tirriro, “mundeesi umisi aana heedhanno.”
^ Woy “anga kayinsiro.”
