Iyyaasu 3:1-17
-
Israeele Yordaanoosi Laga tayisse saꞌu (1-17)
3 Hakkiinni Iyyaasu soodo gute kai; isinna Israeele* baalanti Shitiiminni kaꞌe Yordaanoosi daggu. Insa widira fultukkinni hakko galtu.
2 Sasu barri gedensaanni, roorrootu qachu giddo doytanni
3 manna togo yite hajajju: “Maganiꞌne Yihowaha gondooru taawoota Leewaawoota ikkitino kakkalaano dukke noota laꞌiniro, hakkawoyintenni baychiꞌnenni kaꞌine taawootu hoode hadhe.
4 Ikkirono taawootuwiinni mite 2,000 cigile* xeertidhe; aye manchino mulisira shiqoonke; hatto assitiniro, konni albaanni kawaanni higgine hadhine egentinoonnikki daafira, hiikkaanni higgine haꞌra hasiissannoꞌnero affinanni.”
5 Iyyaasuno manna, “Gaꞌa Yihowa mereeroꞌne dhagge ikkanno coye assanno daafira, kiꞌneneeto keereensidhe” yii.
6 Hakkiinni Iyyaasu kakkalaano, “Gondooru taawoota dukkine manna balaxxine albaanni higgine hadhe” yiinsa. Konnira kakkalaano taawoota dukke manna balaxxe albaanni hadhu.
7 Yihowano Iyyaasu togo yii: “Muse ledo ikkummonte gede, ate ledono ikkeemmota Israeelete manni baalu afanno gede techonni kayse insa albaanni gotti gotti asseemmohe.
8 Atino Gondooru taawoota dukkino kakkalaano togo yite hajaji: ‘Yordaanoosi way qacce iillitinanni woyte Yordaanoosi giddo heedhinoonniwa uurre.’”
9 Iyyaasuno Israeele, “Kawira daggine Maganiꞌne Yihowa qaale macciishshe” yiinsa.
10 Hakkiinni Iyyaasu togo yiinsa: “Mereeroꞌne heeshshote Magani nootanna isino Kanaanoota, Hitoota, Hiwoota, Ferizoota, Gergesoota, Amooraawootanna Iyyaabuusoota albiꞌnenni shorre hunannota tennenni affinanni.
11 Kuneeti! Baatto baalate Mootichihu gondooru taawooti kiꞌne balaxe Yordaanoosi eanno.
12 Xa Israeelete gaꞌrenni 12 mancho yaano mitte mittente gaꞌrenni mitto mitto mancho doorre;
13 baatto baalate Mootichiha Yihowa Taawoota dukkino kakkalaano lekkansanni Yordaanoosi waa kissanno woyte,* eelallitte lolahanni noohu Yordaanoosi way lolaha agure kofattote* gede ikke uurranno.”
14 Konni daafira, mannu Yordaanoosi tayse saꞌꞌara dunkaanansa diige adhe kaita, taawoota dukkino kakkalaano mannu albaanni hadhu.
15 Taawoota dukkino kakkalaano Yordaanoosi Laga daggutanna lekkansa qaccete noo way giddora eessituta (hatti yanna midote yanna ikkitino daafira midote yannara ikkannonte gede Yordaanoosi Lagi woꞌme qacce fulino),
16 eelallicho lolahanni noo way uurri. Wayno Tsaretaani mule noohu Adaami katamira kofattote* gede ikke uurri; Areba Baariwa yaano Maxinete Baariwa* hige lolahanni noo way mooli. Way moolino daafira mannu laga tayse Iyyaarkote kaꞌaanni sai.
17 Israeelete daga baalanti moola baatto widoonni Yordaanoosi tayisse saꞌa geeshsha, Yihowaha gondooru taawoota dukkino kakkalaano, Yordaanoosi mereero moola baatto aana uurrite keeshshitu.
