Iyyaasu 13:1-33
13 Iyyaasu geedhe mannu aalo ikkanno yanna gambissu. Konnira Yihowa isira togo yii: “Xa ati geedhootto; mannu aalo ikkatto yannano gambissino; ikkollana ragiꞌra* hasiissannoti lowo baatto gatte no.
2 Gattino baatto tenneeti: Filisxeemootunna Geshuurootu qoqqowi baalu,
3 (Gibitsete soojjaatinni kayse aliyyeenni Eqirooni danni geeshsha nooha Kanaanootu qoqqowooti yine hendanni) qoleno Gaaza, Ashidoodi, Asqelooni, Geetinna Eqirooni heedhannoti onte Filisxeemete mootoolla baattonna Awiimi manni baatto tenne gobba widooti;
4 insa heedhannohu wodiidoonniiti; Kanaanootu gobba baala, Sidoonootu xiinxo ikkitinoti Meaara hattono Amooraawootu dannira noohu Afeeqi geeshsha noo qoqqowi,
5 Geebaali baatto baalanna soojjaatoonni noota Libaanoosi baatto baala yaano Hermooni Ilaali hunda noohu Baꞌꞌaali-gaadinni kayse Lebo-hamaati* geeshsha,
6 ilaalaamu qooxeessi Libaanoosinni kayse Misirefoti-maymi geeshsha noo baattora heedhannore baalahonna Sidoonoota baalaho. Insa Israeelete albinni shorreemmo. Atino hajajoommohe garinni baatto Israeelete ragge assite uy.
7 Tenne baatto honse gaꞌreranna Minaase gaꞌre daratira ragge assite beehi.”
8 Gatinohu Minaase gaꞌre darati hattono Roobeeli gaꞌrenna Gaadi gaꞌre, Yihowa soqqamaanchi Muse uynonsa garinni, Yordaanoosira soojjaatoonni raggensa adhitino.
9 Raggensano Arnooni Xeichi* qaccera noohu Aroeerinna Arnooni xeichi mereero noo kataminni kayisse Dibooni geeshsha nooha Medeba xawo baala amaddanno;
10 hattono Hashibooni heeꞌre gashshannohu Amooraawootu moote Sihooni katammanni kayse Amoonootu danni geeshsha,
11 qoleno Giiliyaadi, Geshuurinna Maꞌꞌaakaati qoqqowo, Hermooni ilaala baalanna Baasaani baala Saalka geeshsha,
12 Astaarootinna Ediray heeꞌre gashshannohu Baasaani noohu Oogi gashshooti qoqqowo baala amaddanno. (Jeefote gatinohu Refayami sirchi isooti.) Museno qeele shorrinonsa.
13 Ikkollana, Israeele Geshuurinna Maꞌꞌaakaati manna gobbansanni difushshitino; konni daafira Geshuurinna Maꞌꞌaakaati manni techo geeshsha Israeelete mereero heeꞌranno.
14 Muse ragge uynokkihu Leewi gaꞌrera callaati; Israeelete Magani Yihowa einonsa qaali garinni, isira giirre shiqinshanni kakkalo raggensaati.
15 Hakkiinni, Muse Roobeeli gaꞌrera boosaalli boosaallinsa garinni ragge uyinsa;
16 gashshootinsano Arnooni Xeichi* qaccera noohu Aroeerinni kayse Arnooni xeichi mereero noo katamanna Medeba xawo baala amadanno;
17 Hashibooninna xawoho noo katamma baala, Dibooni, Bamooti-baꞌꞌaali, Beeti-baꞌꞌaali-mioni,
18 Yahaatsi, Qedemooti, Mefaꞌꞌaati,
19 Qiriyataymi, Sibima, xeichu mule* noo ilaali aana noota Tsereeti-shahaari,
20 Beeti-pheoori, Phisiga tulluwa, Beeti-yeshimooti,
21 xawoho noo katamma baala, hattono Hashibooni heeꞌre gashshannoha Amooraawootu moote Sihooni gashshooti qoqqowo baala amadanno; Museno isonna hatte baattora heedhannore Miidiyaami roorroota Eewi, Raaqeemi, Tsuri, Huurinna Reba qeeli. Kuri baalu gobba gashshitannohu, moote Sihoonira gabbartanniiti.
22 Israeele bisetenni shitinori giddo mittu kiilaancho Biioori beetto Beleaamiiti.
23 Roobeeli gaꞌre danni Yordaanoosi Lagaati; Roobeeli gaꞌrera boosaalli boosaallinsa garinni ragge assine uynoonninsa katammanna qachuwa kuriiti.
24 Qoleno Muse Gaadi gaꞌrera boosaalli boosaallinsa garinni ragge uynonsa;
25 gashshootinsano Yaazeeri, Giiliyaadi katamma baala, Raabara albaanni Aroeeri iillitannota Amoonootu baatto darate,
26 Hashibooninni kayse Ramaati-mitsiphanna Bexoniimi geeshsha hattono Mahanayminni kayse Debiiri danni geeshsha noo qoqqowo amadanno;
27 qoleno xeichu giddo* Beeti-haraami, Beeti-nimira, Sukooti, Tsafooninna dannisi Yordaanoosira soojjaatoonni nooha Kineereeti* Baarira woriidi qaccenni hanafe nooha gatinoha Hashibooni moote Sihooni gashshooti qoqqowo baala amadanno.
28 Gaadi gaꞌre boosaalli boosaallinsa garinni katammatenna qachuwante ledo adhitino ragge tenneeti.
29 Qoleno Muse Minaase gaꞌre daratira boosaalli boosaallinsa garinni ragge uyinsa.
30 Gashshootinsano Mahanayminni kayse Baasaani baala, Baasaani moote Oogi gashshooti qoqqowo baala, Baasaani noota Yaiirita dunkaanu qachuwa baala hattono 60 katamma amadanno.
31 Giiliyaadi darate hattono Baasaani noota Oogi gashshooti katamma yaano Astaarootinna Ediray, Minaase beetti Makiiri beetti yaano Makiiri ooso daratira boosaalli boosaallinsa garinni uyni.
32 Muse Yordaanoosira widoonni Iyyaarkote soojjaatoonni, Moaabihu halalli xawira uynonsa ragge tenneeti.
33 Ikkollana Muse Leewi gaꞌrera ragge diuyno. Israeelete Magani Yihowa einonsa qaali garinni, raggensa isooti.
