Iyyaasu 21:1-45
21 Leewaawootu gaꞌre roorrooti kakkalaanchu Aliaazaariwa, Newe beetti Iyyaasuwanna Israeelete gaꞌre roorrootiwa shiqqe,
2 Kanaani gobbara Seelo togo yitunsa: “Yihowa Muse widoonni heeꞌneemmo katammanna saadanke hosiisiꞌneemmo baatto uynanninke gede hajajino.”
3 Konnira Israeele Yihowa hajajino garinni, Leewaawootaho raggensa aaninni kuri katammanna saada hosiisidhanno baatto uytunsa.
4 Hakkiinni hixu Qehaati ayiddira fuli; kakkalaanchu Aarooni sircho ikkitino Leewaawootirano Yihuda gaꞌrenni, Simooni gaꞌrenninna Biiniyaami gaꞌrenni haaꞌne 13 katamma hixunni uyninsa.
5 Gatinohu Qehaati ayiddira Efireemi gaꞌrenni, Daani gaꞌrenninna Minaase gaꞌre daratinni ragge hixunni tonne katamma uytunsa.
6 Gershooni ayiddirano Yisaakoori gaꞌrenni, Aseeri gaꞌrenni, Niftaaleemi gaꞌrenninna Baasaani noote Minaase gaꞌre darati raggenni hixunni 13 katamma uytunsa.
7 Meraari ayiddirano boosaalli boosaallinsa garinni Roobeeli gaꞌrenni, Gaadi gaꞌrenninna Zaabilooni gaꞌrenni 12 katamma uytunsa.
8 Konnira Israeele Yihowa Muse widoonni hajajinonsa garinni, Leewaawootaho kuri katammanna saadansa hosiisidhanno baatto hixunni uytunsa.
9 Yihuda gaꞌrenninna Simooni gaꞌrennino kowiicho suꞌmansa kulloonnita kuri katamma uytinonsa.
10 Kuri katamma Leewaawootu giddonni Qehaati ayidde ikkitinorira Aarooni oosora uynoonni; korkaatuno umi hixi fulinohu insaraati.
11 Insano Yihudaho ilaalaamu qooxeessira noota Qiriyaati-arba (Arba Enaaqi annaati) yaano Kebirooninna qooxeessaho noota saada hosiisiꞌnanni baatto uytunsa.
12 Katamaho noo irshanna qachuwa Yoofooni beetti Kaaleebira ragge assite uytu.
13 Kakkalaanchu Aarooni oosorano lubbo shiino manchira eeggote katama ikkinoha Kebirooni saada hosiisiꞌnanni baatto ledo, Libina saada hosiisiꞌnanni baatto ledo,
14 Yatiiri saada hosiisiꞌnanni baatto ledo, Eshitemoa saada hosiisiꞌnanni baatto ledo,
15 Hoolooni saada hosiisiꞌnanni baatto ledo, Debiiri saada hosiisiꞌnanni baatto ledo,
16 Ayni saada hosiisiꞌnanni baatto ledo, Yuuxa saada hosiisiꞌnanni baatto ledo hattono Beeti-shemeeshi saada hosiisiꞌnanni baatto ledo, xaphoomunni kuri lame gaꞌrenni honse katamma uytunsa.
17 Biiniyaami gaꞌrenni, Gebaooni saada hosiisiꞌnanni baatto ledo, Geeba saada hosiisiꞌnanni baatto ledo,
18 Anaatooti saada hosiisiꞌnanni baatto ledo hattono Almooni saada hosiisiꞌnanni baatto ledo, xaphoomunni shoole katamma uytunsa.
19 Kakkalaanchu Aarooni sirchira xaphoomunni 13 katammanna saada hosiisiꞌnanni baatto uynoonni.
20 Leewaawootu giddonni gatinohu Qehaati ayiddira qole Efireemi gaꞌrenni hixunni katamma uyninsa.
21 Lubbo shiino manchira eeggote katama ikkinoha Efireemihu ilaalaamu qooxeessira nooha Sekeemi saada hosiisiꞌnanni baatto ledo, Gezeeri saada hosiisiꞌnanni baatto ledo,
22 Qibitsaymi saada hosiisiꞌnanni baatto ledo, hattono Beeti-horooni saada hosiisiꞌnanni baatto ledo, xaphoomunni shoole katamma uytunsa.
23 Daani gaꞌrenni, Elteqe saada hosiisiꞌnanni baatto ledo, Gibetooni saada hosiisiꞌnanni baatto ledo,
24 Ayalooni saada hosiisiꞌnanni baatto ledo hattono Gaati-rimooni saada hosiisiꞌnanni baatto ledo, xaphoomunni shoole katamma uytunsa.
25 Minaase gaꞌre daratinni, Taꞌꞌanaaki saada hosiisiꞌnanni baatto ledo hattono Gaati-rimooni saada hosiisiꞌnanni baatto ledo, xaphoomunni lame katama uytunsa.
26 Gatinohu Qehaati ayiddira uynoonni katamma saada hosiisiꞌnanni baatto ledo xaphoomunni tonnete.
27 Leewaawootu sircho ikkitinori Gershooni ayiddirano, Minaase gaꞌre daratinni lubbo shiino manchira eeggote katama ikkinoha Baasaani nooha Goolaani saada hosiisiꞌnanni baatto ledo hattono Beꞌꞌeeshitera saada hosiisiꞌnanni baatto ledo, xaphoomunni lame katama uytunsa.
28 Yisaakoori gaꞌrenni, Qishiyooni saada hosiisiꞌnanni baatto ledo, Dabiraati saada hosiisiꞌnanni baatto ledo,
29 Yarmuuti saada hosiisiꞌnanni baatto ledo hattono Eni-ganiimi saada hosiisiꞌnanni baatto ledo, xaphoomunni shoole katamma uytunsa.
30 Aseeri gaꞌrenni, Mishiaali saada hosiisiꞌnanni baatto ledo, Abidooni saada hosiisiꞌnanni baatto ledo,
31 Helqaati saada hosiisiꞌnanni baatto ledo hattono Rehoobi saada hosiisiꞌnanni baatto ledo, xaphoomunni shoole katamma uytunsa.
32 Niftaaleemi gaꞌrenni, lubbo shiino manchira eeggote katama ikkinoha Galiilaho nooha Qaadeeshi saada hosiisiꞌnanni baatto ledo, Hamooti-doori saada hosiisiꞌnanni baatto ledo hattono Qartaani saada hosiisiꞌnanni baatto ledo, xaphoomunni sase katamma uytunsa.
33 Gershooni ayidditi xaphoomunni 13 katammaatinna saada hosiisiꞌnanni baattooti.
34 Meraari ayidde ikkitinorira gattino Leewaawootira qole Zaabilooni gaꞌrenni, Yoqineaami saada hosiisiꞌnanni baatto ledo, Qaarta saada hosiisiꞌnanni baatto ledo,
35 Diimina saada hosiisiꞌnanni baatto ledo hattono Nahalaali saada hosiisiꞌnanni baatto ledo, xaphoomunni shoole katamma uytunsa.
36 Roobeeli gaꞌrenni, Beetseeri saada hosiisiꞌnanni baatto ledo, Yahaatsi saada hosiisiꞌnanni baatto ledo,
37 Qedemooti saada hosiisiꞌnanni baatto ledo hattono Mefaꞌꞌaati saada hosiisiꞌnanni baatto ledo, xaphoomunni shoole katamma uytunsa.
38 Gaadi gaꞌrenni qole lubbo shiino manchira eeggote katama ikkinoha Giiliyaadi nooha Raamooti saada hosiisiꞌnanni baatto ledo, Mahanaymi saada hosiisiꞌnanni baatto ledo,
39 Hashibooni saada hosiisiꞌnanni baatto ledo hattono Yaazeeri saada hosiisiꞌnanni baatto ledo, xaphoomunni shoole katamma uytunsa.
40 Gattino Leewaawootira yaano Meraari ayiddira hixunni uynoonninsa katamma xaphoomunni tonaalamete.
41 Israeelete ragge mereero nooti Leewaawootu katamma, saada hosiisidhanno baatto ledo xaphoomunni 48 katammaati.
42 Kuri katamma baalate, mittu mittunku katami qooxeessira saada hosiisiꞌnanni baatto no.
43 Konnira, Yihowa Israeelete aara annuwansara xaarino baatto gudise uyinsa; insano baatto ragidhe hakko heeꞌra hanaffu.
44 Qoleno Yihowa annuwansara xaarino garinni, teesse heedhanno gede assino. Diinnansa giddonni albansaanni uurrara dandiinohu mittuno dino. Yihowa diinnansa baala angansara sayse uyno.
45 Yihowa Israeelete minira uynote dancha hexxo* giddo woꞌmitukkinni gattinoti mitteno dino; baalanti woꞌmitino.
Lekkaalliidi Qaagiishshuwa
^ Woy “qaali.”
