SOSKE TANO VAŽNO: But džene taro adala so na dikhena na osetinena pe šukar te keren lafi manušencar so na pendžarena len. Adaleske, valjani te sikljova sar pošukar te svedočina akale manušenge. O Jehova mangipaja grižinela pe e manušenge so na dikhena (3Mo 19:14). Šaj te dža palo leskoro primer agjaar so ka kera nešto te pomožina lenge te doznajnen poviše baši leste.

SAR TE KERA ADAVA:

• Rode kote isi manuša so na dikhena (Mt 10:11). Dali džanea nekas so isi len ki familija manuš so na dikhela? Dali ko tumaro podračje isi škole, domija phurenge ili javera objektija so bi mangena te len publikacie kerde manušenge so na dikhena?

• Sikav iskreno interes. Ako ponašinea tut amalikane hem ako sikavea interes e manušenge so na dikhena, ola ka osetinen pe poslobodna te keren tuja lafi. Trudin tut te počmine razgovor baši tema so interesinela len.

• Pomožin lenge te doznajnen poviše bašo Jehova. Te šaj te pomožinel pe okolenge so na dikhena ili so slabo dikhena, amari organizacija kergja literatura ko različno formati. Puč sekole posebno ko kova način leske polokho te sikljol. O nadgledniko baši služba mora te proverinel dali o sluga baši literatura naračingja o ispravno formati, kova so rodela o manuš so na dikhela.