O Obedineta nacie (ON) pottikninena sa e manušen te sorabotinen maškar peste, te poštujnen o manušikane pravija hem te trudinen pe te zaštitinen amari planeta. Soske? Adaleske so ko spisanie UN Chronicle o Maher Naser pišingja: „O klimatska promene, o organizirimo kriminal, o akošibe maškar o manuša, o nesoglasuvanja, adava so but selinena pe o manuša, o baro terorizam, o zarazna nasvalipa hem javera slična zakane vlijajnena but upro manuša hem na čhinavena“.

Javera gele doborom dur so mangle te keren jekh svetsko vlada. Maškar lende sine o italijansko filozofi, poeti hem državniko o Dante Aligeri (1265-1321) hem isto o fizičari Albert Ajnštajn (1879-1955). O Dante mislingja kaj našti te ovel mir zasekogaš ko sveto koleste so non-stop isi politička podelbe. Ov citiringja adava so vakergja o Isus Hristos: „Sekova carstvo soj podelimo, ka propadinel“ (Luka 11:17).

Kratko otkeda završingja i Dujto svetsko vojna, ki koja sine frdime duj atomska bombe, o Albert Ajnštajn pišingja pismo dži ko Generalno sobranie ko ON. Ov vakergja: „O Obedineta nacie valjani sigate te keren sa soj potrebno baši e manušengiri bezbednost agjaar so ka keren jekh nevi svetsko vlada“.

Dali šaj te ova sigurna kaj o političarija, kola so bi ovena delo tari asavki mokjno vlada, nane te len mito, nane te mučinen e manušen hem sekogaš ka oven sposobna te vladinen e manušencar? Kotar džanaja kaj nane te oven len asavke lošna osobine sar so isi buten dži akana? Akala pučiba setinkerena amen ko lafija e britansko istoričareskere o Akton, kova so vakergja: „I vlast ruminela, a i celosno vlast celosno ruminela“.

Ama ako o manuša mangena te ovel len mir hem sloga mora te oven ko jekhipe. Ama sar šaj te ovel adava? Dali šaj te ovel nešto asavko? I Biblija vakerela kaj šaj. Adaja cel šaj te ostvarinel pe hem ka ovel ostvarimi. Ama sigurno adaja cel nane te ostvarinel la nesavi svetsko vlada ki kolate so isi političarija so lena mito, nego adava ka kerel le e Devleskiri vlada. Ustvari, preku late ov ka vladinel sa e stvorime bukjencar soske isi le celosno pravo bašo adava. Savi tani adaja vlada? I Biblija baši late vakerela kaj tani e Devleskoro Carstvo (Luka 4:43).

O Isus Hristos mislingja ko e Devleskoro Carstvo keda ki primer molitva vakergja: „Te avel tlo Carstvo. Te ovel tli volja... ki phuv“ (Matej 6:9, 10). Keda ka vladinel e Devleskoro Carstvo ka kerel pe e Devleskiri volja, a na i volja e sebično manušengiri kola soj tane alčna baši vlast.

Akava Carstvo isto agjaar tano pendžardo sar „nebesno Carstvo“ (Matej 5:3). Soske? Iako ka vladinel upri phuv, ov nane te vladinel tari phuv, nego taro nebo. Razmislin so značinela akava. Adaja vlada nane te rodel hem nane te valjanel lake nisavi materijalno hem finansisko poddrška. Tegani ka ovel lokho sa e manušenge ki phuv.

Adava so baši akaja vlada vakeraja Devleskoro Carstvo, sikavela kaj kerela pe lafi baši jekh vlada kolate so isi cari. Adava Cari tano o Isus Hristos hem ov dobingja adaja vlast taro Devel. Bašo Isus i Biblija vakerela:

• „I vlast tani ko leskere vasta... Nane te ovel krajo bašo adava kobor ka bajrol leskiri vlast hem kobor ka ovel baro mir“ (Isaija 9:6, 7, King James Version).

•   „Leske sine dendi vlast, čest, hem carstvo, te služinen leske sa o narodo, plemija hem čhibja. Leskiri vlast... nikogaš nane te nakhel“ (Daniel 7:14).

• „I carsko vlast upro sveto akana pripadinela amare gospodareske [e Devleske] hem leskere Hristoseske“ (Otkrovenie 11:15).

Sprema i primer molitva e Isuseskiri, e Devleskoro Carstvo celosno ka kerel e Devleskiri volja ki phuv. Keda ka vladinel akava Carstvo, sa o manuša ka sikljon sar te grižinen pe e planetake koja so ka ovel obnovimi hem pherdi životoja.

A soj najvažno taro sa, keda ka vladinel e Devleskoro Carstvo sa o manuša ka oven sikavde bašo ista merilija. Sarine ka oven složna hem maškar lende nane te oven podelbe. Ko Isaija 11:9 pišinela: „Poviše nane te kerel pe lošnipe, hem nane te kerel pe šteta, soske i phuv ka ovel pherdi pendžaribaja bašo Jehova, sar o more soj pherdo panjea“ (Isaija 11:9).

Sa o manuša taro celo sveto ka oven ko jekhipe hem ka živinen ko mir jekh jekhea. Baš adava mangle te keren o Obedineta nacie avdive. Ko Psalm 37:11 pišinela: „Ka uživinen ko baro mir“. Vremea o lafija sar soj kriminal, zagaduvanje, čorolipe hem vojne nane te postojnen. Ama keda ka ovel adava? Keda hem sar e Devleskoro Carstvo ka vladinel upri celi phuv? Hem so šaj adava te značinel tuke? O odgovor ka dikha le ki javer statija.