50 YACHACHIKUY
¿Imatan ruwana familiapi kusisqa kausanapaq? (Iskay kaq)
Wawakunaqa Jehová Diospa regalonmi. Chaymi payqa munan tayta-mamakuna wawankuta allinta uywanankuta, chayta ruwanankupaqtaq tayta-mamakunaman imaymana consejokunata qon. Diosqa wawakunamanpas imaymana consejokunatan qon, chhaynapi familiapi kusisqa kausay kananpaq.
1. ¿Ima consejokunatan Jehová Dios qon tayta-mamakunaman?
Jehová Diosqa munan tayta-mamakuna wawankuta munakunankuta, paykunawan kanankupaq tiempota t’aqanankuta, ima sasachakuypi tarikuqtinkupas yanapanankuta iman. Chaymantapas Bibliaq nisqanman jinapuni wawankuta uywanankutan munan (Proverbios 1:8). Familiapi umalliqkunatan Biblia nin: “Wawaykichista [...] sumaqta uywaychis Jehová Diospa nisqanman jina [...] yachachispa”, nispa (leey Efesios 6:4). Arí, Jehová Diosqa munan tayta-mamakuna paykuna kikinku wawankuta Bibliaq nisqanman jina yachachinankutan, manan munanchu jujkunaq makinman saqerparinankutaqa.
2. ¿Wawakuna imayna kanankutan Jehová Dios munan?
Wawakuna, Jehová Diosqa munan “tayta-mamaykichista tukuy imapi kasukunaykichistan” (leey Colosenses 3:20). Sichus juj wawa taytantapas, mamantapas kasukunqa, respetanqa chayqa, kusisqan chay tayta-mamaqa kanqa, Jehová Diospas kusikunqan (Proverbios 23:22-25). Jesuspas mana imapi pantaqña karqan chaypas, respetarqan kasukurqan iman juchapi naceq tayta-mamantaqa (Lucas 2:51, 52).
3. ¿Imatan ruwananku taytakunapas wawakunapas Jehová Diosman astawan asuykunankupaq?
Wawaykikuna kan chayqa maytachá munanki paykunapas qan jina Jehová Diosta munakunankuta. Ichaqa, ¿imatan chaypaq ruwawaq? Bibliaq nisqantan kasukunayki, “sapa kutillanmi chaykunata [Jehová Diospa nisqanta] wawaykikunaman yachachinayki, rimapayashanallaykipunin wasipi kaspapas, ñanpi purishaspapas” (Deuteronomio 6:7). Wawakunaqa manan jujllapichu mayninqa imatapas entiendenku, chaymi sapa kutillan yuyarichishana. Chhaynan Diospa siminwanpas kanan, sapa p’unchaymi imay ratupas chay simikunata yuyarichina, yachachina ima. Chaymantapas sapa semanan, semanapi juj kutita tiempota t’aqana familiantin Diosta adoranapaq, chaypin llapallaykichis Bibliata estudianaykichis. Manaña wawakuna kanmanchu chaypas Bibliata estudianapaqqa t’aqanapunin tiempotaqa, chhaynapin astawan Diosta munakusun.
ASTAWAN YACHASUNCHIS
Kunanqa yachasun ima consejokunas familiakunata yanapanman kusisqa kausanankupaq chayta.
4. Wawaykichista munakuywan yachachiychis
Wawakunata yachachiyqa sasan, ichaqa Biblian yanapawasun paykunata imaynata yachachinanchispaq. Leeychis Santiago 1:19, 20 textota, jinaspa jamuq tapuykunaman jina parlariychis:
-
¿Imaynatan tayta-mamakuna wawanku munakusqankuta rikuchinkuman paykunawan rimaspa?
-
¿Imaraykun juj tayta mana wawanta wanachinanchu phiñasqa kashaspa? a
5. Wawaykichista allinta cuidaychis
Wawaykichista allinta cuidanaykichispaqqa confianzawanmi paykunawan rimanaykichis warmi-qhari puñuymanta. P’enqakusunmanña chaykunamanta rimayta chaypas rimananchispunin. VIDEOTA qhawaychis, jinaspa jamuq tapuykunaman jina parlariychis:
-
¿Imaraykun wakin tayta-mamakunapaq sasa wawankuwan warmi-qhari puñuymanta rimay?
-
¿Iman yanaparqan wakin tayta-mamakunata warmi-qhari puñuymanta wawankuwan rimanankupaq?
Bibliaq nisqan jina, tukukuy p’unchaykunapiñan kashanchis, chaymi runakunaqa aswan millayman tukupushanku. Leeychis 2 Timoteo 3:1, 13 textota, jinaspa jamuq tapuykunaman jina parlariychis:
-
Versículo trecepin rimashan sinchi millay runakunamanta, chay runakunamanta wakinninkuqa erqechakunatan violanku. Chhaynaqa, ¿allintachu tayta-mamakuna ruwashankuman warmi-qhari puñuymanta wawankuwan rimaspa? ¿Imatan ruwananku violador runakunamanta wawankuta cuidanankupaq?
¿Yacharqankichu?
Jehová Diospa testigonkunaqa askha yanapaykunatan orqomurqanku tayta-mamakuna wawankuwan warmi-qhari puñuymanta rimanankupaq, chhaynapi wawankuta violadorkunamanta cuidanankupaq. Wakin yanapaykunan kaykuna:
-
Wawaykichista cuidaychis (video)
-
¿Imaynatan wawaykita rimapayawaq warmi-qhari puñuymanta? (¡Rijch’ariy!, 2016 watapi núm. 4)
6. Wawakuna, tayta-mamaykichista respetaychis
Wawakunaqa respetanankun tayta-mamankuta, chaytaqa rikuchinqaku imaynatachus rimapayasqankupin. VIDEOTA qhawaychis, jinaspa jamuq tapuykunaman jina parlariychis:
-
¿Imaraykun wayna-sipaskuna respetowan tayta-mamankuta rimapayananku?
-
¿Imaynatan wayna-sipaskuna rikuchinkuman tayta-mamanku respetasqankuta?
Leeychis Proverbios 1:8 textota, jinaspa jamuq tapuyman jina parlariychis:
-
¿Imatan juj waynapas juj sipaspas ruwanan taytanpas mamanpas imata ruwananpaqpas kamachiqtin otaq yuyaychaqtin?
7. Bibliata estudianaykichispaq tiempota t’aqaychis
Jehová Diospa testigonkunaqa sapa semanan, semanapi juj kutita familiantin Diosta adoranku. ¿Imaynatan chayta ruwanku? VIDEOTA qhawaychis, jinaspa jamuq tapuykunaman jina parlariychis:
-
¿Iman yanapawasunman sapa semana familiantin Diosta adoranapaq?
-
¿Imatan tayta-mamakuna ruwankuman familiantin Diosta adorasqankupi ama wawakuna aburrikunankupaq? (Qallariypi fotota qhaway).
-
Manaraqchus familiantin Dios adorayta sapa semanan aparishankichis chayqa, ¿iman jark’ashasunkichisman?
Israel runakunatan Jehová Dios kamachirqan wawankuman Bibliaq nisqanmanta yachachinankupaq. Leeychis Deuteronomio 6:6, 7 textota, jinaspa jamuq tapuyman jina parlariychis:
-
¿Imaynatan kay textoq nisqanta kasukuwaq?
Yaqapaschá kaykunata ruwawaqchis:
-
Juñunakuykunapaq preparakuychis.
-
Bibliata leeychis, jinaspa imachus yachasqaykichismanta rimaychis.
-
Juch’uyllaraq wawaykikuna chayqa, jw.org nisqapi wawakunapaq nisqamanta copiata orqoy.
-
Wayna-sipaskunaña wawaykikuna chayqa jw.org nisqapi wayna-sipaskunapaq jina juj yachachikuyta ajllay.
-
Bibliapi kaq willakuykunamanta actuacionta jina ruwaychis.
-
jw.org nisqapi videokunata qhawaychis, jinaspa imachus yachasqaykichismanta rimaychis.
WAKIN RUNAKUNAN NINKU: “Sasan Bibliaq nisqanta wawakunaman yachachiyqa”, nispa.
-
Personaykiri, ¿imaninkitaq?
IMATAN YACHAMURQANCHIS
Jehová Diosqa munan tayta-mamakuna wawankuta munakunankuta, yachachinankuta, cuidanankuta iman. Wawakunamantataq munan tayta-mamankuta respetanankuta kasukunankuta ima. Chaymantapas Jehová Diosqa munan llapa familiantin payta adoranankutan.
Yuyarisun
-
¿Imaynatan tayta-mamakuna wawankuta cuidananku yachachinanku?
-
¿Imaynatan wawakuna rikuchinkuman tayta-mamanku respetasqankuta?
-
¿Imapin yanapawasunman semanapi juj kutita familiantin Diosta adoray?
ASTAWAN YACHANAYKIPAQ
¿Imakunan wawaykita yanapanman allin runa kananpaq? Chaymantan kay qelqapi yachanki.
“Wawakunapaq soqta yachachikuykuna” (¡Rijch’ariy!, 2019 watapi núm. 2)
Kaypin kashan imaynatachus kuraq runakunata cuidana chaypaq yanapaykuna.
“¿Imaninmi Dios edadniyoq tayta-mamanchista cuidaymanta?” (jw.org paginapi leey)
Juj runan mana yachasqachu wawankuna imayna uywayta, ichaqa Bibliaq yanapayninwanmi allin tayta kapusqa. Chaymantan kay videopi willashan.
Diosmi yachachiwarqanku wawaykuta allinta uywanaykupaq (5:58)
¿Imatan juj tayta ruwarqan wawankunawan allinta entiendenakunanpaq? Chaymantan kay qelqapi yachanki.
a Bibliapi wanachiymanta rimaspaqa manan k’aminamantachu, p’ananamantachu rimashan, aswanpas sumaqta yuyaychanamanta correginamanta iman rimashan (Proverbios 4:1).
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
