Kichay leenaykipaq

Índice nisqaman riy

 10 CAPÍTULO

¿Pin supaykunamanta aswan atiyniyoq?

¿Pin supaykunamanta aswan atiyniyoq?

¿IMARAYKUN juj angél Satanasman tukupuran? ¿Yuyashanki?... Arí, llapa runakunaq adoranantan munaran, chaymi Diospa contranpi jatariran. ¿Kanchu juj angelkuna pay jina millaykunata ruwaq?... Arí, kanmi. Paykunatan Biblia sutichan Satanaspa ‘angelninkuna’ otaq supaykuna nispa (Apocalipsis 12:9).

¿Creenkuchu Diospi chay angelkuna?... Biblian nin: ‘Supaykunaqa creenkun Dios kasqanta’, nispa (Santiago 2:19). Ichaqa manchakunkun Diosta. ¿Imarayku? Mana allin ruwasqankumanta castigasqa kanankuta yachasqankurayku. ¿Imatan ruwaranku?...

Chay angelkunaqa janaq pachapin tiyaranku. Ichaqa runaman tukuspan kay allpaman jamuranku. Munay warmikunata rikuspan paykunawan puñuyta munaranku (Génesis 6:1, 2;  Judas 6). ¿Imatan yachanki warmi-qhari puñuymanta?...

Chayqa juj warmiwan juj qhariwan puñuspa sumaqta juñukusqankun. Chay juñukusqankumantan juj wawa paqarin, jinan mamanpa wijsanpi wiñan. Diosqa munan casarasqakunalla chhaynata juñukunankuta. ¿Imarayku? Iskayninkumanta wawata cuidanankupaq. Chhayna juñukuyqa manan angelkunapaqchu karan.

¿Imatan kay angelkuna ruwaranku?

Chay angelkuna warmikunawan puñusqanku qhepamanmi wawanku naceran. Paykunan wiñaspa jatunkaray runakuna karanku. Ichaqa millaymi karanku, nishutan runakunata ñak’arichiqku. Chaymi Diosqa jatun parata parachimuran llapa millay runakunata wañuchinanpaq. Ichaqa Noé runatan kamachiran jatun arcata ruwananpaq. Chay arcapin Diosta kasukuq runakuna salvakuranku. Jesusmi niran Noepa tiemponpi sucedesqanta yuyarinapaq (Génesis 6:3, 4, 13, 14; Lucas 17:26, 27).

 ¿Imatan ruwaranku millay angelkuna?... Aycha cuerponkuta saqespan janaq pachaman kutipuranku. Ichaqa manañan Diospa angelninchu kapuranku. Aswanmi Satanaspa angelninkuna kapuranku. ¿Chay angelkunaq wawankunari?... Paykunaqa llapa millay runakunawan kuskan wañupuranku.

¿Imaraykun sinchi sasachakuykuna kashan?

Chay p’unchaymantapachan angelkunaqa manaña atirankuchu runaman tukuyta. Diosmi chay atiyta qechupuran, chaymi kunanqa manaña paykunata rikunchischu. Jinaspapas Diosmi paykunata kay pachaman wijch’uykamuran. Chaymi mana allinkunata kay pachapi ruwashanku.

¿Imaraykun supaykunata mana rikunchischu?... Arí, espíritu cuerpoyoqmi kanku. Paykunan ichaqa rikuwashanchis. Biblian nin: ‘Satanasqa supaykunawan kuskan pachantinpi runakunata pantachishan’, nispa (Apocalipsis 12:9, 12).

¿Engañawasunmanchu chay espiritukuna?... Arí, mana cuidakusun chayqa engañawasunmi. Ichaqa manan paykunata manchakunachu. Jesusmi niran: ‘Satanasqa manan imanaytapas atiwanmanchu’, nispa. Dioswan kasun chayqa, paymi Satanasmanta supaykunamantapas cuidawasun (Juan 14:30).

¿Imakuna ruwananchistan Satanás munan? ¿Imakunatan supaykuna ruwaranku kay allpaman jamuspa?... Arí, warmikunawanmi puñuranku. Supaykunaqa kusikunkun warmipas qharipas mana casado kashaspa puñuqtinku. ¿Pikunallan chaytaqa ruwankuman?... Arí, casarasqakunallan.

Kay tiempopiqa askha wayna-sipaskunan puñunku mana casado kashaspa. Chayqa juchan. Biblian qharikunaq partechanta nin: “Qhari-kaynin”, nispa (Deuteronomio 23:1). Warmikunaq partechantataq: “Warmi-kaynin”, nispa. Chaykunatan  Dios runakunaman qoran casarakuspa munayta juñukunankupaq. Ichaqa supaykunan kusikunku juj erqecha juj chikachaq warmi kayninwan pujllaqtin. ¿Munanchischu supaykunaq kusikunanta?...

¿Imakuna ruwananchistawanmi supaykuna munanku?... Juj runakunata maqananchista wañuchinanchista iman (Salmo 11:5). Chaytan supaykunaq wawankunapas ruwaranku. Diosqa manan munanchu chaykuna ruwananchista.

Chaymantapas supaykunaqa runakunata manchachispan kusikunku. Chaypaqmi wañupuq runaman tukuspa paykuna jina rimanku. Chayta uyarispan wakin runakuna ninku: “Wañupuqpa almanmi purishan”, nispa. Chaymi askha runakuna creenku condenadokunapi.

Noqanchisqa manapunin Satanaswan supaykunawanpas engañachikunanchischu. Biblian nin: ‘Kikin Satanasmi pasachikun  allin angelmanta, payta serviqkunapas allin ruwaqmanmi tukunku’, nispa (2 Corintios 11:14, 15). Ichaqa llapallankun millay kanku. Paykuna jina kananchistan munankupas. ¿Imatan chaypaq ruwanku?

¿Imaynapin runakuna yachanku jujwan puñuyta, maqanakuyta, condenadokunamantapas?... Arí, televisionta, videokunata, librokunata, internet-ta ima qhawaspan. Chaykunata qhawaspa, ¿Diospa amigonchu kasun icha supaykunaq amigonchu? ¿Ima ninkin qan?...

¿Iman pasanman maqanakuqkunata qhawaqtinchis?

¿Pikunan munanku mana allinkunata uyarinanchista qhawananchistapas?... Arí, Satanás supaykuna iman. Chhaynaqa, ¿imatan ruwananchis?... Allinninchispaq kaqkunatan leenanchis, uyarinanchis, qhawananchispas. Chaykunan yanapawasun Diosta servinapaq. ¿Imakunatan leesunman, uyarisunman otaq qhawasunman?...

¿Ima allinkunatan ruwananchis?

Allin kaqkunata ruwasun chayqa manan supaykunata manchakusunchu. Jesusmi paykunamantaqa aswan atiyniyoq. Juj kutinmi supaykuna Jesusta manchasqa tapuranku: “¿Wañuchiwaqniykuchu jamushanki?”, nispa (Marcos 1:24). Supaykuna wañupuqtinqa maytachá kusikusun ¿riki?... Chay p’unchay chayamunankaman Jesús paykunamanta cuidawasun. Chaypaqmi ichaqa papanta paytawan kasukushanallanchis.

¿Imakunatan ruwasunman Satanasmanta supaykunamantapas cuidakunapaq? Chaypaq leesun 1 Pedro 5:8, 9; Santiago 4:7, 8.