Kichay leenaykipaq

Índice nisqaman riy

49 YACHACHIKUY

¿Imatan ruwana familiapi kusisqa kausanapaq? (Ñaupaq kaq)

¿Imatan ruwana familiapi kusisqa kausanapaq? (Ñaupaq kaq)

Pipas casarakuqqa may kusisqan casarakun, paykunaqa tukuy tiempon chhayna sumaq kausakuyta munanku. Ichaqa, ¿atikunmanchu chay? Arí, atikunmanmi. Unayña casarasqa kaqkunaqa allintan chayta yachanku, paykunaqa Bibliaq nisqanman jina imatapas ruwaspan sumaqta kausakushanku.

1. ¿Imaninmi Biblia qosakunata?

Jehová Diosqa qosakunatan churarqan familiankuta umallinankupaq (leey Efesios 5:23). Payqa qosakuna familiankurayku imatapas allinta ruwanankutan munan. Bibliapin nishan: “Qosakuna, esposaykichista munakuychis”, nispa (Efesios 5:25). ¿Imaninanmi chay? Munakuq qosaqa munaytan esposanta qhawarin; wasipiña kaspapas maypiña kaspapas sumaqtan rimapayan. Chaymantapas munaytan rikun, manan faltachinchu mijunantapas ni imatapas, llakipi kaqtinpas munaytan kallpacharin (1 Timoteo 5:8). Astawanqa Jehová Diosta kusisqa servinanpaqmi yanapan (Mateo 4:4). Paywan kuskan Diosmanta mañakun, Bibliatapas kuskan leenku. Sichus juj qosa munayta, cariñowan esposanta uywanqa chayqa, Jehová Dioswanpas allinpin kanqa (leey 1 Pedro 3:7).

2. ¿Imaninmi Biblia esposakunata?

Bibliapin nishan: “Esposakuna, qosaykichista anchata respetaychis”, nispa (Efesios 5:33). ¿Imaynatan juj esposa chayta ruwanman? Chaypaqqa yaqapaschá piensanman qosanpa allinkuna ruwasqanpi, munakuq kasqanpi, paytapas wawankunatapas sumaqta uywananpaq kallpachakusqanpi ima. Chaymantapas imatachus qosan ruwayta munashan chaypin yanapanan, sumaqtan rimapayanan. Manan qosanmantaqa mana allintaqa rimananchu, manaña Jehová Diosta servinmanchu chaypas.

3. ¿Imatan iskayninku ruwananku sumaqta kausanankupaq?

Casarasqakunamantan Biblia nin: “Iskayninkutaq juj aychalla kapunqaku”, nispa (Mateo 19:5). Chaypaqqa manan imatapas karunchanakunankupaq jinaqa ruwanankuchu. Aswanmi tiempota t’aqananku kuska kanankupaq; imachus piensasqankuta, imaynachus tarikusqankutapas sumaqta, confianzawan willarinakunankupaq. Chaymantapas manan mayqenninkupas jujwanqa nishu confianzaqa kananchu, manataqmi jujmanqa nishu atenciontaqa churananchu.

ASTAWAN YACHASUNCHIS

Kunanqa yachasun Bibliapi mayqen textokunas casado kausayniykipi yanapasunkiman chayta.

4. Qosakuna, esposaykichista munakuychis sumaqta qhawariychis

Bibliapin nishan: “Qosakunapas kikin cuerponkuta jinan esposankuta munakunanku”, nispa (Efesios 5:28, 29). ¿Imaynatataq chaytari ruwana? VIDEOTA qhawaychis, jinaspa jamuq tapuyman jina parlariychis:

  • ¿Imaynatan juj qosa esposan munakusqanta rikuchinman?

Leeychis Colosenses 3:12 textota, jinaspa jamuq tapuyman jina parlariychis:

  • ¿Imaynatan juj qosa rikuchinman chay textopi nisqanta?

5. Esposakuna, qosaykichista munakuychis jinallataq respetaychis

Bibliaq nisqanman jinaqa, esposakunaqa respetanankun qosankuta, qosan iñiq runaña kanman manaña chaypas. Leeychis 1 Pedro 3:1, 2 textota, jinaspa jamuq tapuykunaman jina parlariychis:

  • Manachus qosayki Jehová Diosta servin chayqa, maytachá munanki qanwan kuska servinanta. ¿Imaynatan payta yanapawaq: sapa ratu Diosmanta willaspachu, icha allinta portakuspachu, respetowan qhawarispachu? ¿Imaraykutaq chhaynata ninki?

Casarasqa warmi-qharikunaqa kuskamanta rimanarikuspan imatapas ruwananku. Mayninqa yaqapaschá esposaqa mana acuerdopichu kanqa qosanwan. Chhayna kaqtinqa respetowanmi qosanta rimapayanan. Yuyarinanmi, qosantan Jehová Diosqa familianta umallinanpaq churarqan. Chaymi esposaqa tukuy atisqanta kallpachakunan qosanta yanapananpaq. Chhaynapin familiankupi munay kausay kanqa. Leeychis 1 Pedro 3:3-5 textota, jinaspa jamuq tapuyman jina parlariychis:

  • ¿Imaynatan Jehová Dios qhawarinman qosan respetaq esposakunata?

6. Ima problemapas allichay atiyllan

Warmi-qhari kausaypiqa kanqapunin sasachakuykunaqa. Kuskamantan chaykunataqa sumaqta allichana. VIDEOTA qhawaychis, jinaspa jamuq tapuykunaman jina parlariychis:

  • ¿Imaraykun nisunman “videopi qhawasqanchis warmi-qhariqa karunchanakapusharqankun” nispa?

  • ¿Imatan ruwarqanku jujmanta jujllachanakapunankupaq?

Leeychis 1 Corintios 10:24; Colosenses 3:13 textokunata, chaymantataq sapanka versiculomanta jamuq tapuyman jina parlariychis:

  • Casarasqakuna chay textoq nisqanta kasukunqaku chayqa, ¿imaynan casado kausayninku kanqa?

Bibliapin nishan imaynas sapanka respetanakunanchis chayta. Chaypaqqa munakuywan respetowan iman jujkunata rimapayananchis. Leeychis Romanos 12:10 textota, jinaspa jamuq tapuykunaman jina parlariychis:

  • ¿Nisunmanchu “jujninraqmi respetanan chhaynapi juj kaqpas respetananpaq” nispa? ¿Imaraykutaq chhaynata piensanki?

WAKIN RUNAKUNAN NINKU: “Noqaykuqa manan ñaupaqpi jinañachu kausayku, manan munakuy kapunñachu”, nispa.

  • ¿Imaynatan paykunaman willawaq imaynas Bibliaqa yanapanman chayta?

IMATAN YACHAMURQANCHIS

Casado kausaypi sumaqta kausanapaqqa munanakunan, respetanakunan, chaymantapas Bibliapi yuyaychaykuna kasqantan kasukuna.

Yuyarisun

  • ¿Imatan qosa ruwanan casado kausayninpi sumaq kausay kananpaq?

  • ¿Imatan esposa ruwanan sumaq kausay kananpaq?

  • Casarasqa kashanki chayqa, ¿ima textokunan yanapasunkiman juj sonqolla sumaqta kausanaykichispaq?

Kayta ruway

ASTAWAN YACHANAYKIPAQ

Kay qelqapin astawan yanapayta tarinki familiantin kusisqa kausanaykipaq.

Familiaykiwan kusisqa kausakuy (Folleto)

Kaypin kashan videopi taki, chaypi nisqanman jina, casarasqakunachus Bibliaq nisqanta kasukunqaku chayqa kusisqan kausanqaku.

Maytan munakuyki urpicháy (4:26)

Kaypin yachanki imaynatachus qosata respetana chayta.

“¿Imaraykun warmikuna kasukunanku qosankuta?” (Qhawaq, 2010 watapi 15 mayo)

Kaypin yachanki imaynatas casarasqakunata Bibliapi kaq yuyaychaykuna yanapanman chaymanta.

Biblian casado kausayniykupi yanapawarqanku (7:12)