Kichay leenaykipaq

Índice nisqaman riy

11 YACHACHIKUY

¿Iman yanapasunkiman Bibliata allinta estudianaykipaq?

¿Iman yanapasunkiman Bibliata allinta estudianaykipaq?

Wasita jatarichinapaqqa imaymanatan ruwana ¿riki? Qallariypiqa sasapaschá kanman, ichaqa pisi-pisimanta llank’aspaqa atillawaqmi wasi ruwaytaqa. Chhaynallataqmi Bibliata leeypas. Qallariypiqa sasapaschá kanman, manapaschá yachasunmanchu maymanta qallariytapas. Chayraykun kunan yachasunchis Bibliata imayna leenamanta imayna estudianamantapas.

1. ¿Imaraykun sapa p’unchay Bibliata leenanchis?

Bibliapin tarikun “Jehová Diospa kamachikuyninkuna”. Sichus chayta sapa p’unchay leesunchis chayqa, kusisqan kasunchis, ima ruwasqanchispas allinmi kanqa (leey Salmos 1:1-3). Chayrayku kallpachakuy sapa p’unchay juj ratullapas Bibliata leenaykipaq. Chhaynapin pisi-pisimanta Biblia leey gustasunki.

2. ¿Imatan ruwanayki Biblia leey vidaykipi yanapanasuykipaq?

Bibliataqa manan leeyllachu leenanchis, aswanpas chay leesqanchispin allinta “piensananchis”, chhaynapin allinninchispaq kanqa (Josué 1:8). Bibliata leeshaspaqa tapukunanchismi: “¿Imatan kay leesqay Jehová Diosmanta yachachiwan? ¿Imaynatan chay yanapawanman? ¿Imaynatan chaywan jujkunata yanapayman?”, nispa.

3. ¿Ima ratukunapin Bibliata leewaq?

Qallariypiqa sasapaschá kanman Bibliata leenapaq tiempota orqoy. Ichaqa t’aqananchispunin chaypaq tiempota. Kallpachakunanchismi “tiemponchista ama usuchinanchispaq” (Efesios 5:16). Chaypaqqa yaqapaschá leewaq tutallamanta, tardenta, manaraq puñushaspa otaq samarisqayki ratupipas. Chaytan jujkunapas ruwanku. Qanri, ¿ima ratupin Bibliata leeyta atiwaq?

ASTAWAN YACHASUNCHIS

Kunanqa yachasunchis imakunatas ruwananchis Biblia leey gustawananchispaq chayta, imakunas yanapawasunman kay libronchista allinta preparakunanchispaq chaytapas.

Mana jayk’aq mijusqanchis mijunaqa pisi-pisimantan gustawasunman, chhaynallataqmi Biblia leeypas, pisi-pisimantan gustawasunchis.

4. ¿Imatan ruwawaq Bibliata leey gustanasuykipaq?

Wakin mijunaqa qallariypiqa manapaschá gustawasunmanchu, ichaqa pisi-pisimantaqa gustawasunmanmi, hasta “yarqachikusunmanraq” chay mijunamanta; chhaynallataqmi Biblia leeypas. Leeychis 1 Pedro 2:2 textota, jinaspa jamuq tapuyman jina parlariychis:

  • Sichus sapa p’unchay pisillatapas Bibliata leenki chayqa, ¿gustarapusunkimanchu icha manachu?

VIDEOTA qhawaychis. Chaypin willashan imaynapis wakin wayna-sipaskuna Biblia leeyman yachakurqanku chaymanta. Chaymantataq jamuq tapuykunaman jina parlariychis:

  • ¿Imaraykun chay wayna-sipaskunapaq sasa karqan Bibliata leey?

  • ¿Iman paykunata yanaparqan ama pisipaspa Bibliata leenankupaq?

  • ¿Imatan chay wayna-sipaskuna ruwarqanku Bibliata kusisqa leenankupaq?

Bibliata leenapaq yanapaykuna:

  • Maskhay confianapaq jina, facil-llata entiendenapaq jina Bibliata. Yaqapaschá leewaq Mosoq Pacha Bibliata.

  • Bibliapi wakin willakuykunata ñaupaqta leey. Chaypaq qhaway “¿Bibliapi ima partekunatan ñaupaqta leewaq?” nisqata.

  • Llapa leesqaykita anotakuy. Chaypaqqa yanapachikuy “Leesqaykita marcanaykipaq” nisqawan.

  • JW Library®nisqawan yanapachikuy. Chaytaqa churawaqmi celularniykiman, tabletniykimanpas. Chaymi yanapasunki Bibliata leenaykipaqpas grabasqata uyarinaykipaqpas.

  • Mosoq Pacha Bibliapi “Astawan yachanapaq” nisqa willakuykunawan yanapachikuy. Chaypin tarinki mapa nisqakunata, explicasqa simikunata, juj yanapaykunatawan.

5. Yachachiqniykiwan estudianaykipaq allinta preparakuy

Leeychis Salmos 119:34 textota, jinaspa jamuq tapuyman jina parlariychis:

  • ¿Imaraykun Bibliata manaraq leeshaspa otaq kay qelqata manaraq preparakushaspa Jehová Diosmanta mañakunayki?

¿Iman yanapasunkiman yachachiqniykiwan estudiashaspa Bibliaq nisqanta allinta entiendenaykipaq? Chaypaqqa kaykunata ruwaymi yanapasunki:

  1. Sapanka yachachikuypi ñaupaq partepi kaq parrafokunata leey.

  2. Textokunata maskhaspa leey, jinaspa Bibliaq nisqanta chay parrafoq nisqanwan tupanachiy.

  3. Marcay otaq pintay tapuykunaq kutichiyninta. Chayta ruwaymi yanapasunki yachachiqniykiwan llapa yachachikuykunata allinta estudianaykipaq.

¿Yacharqankichu?

Jehová Diospa testigonkunaqa askha Bibliakunatan estudiarqayku. Ichaqa Mosoq Pacha Bibliatan astawan estudiayku. Chaypiqa maypichus rijurinanpin Diospa sutinqa rijurishan, jinaspapas facil-llata entiendenapaq jinan ruwasqa kashan (jw.org paginapi qhaway: ¿Sapaqchu Jehová Diospa testigonkunaq Biblian?”, nisqata).

WAKIN RUNAKUNAN NINKU: “Bibliata estudiayqa sinchi sasan, manan chaypaqqa tiempoypas ni kallpaypas kanchu”, nispa.

  • Qanri ¿chhaynatachu piensanki?

IMATAN YACHAMURQANCHIS

Biblia estudiay allinniykipaq kananpaqqa tiempotan t’aqanayki sapa p’unchay leenaykipaq. Chaymantapas manaraq leeshaspa Jehová Diosmanta mañakuy, yachachiqniykiwan estudianaykipaqpas allinta preparakuy.

Yuyarisun

  • ¿Imakunan yanapasunki Bibliata allinta estudianaykipaq?

  • ¿Ima ratukunapin atiwaq Biblia estudiayta?

  • ¿Imaraykun yachachiqniykiwan estudianaykipaq preparakunayki?

Kayta ruway

ASTAWAN YACHANAYKIPAQ

Kay qelqapin yachanki imas yanapasunkiman Bibliata allinta entiendenaykipaq chayta.

Bibliata leespa kusikuy (Qhawaq, 2017 watapi núm. 1)

Kaypin yachanki imakunatas ruwanayki Bibliata kusisqa leenaykipaq chayta.

¿Imaynatan Biblia yanapawanman? Iskay parte: Bibliata leespa kusikuymanta (jw.org paginapi leey)

Kay qelqapin yachanki imas wakin runakunata yanaparqan Bibliata leenankupaq chayta.

¿Imaynatan Bibliata estudiananchis? (2:06)