Bai na kontenido

Ken Ta e Arkangel Miguel?

Ken Ta e Arkangel Miguel?

E kontesta ku Beibel ta duna

Miguel, kende otro religion ta referí na dje komo “San Miguel,” evidentemente ta un nòmber ku a ser duná na Hesus promé i despues di su bida riba tera. * Despues di e morto di Moises, Miguel tabata diskutí ku Satanas i a yuda un angel duna profeta Daniel un mensahe di Dios. (Daniel 10:13, 21; Hudas 9) Miguel ta defendé e outoridat di Yehova pa goberná i ta bringa kontra e enemigunan di Dios. P’esei e ta digno pa karga e nòmber ei ku ta nifiká: Ken Ta Manera Dios?​—Daniel 12:1; Revelashon 12:7.

Laga nos wak dikon ta lógiko pa yega na e konklushon ku Hesus ta e Arkangel Miguel.

  • Miguel ta “e arkangel.” (Hudas 9) E título “arkangel,” ku ta nifiká “hefe di e angelnan,” ta aparesé solamente den dos teksto di Beibel. Den tur dos kaso, e palabra ta den forma singular, mustrando asina ku ta solamente ún angel tin e título ei. Un di e versíkulonan ei ta mustra ku e Señor Hesus resusitá “lo baha for di shelu ku un yamada di outoridat, ku stèm di arkangel.” (1 Tesalonisensenan 4:16) Hesus tin “stèm di arkangel” pasobra e ta e arkangel, Miguel.

  • Miguel ta lider di un ehérsito selestial di angel. “Miguel ku su angelnan a bringa kontra e dragon,” esta, Satanas. (Revelashon 12:7) Miguel tin hopi outoridat den shelu pasobra e ta ser yamá “un di e prensnan prinsipal” i “e gran prens.” (Daniel 10:13, 21; 12:1, Beibel Santu) Segun David E. Aune, un eksperto di e Tèstamènt Nobo, e títulonan akí ta identifiká Miguel komo e “komandante di e ehérsito selestial di angel.”

    Beibel ta menshoná solamente un nòmber mas di un persona ku tin outoridat riba un ehérsito di angel. E ta deskribí ku “Señor Hesus [lo] keda revelá for di shelu huntu ku su angelnan poderoso den un vlam di kandela. Na e tempu ei lo e trese vengansa.” (2 Tesalonisensenan 1:7, 8; Mateo 16:27) Hesus “a bai shelu i awor e ta na man drechi di Dios, kende a someté angel, outoridat i poder na dje.” (1 Pedro 3:21, 22) No tabatin sentido pa Dios nombra Hesus i Miguel komo komandante di e angelnan santu rival di otro. Mas bien, ta mas lógiko pa konkluí ku e nòmbernan Hesus i Miguel ta referí na e mesun persona.

  • Miguel “lo lanta” durante “un tempu di angustia” sin presedente. (Daniel 12:1, Beibel Santu) Den e buki di Daniel, e ekspreshon “lo lanta” ta referí na un Rei ku ta tuma un akshon spesial. (Daniel 11:2-4, 21) Hesukristu, yamá e “Palabra di Dios,” lo tuma akshon komo “Rei di reinan” pa destruí tur e enemigunan di Dios i protehá e pueblo di Dios. (Revelashon 19:11-16) E lo hasi esei durante un “tribulashon grandi manera no a yega di sosodé nunka.”—Mateo 24:21, 42.

^ par. 1 Den Beibel tin otro persona ku mas ku un nòmber, manera Yakòb ku a ser yamá Israel, Pedro ku a ser yamá Simon i Tadeo ku a ser yamá Hudas.​—Génesis 49:1, 2; Mateo 10:2, 3; Marko 3:18; Echonan 1:13.