Bai na kontenido

Bai na kontenido

Mi gusta pasa tempu ku e hóbennan di kongregashon

 BEIBEL TA KAMBIA BIDA DI HENDE

Mi Tabata Stima Beisbòl Mas Ku Tur Kos!

Mi Tabata Stima Beisbòl Mas Ku Tur Kos!
  • NASÍ NA AÑA: 1928

  • PAIS NATAL: COSTA RICA

  • SU PASADO: OPSESHONÁ KU DEPORTE PROFESHONAL I GÈMBELMENTU

MI PASADO

Mi a lanta na Puerto Limón, un haf ku ta keda na e kosta ost di Costa Rica. Mi mayornan tabatin ocho yu, i ami ta esun di shete. Mi tata a fayesé ora mi tabatin ocho aña. Despues di esei, mi mama a lanta nos su so.

Beisbòl semper tabata parti di mi bida. For di tempu mi tabata mucha, mi tabata gusta e deporte ei. Komo tiner, mi a djòin un tim amatùr di beisbòl. Tempu mi tabatin 20 i piku aña, un agente a puntra mi si mi kier a hunga beisbòl pa un tim profeshonal na Nicaragua. Pero, komo ku e tempu ei mi mama su salú no tabata bon i ami tabata kuid’é, mi no kier a bai biba na Nicaragua. Pues mi a nenga e oferta ei. Mas despues, un otro agente a invitá mi pa [bin] hunga den e selekshon di beisbòl di Costa Rica ku tabata konsistí di hungadónan amatùr. E biaha akí sí mi a aseptá e oferta. Mi tabata parti di e selekshon nashonal di 1949 te 1952, i mi a hunga vários wega na Cuba, México i Nicaragua. Mi tabata infielder, i mi tabata hunga bon. Mi a yega di hunga 17 wega konsekutivo sin hasi ni ún eror. Anto mi tabata gusta tende kon e hendenan tabata grita mi nòmber.

Lamentablemente, mi tabata hiba un bida inmoral. Aunke ku mi tabatin solamente ún namorada, semper mi tabatin mas mucha muhé na banda. Mi tabata bebe hopi tambe. Un dia mi tabata asina burachi ku ora mi a lanta su manisé, mi no por a kòrda kon mi a yega kas! Tambe mi tabata gèmbel riba wega di dominó i kumpra number òf brièchi.

Miéntras mi tabata hiba mi bida inmoral, mi mama a bira un Testigu di Yehova. El a purba di yuda mi haña interes den loke e tabata kere, pero na promé instante, e no a logra pasobra mi tabata okupá ku beisbòl. Si durante ora di kome mi tabata riba vèlt ta train, mi no tabata ni sinti hamber! Mi mente tabata di focus riba e wega so. Mi tabata stima beisbòl mas ku tur kos.

Sinembargo, ora mi tabatin 29 aña, mi a purba di fangu un bala durante un wega i a sufri un leshon grave. Despues  ku mi a rekuperá, mi a stòp di hunga beisbòl profeshonal. Pero, mi a keda enbolbí ku beisbòl i tabata train hungadónan di un tim amatùr banda di mi kas.

BEIBEL A KAMBIA MI BIDA

Na 1957, mi a aseptá un invitashon pa bai un kongreso di Testigunan di Yehova den un stadion kaminda ántes mi tabata hunga beisbòl. Ora mi tabata sintá den e ouditorio, mi a mira e diferensia entre e kondukta respetuoso di e Testigunan i e hendenan ku tabata hasi bochincha ora tabatin wega di beisbòl. Loke mi a mira na e kongreso ei a motivá mi pa tuma un kurso di Beibel serka e Testigunan i pa asistí na nan reunionnan.

Hopi di e siñansanan di Beibel ku mi a siña a impreshoná mi. Por ehèmpel, Hesus a profetisá ku den e último dianan, su disipelnan lo prediká e bon notisia di e Reino rònt mundu. (Mateo 24:14) Tambe mi a siña ku kristiannan berdadero no ta prediká pa gana plaka. Hesus a bisa: “Boso a risibí pòrnada, duna pòrnada.”—Mateo 10:8.

Durante mi kurso di Beibel, mi tabata kompará loke e ta bisa ku loke mi tabata mira den e Testigunan di Yehova. Mi tabata atmirá nan esfuerso inkansabel pa plama e bon notisia di e Reino di Dios rònt mundu. Mi a mira den nan e spiritu generoso ku Hesus a manda kristiannan demostrá. Pues ora mi a lesa Marko 10:21 i mira Hesus su invitashon pa “Bin sigui mi,” mi kier a bira un Testigu.

Sinembargo, a tuma mi un poko tempu pa mi dal pasonan mas desisivo. Por ehèmpel, pa hopi aña mi tabata kumpra mi number di “suerte” tur siman den e loteria nashonal. Pero, mi a siña den Beibel ku Dios ta kondená sirbidónan di e dios di “Fortuna,” òf Suerte, i tambe hende golos. (Isaías 65:11; Kolosensenan 3:5) P’esei mi a disidí di stòp di gèmbel. E promé djadumingu despues ku mi a stòp di kumpra number, mi number di “suerte” a sali! Hende tabata hasi bofon di mi pasobra mi no a hunga number e siman ei, i nan tabata pone hopi preshon riba mi pa mi bolbe hunga. Pero mi no a hasi esei. Nunka mas mi a gèmbel.

E mesun dia ku mi a batisá na un kongreso di Testigunan di Yehova mi “personalidat nobo” komo un kristian a ser poné na prueba. (Efesionan 4:24) E anochi ei, ora mi a regresá na e hotèl kaminda mi tabata keda, mi a haña mi èks namorada pará pafó di mi kamber ta warda mi. El a bisa mi: “Ban mira Sammy, laga nos pasa un ratu kontentu!” Pero mesora mi a kontest’é: “Nò!” Mi a kòrd’é ku awor mi ta biba segun e normanan moral di Beibel. (1 Korintionan 6:18) Sorprendí el a bisa: “Kiko?” Despues el a hasi manera loke Beibel ta bisa tokante inmoralidat seksual tabata algu insignifikante i a insistí pa nos bolbe kuminsá ku nos relashon. Pero, mi a djis drenta mi kamber i lòk e porta mi tras. Awe, mi ta kontentu di bisa ku desde ku mi a bira un Testigu na 1958, mi a tene mi mes fielmente na e kambionan ku mi a hasi den mi bida.

E BENEFISIONAN

Mi ta sinti komo si fuera mi por skirbi un buki di tur e benefisionan ku mi a haña debí ku mi a sigui e guia di Beibel. Algun benefisio ku mi tin aworakí ta un bida yen di propósito, berdadero felisidat i hopi berdadero amigu.

Ainda mi ta gusta beisbòl, pero mi a ahustá mi punto di bista. Mi a haña prestigio i sèn ku beisbòl, pero e kosnan ei no a dura. Sinembargo, mi relashon ku Dios i e hermandat ku mi ta forma parti di dje ta keda pa semper. Beibel ta bisa: “Mundu ta pasa bai i tambe su deseonan, ma esun ku ta hasi e boluntat di Dios ta keda pa semper.” (1 Huan 2:17) Awor mi ta stima Yehova Dios i su pueblo mas ku tur kos!