Bai na kontenido

Bai na kontenido

 BEIBEL TA KAMBIA BIDA DI HENDE

Mi No Kier A Muri!

Mi No Kier A Muri!
  • NASÍ NA AÑA: 1964

  • PAIS NATAL: INGLATERA

  • SU PASADO: UN MAMA YÒN I REBELDE

MI PASADO

Mi a nase na Paddington, un área na Lònden, Inglatera, kaminda tin hopi hende ta biba. Mi tabata biba ku mi mama i mi tres ruman muhénan mas grandi. Nos no tabata wak nos tata mashá pasobra e tabata bebe hopi.

Tempu mi tabata mucha, mi mama a siña mi pa hasi orashon tur anochi. Mi tabatin un Beibel chikitu ku tabata kontené solamente e Salmonan, i mi tabata inventá weis pa mi por a kanta nan. Mi ta kòrda ku mi a yega di lesa un frase den un buki ku a keda den mi mente: “Un dia lo no tin mañan.” E palabranan ei a tene mi lantá henter anochi i pone mi pensa tokante futuro. Mi tabata pensa: ‘Mester tin algu mas ku loke bida ta ofresé aworakí. Dikon mi ta akinan?’ Mi no kier a muri!

Mi a bira hopi kurioso tokante kosnan okulto. Mi a purba di papia ku e mortonan, mi tabata bai den santana ku mi amigunan di skol i nos tabata wak pelíkula di horor. Nos tabata pensa ku e kosnan akí tabata spantoso i a la bes eksitante.

Pa tempu mi tabatin dies aña di edat, ya mi a kuminsá bira rebelde. Mi a kuminsá huma sigaria i a bira adikto lihé. Despues mi a kuminsá huma mariwana. Ku mi 11 aña mi a kuminsá bebe. Aunke mi no tabata gusta smak di alkohòl, mi tabata gusta e efekto ku e tabatin riba mi. Tambe mi tabata gusta skucha músika i baila. Asina ku mi a haña un chèns, mi tabata bai fiesta i klup nokturno. Anochi, mi tabata sali sin niun hende sa i bini bèk nèt promé ku di dia habri. E siguiente dia mi tabata lanta kansá i hopi biaha mi tabata keda sin bai skol. I ora mi tabata bai skol mes, mi tabata bebe ora di kambia klas.

Den mi último aña di skol, mi a haña puntonan hopi abou. Komo ku mi mama no a ripará kon malu mi tabata komportá mi, e tabata desapuntá i rabiá. Nos a pleita, i mi a bai for di kas. Pa un tempu mi a keda ku mi frei, Tony, kende tabata un rastafari. E tabata gusta kana hasi malu, bende droga i tabata konosí komo un mucha hòmber hopi violento. No a dura muchu ku mi a sali na estado i ku apénas 16 aña di edat mi a duna lus na nos yu hòmber.

 BEIBEL A KAMBIA MI BIDA

 

E promé bes ku mi a topa ku Testigunan di Yehova, mi tabata biba na un posada pa mamanan soltero ku nan yunan. Outoridatnan lokal a duna mi un kamber einan. Tabatin dos ruman muhé Testigu ku tabata bishitá algun di e otro mamanan yòn regularmente. Un dia mi a djòin un kòmbersashon ku nan ku e intenshon di mustra e Testigunan ku nan tabata robes! Ma na un manera kalmu i bon kla, nan a kontestá mi preguntanan for di Beibel. Nan tabata masha amabel i kariñoso ku mi, algu ku mi a gusta hopi. Pues mi a aseptá un kurso di Beibel serka nan.

No a dura muchu ku mi a siña algu for di Beibel ku a kambia mi bida. For di tempu mi tabata mucha, mi tabatin miedu di muri. Pero den mi kurso, mi a bin siña tokante Hesus su siñansa di resurekshon. (Huan 5:28, 29) Tambe mi a siña ku Dios ta interesá den mi personalmente. (1 Pedro 5:7) Loke a konmové mi mas tantu tabata e palabranan di Yeremías 29:11, ku ta bisa: “‘Pasobra mi sa e plannan ku mi tin pa boso,’ SEÑOR ta deklará, ‘plannan pa pas i no pa kalamidat, pa duna boso un futuro i un speransa.’” Mi a kuminsá kere den e speransa di bida eterno den Paradeis riba tera.—Salmo 37:29.

Testigunan di Yehova a demostrá berdadero amor na ami. For di e promé bes ku mi a asistí na un di nan reunionnan, e ambiente tabata kaluroso i agradabel. Tur hende tabata masha amigabel! (Huan 13:34, 35) Esei tabata un diferensia grandi for di e manera ku hende na un iglesia lokal a trata mi. E Testigunan a duna mi un kordial bon biní apesar di mi situashon. Nan a dediká tempu na mi, nan a duna mi atenshon i hopi yudansa práktiko. Mi a sinti mi parti di un famia grandi ku ta mustra amor na otro.

For di mi kurso di Beibel, mi a realisá ku mi mester a hasi kambionan grandi den mi bida pa mi por a kumpli ku e normanan moral haltu di Dios. No tabata fásil pa mi stòp di huma. Pero na mes momento, mi a ripará ku sierto kantikanan tabata lanta mi deseo pa huma mariwana, i p’esei mi a stòp di skucha e kantikanan ei. Komo ku ya mi no tabata ke bebe di mas, mi a stòp di bai fiesta i klupnan kaminda e tentashon tabata mas grandi. Tambe mi a buska amigu nobo ku por tabatin un bon influensia riba mi i ku por a yuda mi ku mi estilo di bida nobo.—Proverbionan 13:20.

Mientrastantu, Tony tambe a risibí un kurso di Beibel serka e Testigunan di Yehova. Segun ku e Testigunan tabata kontestá su preguntanan for di Beibel, e tambe a bira konvensí di e bèrdat ku e tabata siña. El a hasi kambionan grandi den su bida: el a hala pia for di su amigunan violento, el a stòp di kometé krímen i huma mariwana. Pa nos por a hasi Yehova kontentu, nos tur dos a mira e nesesidat pa stòp ku nos bida inmoral i krea mas bien un ambiente sano pa nos yu hòmber. Na aña 1982, nos a kasa.

“Mi no ta keda lantá henter anochi mas i preokupá tokante futuro òf morto”

Mi ta kòrda kon mi tabata buska artíkulonan den e revistanan Toren di Vigilansia i Spièrta! * tokante historia di bida di hende ku a logra hasi e kambionan ku ami tambe kier a hasi. Nan ehèmpel a animá mi mashá i a fortalesé mi pa mi sigui hasi mi bèst i no entregá. Mi a sigui hasi orashon na Yehova pa e no fada ku mi. Na yüli 1982, ami ku Tony a batisá komo Testigu di Yehova.

E BENEFISIONAN

 

Mi amistat ku Yehova Dios a salba mi bida. Ademas, ami ku Tony a eksperensiá kon Yehova a sostené nos den tempu difísil. Nos a siña dependé riba Dios durante tempunan difísil, i semper nos a sinti ku el a yuda nos i sostené nos famia.—Salmo 55:22.

Mi ta kontentu ku mi por a yuda mi yu hòmber i yu muhé konosé Yehova meskos ku ami konos’é. Awor, mi ta kontentu tambe di mira mi ñetunan lanta den e kaminda di Dios.

Mi no ta keda lantá henter anochi mas i preokupá tokante futuro òf morto. Tur siman, ami ku Tony ta hopi okupá ta bishitá diferente kongregashon di Testigunan di Yehova pa animá nos rumannan. I huntu nos ta siña otro hende ku si nan pone fe den Hesus, nan tambe por haña bida pa semper.

^ par. 18 Tambe publiká pa Testigunan di Yehova.