Bai na kontenido

Bai na kontenido

 TÓPIKO PRINSIPAL | TIN SPERANSA PA HENDE KU A MURI?

Kon Nos Por Ta Sigur Ku Tin Speransa pa e Mortonan?

Kon Nos Por Ta Sigur Ku Tin Speransa pa e Mortonan?

Akaso ta irealístiko pa pensa ku e mortonan lo bolbe biba? Wèl, apòstel Pablo no a pensa asina, pasobra el a skirbi bou di inspirashon: “Si ta den e bida akí so nos ta spera den Kristu, nos ta esnan ku hende mester tin mas duele di dje. Ma echo ta ku Kristu a ser lantá for di morto, e promé fruta di esnan ku a bai sosegá.” (1 Korintionan 15:19, 20) Pues, komo ku Dios a resusitá Hesus, * Pablo tabata sigur ku e resurekshon lo tuma lugá den futuro. (Echonan 17:31) E echo ku Pablo a bisa ku Hesus ta “e promé fruta,” esta, e promé ku a haña resurekshon pa biba pa semper, ta indiká ku lo tin mas hende ku lo lanta for di morto pa haña bida eterno.

Yòb a bisa Dios: “Lo bo anhelá na e obra di bo mannan.”Yòb 14:14, 15

Un otro motibu ku nos por ta sigur ku tin speransa pa e mortonan ta ku Yehova ta un Dios ku “no por gaña.” (Tito 1:2) Nunka Yehova a gaña i nunka lo e hasi esei tampoko. Bo ta kere ku Dios lo primintí hende ku lo bai tin un resurekshon, asta duna evidensia ku e por resusitá hende, i despues keda sin kumpli ku su palabra? Esei no ta lógiko, tòg?

Yehova ta stima nos i p’esei el a perkurá pa e mortonan haña resurekshon den futuro. Yòb a puntra: “Si un hende muri, lo e bolbe biba?” I Yòb mes a kontestá: “Abo lo yama, i ami lo kontestá bo; lo bo anhelá na e obra di bo mannan.” (Yòb 14:14, 15) Yòb tabata konvensí ku su Tata amoroso den shelu lo ta ansioso pa resusit’é. Akaso Dios a kambia? Beibel ta bisa: “Ami, SEÑOR, no ta kambia.” (Malakías 3:6) Ainda Dios ta anhelá pa mira e mortonan resusitá i biba yen di felisidat i ku bon salú. Esaki ta eksaktamente loke un mayor amoroso ta deseá ora e pèrdè un yu den morto. Pero e diferensia entre un mayor i Dios ta ku Dios sí tin poder pa hasi loke e ta deseá.—Salmo 135:6.

Morto ta algu teribel, pero Dios tin e solushon perfekto

 Yehova lo duna su Yu poder pa trese felisidat pa tur esnan ku a pèrdè un ser kerí den morto. I kiko Hesus mes ta pensa tokante resurekshon? Promé ku Hesus a resusitá Lázaro, el a mira e tristesa di Lázaro su ruman muhénan i amigunan, i p’esei ‘awa a kuminsá basha for di Hesus su wowo.’ (Huan 11:35) Na un otro okashon, Hesus a topa ku e biuda di Nain ku a pèrdè su úniko yu hòmber. Hesus “a haña duele di dje i a bis’é: ‘No yora mas.’” I mesora el a resusitá su yu hòmber. (Lukas 7:13) Pues, Hesus ta sinti su mes hopi malu ora e mira kuantu doló morto ta kousa hende. E lo ta masha kontentu ora e duna hende rònt mundu ku ta tristu un motibu pa alegrá.

Abo a yega di sinti e doló ku morto ta kousa? Wèl, kisas bo ta pensa ku ora un hende muri tur kos a kaba p’e. Pero esei no ta bèrdat, pasobra mediante Hesus, Dios lo resusitá e mortonan. Kòrda ku Dios ke pa bo ta einan pa wak e resurekshon tuma lugá, i pa bo bolbe brasa bo sernan kerí. Imaginá bo kon dushi lo ta pa plania un futuro huntu ku nan sin ku un dia bo tin ku despedí di nan.

Lionel, ku nos a menshoná den e artíkulo anterior, a bisa: “Ku tempu mi a siña tokante e resurekshon. Na prinsipio tabata difísil pa mi kere den dje, i mi no tabata konfia e persona ku tabata papia ku mi tokante esei. Pero mi a bai buska loke el a bisa mi den mi mes Beibel, i mi a mira ku ta bèrdat. Mi no por warda pa wak mi tawela atrobe.”

Lo bo ke haña sa mas tokante e tópiko akí? Testigunan di Yehova lo ta kontentu pa mustra bo den bo mes Beibel dikon nan ta konvensí ku lo tin un resurekshon. *

^ par. 3 Pa mas evidensia ku Hesus a resusitá, wak e buki E Bijbel—e Palabra di Dios of e palabra di hende? página 78-86, publiká pa Testigunan di Yehova.