Bai na kontenido

Bai na kontenido

Beibel Por Yuda Bo Matrimonio

Beibel Por Yuda Bo Matrimonio

 Beibel Por Yuda Bo Matrimonio

MATRIMONIO. Pa algun hende e palabra ei ta trese dushi rekuerdo. Pa otronan, e ta lanta doló di kurason. Un esposa a lamentá: “Mi ta sinti mi emoshonalmente divorsiá. Tur ora bai mi ta sinti mi neglishá i solitario.”

Kiko ta pone ku dos persona ku un tempu a primintí solemnemente di stima i kuida otro, ta bira asina alehá for di otro? Un faktor ta: falta di edukashon tokante kiko matrimonio ta enserá. Un reportero médiko a komentá: “Nos ta drenta den e boto matrimonial sin ningun tipo di entrenamentu.”

De echo, un estudio dirigí pa e Proyekto Nashonal di Matrimonio, ku ta un inisiativa di Universidat di Rutgers na New Jersey, Merka, a konfirmá ku ta poko hende awe tin e debido konosementu kon pa trata ku matrimonio. E direktornan di e proyekto a skirbi: “Hopi hende den e investigashon aki a lanta ku mayornan divorsiá òf infelis den nan matrimonio. Nan sa presis kiko ta un mal matrimonio, pero nan no sa sigur kon un bon matrimonio mester ta. Tin di nan solamente por deskribí un bon matrimonio komo ‘lo kontrario di esun di mi mayornan.’”

Akaso kristiannan sí ta liber di problemanan matrimonial? Nò. De echo, algun kristian den promé siglo mester a haña konseho bon kla pa “no buska separashon.” (1 Korintionan 7:27) Ta klaru ku kualkier matrimonio di dos hende imperfekto lo tin su problemanan, pero nos tin yudansa. Esposo i esposa por mehorá nan relashon dor di apliká prinsipionan bíbliko.

Ta bèrdat ku Beibel no ta un buki skirbí spesialmente pa duna instrukshon tokante matrimonio. Sin embargo, komo ku e ta inspirá dor di Esun ku a originá matrimonio, nos por ferwagt ku su prinsipionan ta práktiko. Mediante profeta Isaias, Yehova Dios a deklará: “Ami ta SEÑOR bo Dios, Kende ta siña bo, pa bo prosperá, Kende ta guia bo den e kaminda ku bo mester kana. Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.”—Isaias 48:17, 18.

E amor ku un tempu tabatin entre abo i bo kasá a kuminsá fria? Bo ta sinti bo atrapá den un matrimonio sin amor? Un esposa ku tin 26 aña kasá a bisa: “E doló ku bo ta sinti den e tipo di relashon aki ta algu ku bo no por splika hende. E ta konstante i semper presente.” En bes di konformá bo ku un matrimonio ku no ta duna bo niun satisfakshon, pakiko bo no ta tuma e determinashon pa hasi algu al respekto? E siguiente artíkulo lo mustra esposo- i esposanan kon prinsipionan bíbliko por yuda nan matrimonio riba un tereno spesífiko: nan determinashon pa konserbá i mehorá nan matrimonio.