Bai na kontenido

Bai na kontenido

Ántes i Awor—Kon Beibel A Kambia e Hòmber Aki

Ántes i Awor—Kon Beibel A Kambia e Hòmber Aki

 “Hala Serka Dios i E Lo Hala Serka Boso”

Ántes i Awor—Kon Beibel A Kambia e Hòmber Aki

MÚSIKA tabata Rolf-Michael su bida. Droga tabata su opseshon. Komo hóben na Alemania, el a bebe pisá i a usa LSD, kokaina, hashis i otro droga ku a afektá su mente.

Un biaha Rolf-Michael a wòrdu arestá ora el a purba drenta un pais afrikano ku droga, i el a pasa 13 luna den prizon. E periodo ku el a pasa den prizon a dun’é tempu pa pensa riba kiko ta e berdadero propósito di bida.

Rolf-Michael ku su kasá Ursula, desesperadamente a buska pa sa kiko ta e propósito di bida i tambe nan a buska e bèrdat. Apesar ku nan a pasa den mal eksperensia ku iglesianan supuestamente kristian, nan tabatin un deseo fuerte pa siña konosé Dios. Nan tabatin pregunta, pero ningun grupo religioso ku nan a bishitá no a duna nan kontesta satisfaktorio. Ademas, e religionnan aki no a duna nan ningun motivashon fuerte pa kambia nan bida.

Ku tempu, Rolf-Michael ku Ursula a bini den kontakto ku Testigunan di Yehova. Despues ku Rolf-Michael a kuminsá studia Beibel, el a ser konmoví profundamente pa e konseho: “Hala serka Dios i e lo hala serka boso.” (Santiago 4:8) E tabata determiná pa ‘pone un banda e hende bieu ku tabata konforme su manera di biba di ántes i bisti e hende nobo, kreá segun Dios den hustisia i santidat berdadero.’—Efesionan 4:22-24.

Kon Rolf-Michael por a bisti e hende nobo, es desir, e personalidat nobo? Nan a mustr’é den Beibel ku ta mediante “konosementu berdadero” un persona su personalidat por wòrdu ‘renobá segun e imágen di Esun ku a kre’é,’ esta, Yehova Dios.—Kolosensenan 3:9-11.

Segun ku Rolf-Michael tabata gana konosementu eksakto, el a purba armonisá su bida ku e prinsipionan di e Palabra di Dios. (Juan 17:3) Tabata difísil pa e stòp di usa droga, pero Rolf-Michael a rekonosé e balor di aserká Yehova den orashon i asina a mira kon e ta yud’é. (1 Juan 5:14, 15) El a haña mas yudansa dor di asosiá estrechamente ku personanan ku ya kaba tabata Testigu di Yehova, i ku tabata traha duru pa hasi e boluntat di Dios.

Un kos mas ku a yuda Rolf-Michael tabata di sa ku e mundu ta pasa bai pero ku esnan ku ta hasi e boluntat di Dios lo keda pa semper. Esei a yud’é skohe, no e amor pasahero di mundu, sino e bendishon eterno di un relashon íntimo ku e Dios amoroso, Yehova. (1 Juan 2:15-17) E siguiente palabranan di Proverbionan 27:11 a konmové Rolf-Michael profundamente: “Sea sabí, mi yu, i hasi mi kurason kontentu, pa mi por kontestá esun ku reprochá mi.” Ku gratitut  el a komentá: “E versíkulo aki ta mustra kon profundo Yehova su amor ta, ya ku e ta duna hende e chèns di hasi Su kurason kontentu.”

Meskos ku Rolf-Michael, i su kasá i nan tres yunan, sientos di míles di hende a benefisiá dor di sigui prinsipionan bíbliko. Nos ta haña e personanan ei den e kongregashonnan di Testigunan di Yehova rònt mundu. Lamentablemente, den algun pais hende a akusá e Testigunan eróneamente di ta un sekta peligroso ku ta kibra famia. Rolf-Michael su eksperensia ta demostrá nèt lo kontrario.—Hebreonan 4:12.

Rolf-Michael a bisa ku Mateo 6:33, ku ta animá nos pa duna prioridat na aktividatnan spiritual, ta e “kompas” di su famia, i ta dirigí nan den e direkshon korekto. E ku su famia ta masha gradisidu na Yehova pa e bida di famia felis ku nan tin komo kristian. Nan ta kompartí e sintimentu di e salmista ku a kanta: “Kiko lo mi duna SEÑOR pa tur su benefisionan na mi?”—Salmo 116:12.

[Komentario na página 9]

Dios ta duna hende e chèns di hasi su kurason kontentu

[Kuadro na página 9]

Prinsipionan di Beibel den Akshon

E siguiente prinsipionan di Beibel a yuda hopi hende libra nan mes di adikshonnan mortal:

“Boso ku ta stima SEÑOR, odia maldat.” (Salmo 97:10) Unabes un persona ta konvensí ku práktikanan mortal ta realmente malu i ta kultivá berdadero odio pa nan, ta bira mas fásil pa e hasi loke ta agradá Dios.

“Esun ku anda ku hende sabí lo ta sabí, ma un kompañero di hende bobo lo sufri daño.” (Proverbionan 13:20) Pa un persona por rechasá droga i otro supstansianan adiktivo, e tin ku skohe su amistatnan kuidadosamente. Un kos realmente probechoso ta di kultivá amistat ku kristiannan ku lo yud’é rechasá e adikshonnan ei.

“No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.” (Filipensenan 4:6, 7) No tin nada otro ku por igualá e pas ei di mente i kurason. I ora nos ta dependé riba Dios mediante orashon, esei ta yuda nos trata ku problemanan di bida sin tin ku akudí na droga.