Bai na kontenido

Bai na kontenido

Martin Luther—E Hòmber i Su Herensia

Martin Luther—E Hòmber i Su Herensia

 Martin Luther—E Hòmber i Su Herensia

“NAN ta bisa ku mas buki a ser skirbí tokante [Martin Luther] ku kualkier otro persona den historia, fuera di bukinan skirbí tokante su doño, Hesukristu.” Asina e revista Time a bisa. Luther su palabra- i akshonnan a yuda ku nasementu di Reformashon—un movementu religioso deskribí komo “e kambio radikal di mas importante den historia di humanidat.” Asina el a yuda kambia e ambiente religioso di Europa i terminá e Edat Medio na e kontinente ei. Tambe Luther a pone e base pa standarisá e idioma aleman skirbí. Su tradukshon di Beibel sin duda a keda esun di mas popular den idioma aleman.

Ki tipo di hende Martin Luther tabata? Kon bin el a logra kousa un impakto asina grandi riba asuntunan europeo?

Luther Ta Bira Eksperto di Beibel

Martin Luther a nase na Eisleben, Alemania, na novèmber 1483. Maske su tata tabata traha den mina di koper, tòg el a logra gana sufisiente pa perkurá un bon edukashon pa Martin. Na 1501, Martin a bai studia na e Universidat di Erfurt. Ei den e biblioteka el a lesa Beibel pa promé bes. “Mi a gusta e buki masha tantu mes,” el a bisa, “i mi a deseá di por ta digno di por tin un buki asina un dia.”

Na edat di 22 aña, Luther a drenta e monasterio di Agustin na Erfurt. Despues el a bai e Universidat di Wittenberg, kaminda el a haña su doktorado den teologia. Luther no a konsiderá su mes digno di haña Dios su fabor i tin biaha e tabata bira hopi deprimí pa motibu di remordimentu di konsenshi. Pero studio di Beibel, orashon i meditashon a yud’é haña un mihó komprondementu dje manera ku Dios ta mira pekadó. Luther a komprondé ku bo no por kumpra e fabor di Dios. Mas bien, esnan ku ehersé fe ta haña su fabor mediante su grasia òf bondat inmeresí.—Romanonan 1:16; 3:23, 24, 28.

Kon Luther a yega na e konklushon ku su komprondementu nobo tabata korekto? Kurt Aland, profesor di historia antiguo di iglesia i investigashon tekstual di Tèstamènt Nobo, a skirbi: “El a meditá riba henter Beibel pa asina determiná si e konosementu nobo aki ta keda válido si kompar’é ku otro deklarashonnan bíbliko, i tur kaminda el a haña konfirmashon ku e no ta kontradisí su mes.” E doktrina di hustifikashon, esta, di salbashon mediante fe i no mediante obra òf penitensia, a keda e pilar prinsipal di e siñansa di Luther.

 Indigná Tokante Indulgensia

Luther su komprondementu di e manera ku Dios ta mira pekadó a pon’é na konflikto ku Iglesia Katóliko Romano. E tempu ei mayoria hende tabata kere ku despues di morto, pekadónan ta haña kastigu pa un periodo di tempu. Sin embargo, aparentemente e periodo aki por bira mas kòrtiku mediante indulgensia papal (un karta ku hende ta haña di papa pa pordon di nan pikánan) a kambio di plaka. Bendedónan di indulgensia manera Johann Tetzel, kende a sirbi komo representante di Arsobispu Albert di Mainz, tabatin un negoshi lukrativo bendiendo indulgensia na hende komun. Hopi hende a konsiderá indulgensia manera un sorto di seguro kontra pikánan den futuro.

Luther tabata sintié indigná tokante bendementu di indulgensia. E tabata sa ku hende no por negoshá ku Dios. Den hèrfst di aña 1517, el a skirbi su 95 tésisnan famoso akusando iglesia di a kometé korupshon finansiero, engaño doktrinal i engaño religioso. Luther kier a animá reforma, no rebelion. Ta p’esei el a manda kopia di e tésisnan aki pa Arsobispu Albert di Mainz i pa vários eksperto di Beibel. Hopi historiadó ta bisa ku Reformashon a nase mas o ménos na aña 1517.

Luther no tabata e úniko ku a lamentá e malechonan di iglesia. Shen aña promé, e reformadó religioso cheko Jan Hus a kondená benta di indulgensia. Anto promé ku Hus, John Wycliffe di Inglatera a indiká ku algun di e tradishonnan di iglesia no tabata bíbliko. Luther su kontemporáneonan Erasmus di Rotterdam i Tyndale di Inglatera a boga pa reforma. Pero danki na Johannes Gutenberg su invento di mashin di imprenta ku lèter ahustabel na Alemania, Luther su mensahe tabatin un impakto mas fuerte i a bai mas leu ku di otro reformadó.

Gutenberg su imprenta na Mainz a kuminsá traha na 1455. Na komienso di siglo 16, tabatin mashin di imprenta na 60 pueblo aleman i 12 otro pais europeo. Pa promé bes den historia, públiko por a haña informashon lihé tokante kosnan ku ta interesá nan. Kisas nan a imprimí i distribuí e 95 tésisnan sin aprobashon di Luther. E kuestion di reformá iglesia no tabata djis un asuntu lokal mas. Rònt mundu e asuntu aki a bira un kontroversia, i diripiente Martin Luther a bira e hòmber mas famoso na Alemania.

“Luna ku Solo” Ta Reakshoná

Pa siglonan, Europa tabata den man di dos organisashon poderoso: Imperio Romano Santu i Iglesia Katóliko Romano. Hanns Lilje, un eks-presidente di e Federashon Mundial Luterano, a splika: “Emperador i papa a traha huntu manera luna ku solo.” Sin embargo, tabatin un konfushon tokante ken ta solo i ken ta luna. Na prinsipio di siglo 16, tur dos organisashon a pasa límite di nan poder. Kambio tabata na kaminda.

Papa Leo X a reakshoná riba e 95 tésisnan dor di menasá Luther ku ekskomunion (ekspulshon), a ménos ku Luther hala atras. Luther a nenga di obedesé, i públikamente el a kima e karta di papa ku a kontené e menasa. Tambe el a publiká obranan adishonal ku a animá prinsipado (teritorio ku ta kai bou di  prens) pa reformá iglesia sin papa su konsentimentu. Na 1521, Papa Leo X a ekskomuniká Luther. Ora Luther a reklamá ku nan a konden’é sin dun’é un kaso imparsial, Emperador Karlos V a manda e reformadó pa aparesé dilanti di kongreso imperial na Worms. Luther su biahe di 15 dia di Wittenberg pa Worms na aprel 1521 tabata manera un proseshon di triunfo. Públiko tabata na su banda, i hende di tur parti kier a mir’é.

Na Worms, Luther a para dilanti di e emperador, prensnan i e nunsio papal. Jan Hus tambe a enfrentá un huisio asina na Konstansa na aña 1415 i nan a kim’é na staka. Atenshon di e iglesia i e imperio tabata riba Luther. El a nenga di hala atras a ménos ku su opositornan proba for di Beibel ku e ta robes. Pero niun hende tabata konosé Beibel mes bon ku Luther. E dokumento ku yama e Dekreto di Worms a kontené e resultado di e huisio. El a deklará Luther fugitivo di lei i a prohibí su publikashonnan. Awor ku papa a ekspuls’é i emperador a deklar’é fugitivo di lei, su bida tabata den peliger.

Despues kos a kambia den un forma dramátiko, i na un manera inesperá. Riba su biahe di regreso pa Wittenberg, Luther a bira víktima di un supuesto sekuestro ku un hòmber generoso ku yama Frederick di Saksen a plania. Esaki a pone ku su enemigunan no por a logra hañ’é. Nan a hiba Luther den sekreto na e kastel alehá Wartburg, kaminda el a laga su barba krese. Tambe el a kambia su identidat pa kabayero Junker Jörg.

Gran Demanda pa Tèstamènt Nobo di Sèptèmber

Pa e siguiente dies lunanan, Luther a biba na e kastel di Wartburg komo fugitivo pa asina emperador i papa no hañ’é. E buki Welterbe Wartburg ta splika ku “e tempu ku el a pasa na Wartburg tabata un di e temporadanan di mas produktivo i kreativo di su bida.” Einan el a kompletá un di su logronan di mas grandi, esta, e tradukshon di Erasmus su teksto di e Skritura Griego na aleman. El a wòrdu publiká na sèptèmber di aña 1522 i e no a identifiká Luther komo e traduktor. E obra aki tabata konosí komo e Tèstamènt Nobo di Sèptèmber. E tabata kosta fl. 1,50; ekivalente na loke un kriá tabata gana den un aña. No opstante, e demanda pa e Tèstamènt Nobo di sèptèmber tabata masha grandi. Den 12 luna, a imprimí 6.000 ehemplar den 2 edishon, i por lo ménos 69 edishon lo mester a wòrdu imprimí durante e siguiente 12 añanan.

Na 1525, Martin Luther a kasa ku Katharina von Bora, ku ántes tabata soeur. Katharina por a atendé asuntunan di kas masha bon mes i tabata por a trata tambe ku e demandanan ku e generosidat di su esposo a krea. Luther su hogar a konsistí no solamente di un esposa i seis yu, sino tambe di amigu-, erudito- i refugiadonan. Mas despues den bida, komo konsehero, Luther tabatin hopi influensia riba e eruditonan ku a keda na su kas. P’esei e huéspetnan aki a skirbi su opservashonnan. E anotashonnan aki a wòrdu poné huntu den un kolekshon titulá Luthers Tischreden (Kòmbersashonnan  Informal di Luther). Pa un tempu, ta Beibel so a surpasá sirkulashon di e kolekshon aki na Alemania.

Traduktor Talentoso i Eskritor Produktivo

Pa 1534, Luther a terminá su tradukshon di e Skritura Hebreo. E tabatin e abilidat pa kombiná estilo, sabor literario i vokabulario. E resultado tabata ku hende komun por a komprondé Beibel. Komentando riba su método di tradusí, Luther a skirbi: “Nos tin ku kòmbersá ku mamanan den nan kas, muchanan riba kaya i hòmber komun i koriente riba plasa, anto opservá nan boka pa wak kon nan ta papia i despues tradusí na armonia ku esei.” E Beibel di Luther a yuda pone e base pa standarisá idioma skirbí ku despues a wòrdu aseptá rònt Alemania.

Luther por a kombiná su talento komo traduktor, ku su abilidat komo eskritor hopi bon. Nan ta bisa ku el a skirbi un tratado kada dos siman atraves di henter su bida. Algun di e informashonnan aki a reflehá e mesun spiritu pleitista ku nan outor. E estilo di su skirbimentunan mas promé tabata sarkástiko, i su estilo di skirbi no a kambia ora el a bira bieu. Loke el a skirbi mas despues a bira hopi fuerte. Segun Lexikon für Theologie und Kirche, Luther su obranan ta revelá e “rabia ku e tabatin,” su “falta di humildat i amor,” i tambe “un sintimentu fuerte pa kumpli ku su mishon.”

Ora ku e Guera di Kampesino a dal aden i a mata hopi prinsipado, nan a puntra Luther kiko e ta pensa di e lantamentu. E kampesinonan tabatin motibu válido pa keha kontra nan señornan feudal? Luther no a buska manera pa keda ku su popularidat dor di duna un kontesta ku lo a agradá e mayoria. El a kere ku sirbidónan di Dios mester obedesé esnan na poder. (Romanonan 13:1) Luther a duna nan su opinion franko, i a bisa ku mester para e lantamentu usando violensia. “Laga tur ku por, hinka, dal i mata,” el a bisa. Hanns Lilje a remarká ku e kontesta aki a kosta Luther “su popularidat úniko ku e tabatin te na e momentu ei serka e pueblo.” Ademas, loke Luther a skirbi mas despues tokante hudiu ku a nenga di kombertí na kristianismo, spesialmente esun titulá On the Jews and Their Lies [Tokante Hudiu i Nan Mentiranan], a pone hopi hende klasifiká Luther komo antisemita.

E Herensia di Luther

E Reformashon, ku hòmbernan manera Luther, Calvijn, i Zwingli a kuminsá, a hiba na e formashon di protestantismo, ku tabata un manera nobo di mira e religion aki. E herensia mas grandi ku Luther a laga atras pa protestantismo tabata su siñansa sentral di hustifikashon pa medio di fe. Kada un di e prinsipadonan aleman a apoyá sea e fe protestant òf e fe katóliko. Protestantismo a plama, bira popular i a haña apoyo na Skandinavia, Suisa, Inglatera i Hulanda. Awe e tin miónes i miónes di siguidó.

Tin hopi hende ku no ta di akuerdo ku  tur e siñansanan di Luther, pero ku tòg ta apresi’é mashá. Na aña 1983 e eks-Repúblika Demokrátiko Aleman, ku a inkluí Eisleben, Erfurt, Wittenberg i Wartburg denter di su fronteranan, a selebrá e di 500 aniversario di Luther su nasementu. E Estado Sosialista aki a rekonos’é komo un figura sobresaliente den historia i kultura aleman. Ademas, un teólogo katóliko di dékadanan ’80 a resumí e impakto ku Luther a kousa i a remarká: “Niun hende ku a bin despues di Luther lo no por ser kompará kuné.” Profesor Aland a skirbi: “Tur aña tin por lo ménos 500 publikashon nobo tokante Martin Luther i e Reformashon—i nan ta wòrdu publiká den kasi tur idioma prinsipal di mundu.”

Martin Luther tabatin un ekselente memoria, e tabata hopi inteligente, e por a dominá e idioma hopi bon i tabata un trahadó diligente. Ademas e no tabatin mashá pasenshi, e tabata fresku, i e tabata reakshoná di un manera agresivo riba loke el a konsiderá hipokresia. Ora e tabata muriendo na Eisleben na febrüari 1546, su amigunan a puntr’é si el a keda tene firme na e kreensianan ku el a siña otro hende. Su kontesta tabata: “Sí.” Luther a muri, pero hopi hende ainda ta pega na e kreensianan ei.

[Plachi na página 27]

Luther a oponé benta di indulgensia

[Rekonosementu]

Mit freundlicher Genehmigung: Wartburg-Stiftung

[Plachi na página 28]

Luther a nenga di hala atras a ménos ku su opositornan proba for di Beibel ku e tabata robes

[Rekonosementu]

Di e buki The Story of Liberty, 1878

[Plachinan na página 29]

Luther su kamber na kastel di Wartburg, kaminda el a tradusí Beibel

[Rekonosementu]

Ámbos potrèt: Mit freundlicher Genehmigung: Wartburg-Stiftung

[Rekonosementu pa Potrèt na página 26]

Di e buki Martin Luther The Reformer, di tres Edishon, publiká pa Toronto Willard Tract Depository, Toronto, Ontario

[Rekonosementu pa Potrèt na página 30]

Di e buki The History of Protestantism (Vol. I)