Bai na kontenido

Bai na kontenido

Ora Ku Tur Promesa Lo Ta un Garantia

Ora Ku Tur Promesa Lo Ta un Garantia

 Ora Ku Tur Promesa Lo Ta un Garantia

HISTORIA ta yen di promesa ku nunka a kumpli. Hopi bes nashonnan no a tene nan mes na e paktonan solèm ku nan a sera pa evitá agreshon. Esaki a hiba nan pueblo na gueranan teribel. Napoleon a yega di remarká: “Gobièrnunan ta tene nan mes na promesanan solamente ora nan haña nan fòrsá pa hasié, òf ora ta kumbiní nan.”

Kiko di promesanan ku hende individual ta hasi? Ta hopi desepshonante ora un hende no tene su mes na su promesa. Esaki ta asina foral si ta trata di un hende ku bo konosé i ta konfia. Klaru, ku bo por haña hende ku sea no ta kapas òf no ta dispuesto pa kumpli ku nan promesanan.

Esta un diferensia grandi tin entre promesanan di hende i promesanan di Dios! Bo por konfia e promesanan di Dios plenamente. Kualkier promesa ku Yehova Dios hasi ta un garantia riba su mes. Nan lo kumpli sigur. Refiriendo na Dios su palabra konfiabel, Isaias 55:11 ta bisa: “Asina mi palabra ku ta sali for di mi boka lo ta; e lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.”

Pues anto, kon nos mester mira e promesanan di Dios skirbí den Beibel? Di bèrdat nos por konfia den nan. Por ehèmpel, apòstel Juan a skirbi: “Mira, e tabernakel di Dios ta meimei di hende, i e lo biba meimei di nan, i nan lo ta su pueblo, i Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” (Revelashon 21:3, 4) Bo por gosa di e bendishonnan ei si bo aktua na armonia ku e palabranan di Hesus: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.”—Juan 17:3.