Bai na kontenido

Bai na kontenido

Kòmbersashon Spiritual Ta Edifiká

Kòmbersashon Spiritual Ta Edifiká

 Kòmbersashon Spiritual Ta Edifiká

“No laga ningun palabra dañino sali for di boso boka, sino solamente palabra ku ta bon pa edifikashon, konforme e nesesidat di e momentu, pa esaki por duna grasia na esnan ku ta tende.”—EFESIONAN 4:29.

1, 2. (a) Kon balioso abla humano ta? (b) Kon sirbidónan di Yehova ke usa nan lenga?

“ABLA humano ta un sekreto; e ta un regalo di Dios, un milager.” Asina e leksikógrafo Ludwig Koehler a skirbi. Podisé nos no ta konsiderá e regalo presioso aki di Dios komo gran kos. (Santiago 1:17) Pero pensa riba e gran pèrdida ku nos ta sinti ora un atake selebral pone ku un ser kerí no por ekspresá su mes na un manera komprendibel mas. Joan, kende su kasá resientemente a sufri un atake selebral, a bisa: “Nos tabatin un komunikashon ekselente ku a hasi nos hopi será ku otro. Mi ta sinti hopi falta di nos kòmbersashonnan.”

2 Kòmbersashon por fortalesé amistat, drecha un mal komprondementu, animá esnan deprimí, hasi fe firme i enrikesé bida; pero e no ta bai outomátikamente. Rei sabí Salomon a bisa: “Tin hende ta papia sin pensa, manera hinká di spada, ma lenga di hende sabí ta trese kuramentu.” (Proverbionan 12:18) Komo sirbidó di Yehova, nos ke pa nos kòmbersashonnan restorá i edifiká otro hende en bes di hùrt nan i kaba ku nan. Tambe nos ke usa nos lenga pa alabá Yehova, tantu den nos sirbishi públiko komo den nos kòmbersashonnan privá. E salmista a kanta: “Nos a duna gloria na Dios tur ora bai i nos ke alabá bo nòmber sin fin.”—Salmo 44:8, BPK.

3, 4. (a) Ki problema nos tur ta enfrentá relashoná ku nos abla? (b) Dikon loke nos ta papia ta importante?

3 Disipel Santiago a spièrta: “Ma lenga ningun hende no por mansa.” Anto el a rekordá nos: “Nos tur ta trompeká na hopi manera. Si un hende no ta trompeká den loke e ta bisa, e ta un hende perfekto, kapas pa frena henter e kurpa tambe.” (Santiago 3:2, 8) Niun di nos no ta perfekto. P’esei, apesar ku di bèrdat nos lo ke usa nos abla bon, no ta semper e ta edifiká otro hende ni duna alabansa na nos Kreadó. Pues anto, nos tin ku siña paga tinu kiko nos ta papia. Ademas, Hesus a bisa: “Hende lo duna kuenta riba e dia di huisio di kada palabra bano ku nan papia. Pasobra segun bo palabranan lo bo wòrdu hustifiká, i segun bo palabranan lo bo wòrdu kondená.” (Mateo 12:36, 37) Sí, e Dios berdadero ta tene nos responsabel pa nos palabranan.

4 Un di e mihó maneranan pa evitá abla perhudisial ta dor di desaroyá e kustumber di partisipá den kòmbersashonnan spiritual. E artíkulo aki lo trata kon nos por hasi esei, ki sorto di tema nos por papia riba dje, i ki benefisionan nos por saka for di abla edifikante.

Wak Kiko Tin den Bo Kurason

5. Kon nos kurason ta hunga un papel importante den promové kòmbersashon edifikante?

5 Pa nos kultivá e kustumber di partisipá den kòmbersashonnan edifikante, nos tin ku rekonosé promé ku nos abla ta reflehá loke tin den nos kurason. Hesus a bisa: “For di abundansia di kurason boka ta papia.” (Mateo 12:34) Simpel bisá, nos ta papia tokante kosnan ku nos ta  haña importante. P’esei nos tin ku puntra nos mes: ‘Kiko mi kòmbersashonnan ta revelá tokante loke tin den mi kurason? Ora mi ta ku mi famia òf ku mi rumannan den fe, mi kòmbersashon ta enfoká riba asuntunan spiritual òf kasi semper e ta bai riba deporte, paña, pelíkula, kuminda, kosnan ku mi a kaba di kumpra òf kualkier kos di ménos importansia?’ Podisé sin ku nos a ripará, nos bida i nos pensamentunan awor ta drei rònt di asuntunan sekundario. Dor di ahustá nos prioridatnan, nos lo mehorá tantu nos kòmbersashon komo nos bida.—Filipensenan 1:10, NW.

6. Ki papel meditashon ta hunga den nos kòmbersashonnan?

6 Un otro manera pa mehorá e kalidat di loke nos ta papia ta dor di meditá ku un propósito. Si konsientemente nos ta hasi esfuerso pa pensa riba asuntunan spiritual, nos lo ripará ku di mes nos lo kòmbersá riba asuntunan spiritual. Rei David a mira e konekshon aki. El a kanta: “Laga e palabranan di mi boka i e meditashon di mi kurason ta aseptabel den bo bista, o SEÑOR.” (Salmo 19:14) I e salmista Asaf a bisa: “Lo mi meditá riba tur bo [Dios su] obranan, i keda pensa riba bo echonan.” (Salmo 77:12) Un kurason i mente ku ta enfoká riba e bèrdatnan di e Palabra di Dios, di mes lo brota ku abla digno di alabansa. Jeremias no por a keda sin papia tokante e kosnan ku Yehova a siñ’é. (Jeremias 20:9) Asina tambe lo por pasa ku nos si regularmente nos ta reflekshoná riba asuntunan spiritual.—1 Timoteo 4:15, NW.

7, 8. Ki tópikonan ta bon pa kòmbersashon edifikante?

7 Un bon rutina spiritual ta duna nos kantidat di tema pa kòmbersashon edifikante. (Filipensenan 3:16, NW) Asambleanan, kongresonan, reunionnan di kongregashon, publikashonnan aktual i e teksto di dia ku su komentario, tur ta duna nos hoyanan spiritual ku nos por kompartí. (Mateo 13:52) I eksperensianan ku nos tin den sirbishi kristian por ta un gran estímulo spiritual!

8 Rei Salomon tabata fasiná ku e gran variedat di palu, bestia, para i piská ku el a opservá den Israel. (1 Reinan 4:33) El a gusta kòmbersá tokante Dios su obranan di kreashon. Nos por hasi meskos. Yehova su sirbidónan gusta papia tokante un variedat di tema, pero semper bo ta haña tópikonan spiritual den kòmbersashon di hende ku tin inklinashon pa kosnan spiritual.—1 Korintionan 2:13.

“Laga Esakinan Okupá Boso Mente”

9. Ki instrukshon Pablo a duna e filipensenan?

9 Sea kual sea e tópiko, nos kòmbersashonnan lo edifiká otro hende si nan ta na armonia ku e instrukshon ku apòstel Pablo a duna e kongregashon di Filipos. El a skirbi: “Tur loke ta berdadero, tur loke ta onorabel, tur loke ta hustu, tur loke ta puru, tur loke ta bunita, tur loke ta di bon fama, si tin algun birtut i si tin algu digno di alabansa, laga esakinan okupá boso mente.” (Filipensenan 4:8) E kosnan ku Pablo a menshoná ta asina importante ku el a bisa pa “laga esakinan okupá boso mente.” Nos mester yena nos mente i kurason ku nan. P’esei laga nos wak kon dor di presta atenshon na kada un di e ocho kosnan ku Pablo a menshoná, nos por mehorá nos kòmbersashonnan.

10. Kon nos kòmbersashonnan por enserá kosnan ku ta berdadero?

10 Loke ta berdadero ta enserá mas ku solamente informashon ku ta korekto i no falsu. E ta referí na algu ku ta rekto i digno di konfiansa, manera por ehèmpel e bèrdat di e Palabra di Dios. P’esei, ora nos ta papia ku hende tokante e bèrdatnan bíbliko ku a impreshoná nos, òf diskursonan ku a animá nos òf konseho bíbliko ku a yuda nos, nos ta okupando nos mente ku loke ta berdadero. Di otro banda, nos ta rechasá “loke falsamente ta wòrdu yamá ‘konosementu,’” esta, kosnan ku solamente tin un aparensia di ta bèrdat. (1 Timoteo 6:20) I nos ta evitá di konta redu òf eksperensianan dudoso ku no por ser konfirmá.

11. Kua ta algun tópiko onorabel ku nos por inkluí den nos kòmbersashonnan?

11 Loke ta onorabel [òf, “di konsiderashon  serio,” NW] ta tópikonan ku ta ekspresá dignidat i ku ta importante, no ko’i kèns òf kos insignifikante. Nan ta inkluí aspektonan di nos sirbishi kristian, e tempu trabahoso den kua nos ta biba, i e nesesidat pa nos mantené bon kondukta. Ora nos ta papia tokante asuntunan serio asina, nos ta reforsá nos determinashon pa keda spiritualmente lantá, mantené nos integridat i sigui prediká e bon nobo. Sí, nos eksperensianan interesante den sirbishi i susesonan aktual ku ta rekordá nos ku nos ta bibando den e último dianan, ta duna nos un variedat di informashon ku nos por usa pa kòmbersashonnan stimulante.—Echonan 14:27; 2 Timoteo 3:1-5.

12. En bista di Pablo su konseho pa okupá nos mente ku kosnan ku ta hustu i puru, kiko nos mester evitá?

12 E palabra hustu ta nifiká ser korekto den bista di Dios, kumpliendo ku su normanan. Puru ta transmití e idea di puresa den pensamentu i kondukta. Den nos kòmbersashonnan no tin lugá pa kalumnia, chistenan sushi òf pa kosnan di dòbel sintí. (Efesionan 5:3; Kolosensenan  3:8) Sea ta na trabou òf na skol, kristiannan sabí ta alehá nan mes ora ku kòmbersashonnan kuminsá bai den e direkshon ei.

13. Duna algun ehèmpel di kòmbersashonnan ku ta enfoká riba kosnan bunita i di bon fama.

13 Ora Pablo ta rekomendá pa nos pensa riba kosnan bunita [literalmente, kosnan ku ta stimulá kariño], e ta referí na kosnan ku ta agradabel òf ku ta inspirá amor, kontrario na loke ta provoká odio, amargura òf pleitu. Loke ta di bon fama ta inkluí relatonan di bida di rumannan fiel, ku ta sali publiká regularmente den e revistanan Toren di Vigilansia i Spièrta! Despues ku bo kaba di lesa e artíkulonan fortalesedor di fe aki, dikon bo no ta kompartí loke bo a siña ku otro hende? I ta masha animante pa tende di e logronan spiritual di otro hende. E tipo di kòmbersashonnan ei lo promové amor i union den e kongregashon.

14. (a) Pa nos desplegá birtut, kiko nos mester hasi? (b) Kon nos abla por inkluí kosnan digno di alabansa?

14 Pablo ta papia di “si tin algun birtut.” Birtut ta referí na bondat òf ekselensia moral. Nos mester hasi esfuerso pa nos lepnan ser guiá dor di prinsipionan bíbliko i pa nan no desviá for di loke ta hustu, puru i birtuoso. Algu ku ta digno di alabansa ta un kos ku ta meresé elogio. Si bo tende un bon diskurso òf ta nota un fiel ehèmpel den kongregashon, papia tokante dje, tantu ku e persona konserní komo ku otro hende. Apòstel Pablo ku frekuensia a elogiá e bon kualidatnan di su rumannan den fe. (Romanonan 16:12; Filipensenan 2:19-22; Filemon 4-7) I klaru ku e obranan di kreashon di nos Kreadó ta realmente digno di alabansa. Den nan nos ta haña un abundansia di tópiko pa kòmbersashon edifikante.—Proverbionan 6:6-8; 20:12; 26:2.

Partisipá den Kòmbersashon Edifikante

15. Kua mandamentu bíbliko ta obligá mayornan tene kòmbersashonnan signifikativo ku nan yunan?

15 Deuteronomio 6:6 i 7 ta bisa: “E palabranan aki, ku mi ta ordená bo awe, mester ta riba bo kurason. Siña nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” Ta bisto ku e mandamentu aki ta eksigí pa mayornan tene kòmbersashonnan signifikativo i spiritual ku nan yunan.

16, 17. Kiko mayornan kristian por siña for di e ehèmpel di Yehova i Abraham?

16 Nos por imaginá e kòmbersashonnan largu ku Hesus lo mester tabatin ku su Tata selestial ora nan tabata papia tokante su asignashon riba tera. Hesus a bisa su disipelnan: “E Tata ku a manda mi a duna mi mandamentu, kiko pa bisa i kiko pa papia.” (Juan 12:49; Deuteronomio 18:18) E patriarka Abraham tambe lo mester a pasa hopi tempu papiando ku su yu Isaak tokante kon Yehova a bendishoná nan i nan antepasadonan. E kòmbersashonnan ei siguramente a yuda tantu Hesus komo Isaak pa someté nan mes humildemente na e boluntat di Dios.—Génesis 22:7-9; Mateo 26:39.

17 Nos yunan tambe tin mester di kòmbersashon edifikante. Mayornan tin ku traha tempu den nan programa drùk pa papia ku nan yunan. Si ta posibel, pakiko no hasi areglo pa  kome huntu komo famia por lo ménos un biaha pa dia? Durante i despues di tal ora di kome, boso tin chèns pa tene kòmbersashonnan edifikante ku por resultá sumamente balioso pa e bienestar spiritual di e famia.

18. Konta un eksperensia ku ta mustra e benefisionan di bon komunikashon entre mayor i yu.

18 Alejandro, un pionero di bint’i piku aña, ta kòrda e dudanan ku e tabatin komo hóben di 14 aña. El a konta: “Debí na e influensia di kompañeronan di skol i dosentenan, mi a kuminsá duda ku Dios ta eksistí òf ku Beibel ta outéntiko. Mi mayornan a tuma hopi tempu pa rasoná ku mi ku pasenshi. E kòmbersashonnan aki a yuda mi vense no solamente mi dudanan durante e periodo difísil aki, sino tambe a yuda mi tuma bon desishon den mi bida.” I kiko di awor? Alejandro ta sigui konta: “Ainda mi ta biba na kas. Pero nos programa ta asina yen ku ta difísil pa ami ku mi tata papia privadamente. P’esei nos dos ta kome huntu un biaha pa siman na su trabou. Di bèrdat mi ta apresiá e kòmbersashonnan aki.”

19. Dikon nos tur tin mester di kòmbersashonnan spiritual?

19 Nos no ta apresiá tambe e oportunidatnan ku nos tin pa disfrutá di kòmbersashon spiritual ku nos rumannan den fe? Nos ta haña e oportunidatnan aki na reunion, den sirbishi di vèlt i na reunionnan sosial i ora nos bai di biahe. Pablo a spera ku anhelo pa por a papia ku e kristiannan na Roma. El a skirbi nan: “Mi ta anhelá di mira boso, . . . pa mi por wòrdu enkurashá huntu ku boso, miéntras ku mi ta serka boso, kada un di nos dor di fe di e otro, tantu e fe di boso komo e fe di mi.” (Romanonan 1:11, 12) Johannes, un ansiano kristian, a remarká: “Kòmbersashonnan spiritual ku rumannan kristian ta satisfasé un nesesidat importante. Esei ta laga bo sinti bon i ta aliviá e karganan di tur dia. Hopi bes mi ta pidi rumannan di edat avansá pa nan konta mi tokante nan bida i tokante loke a yuda nan keda fiel. Atraves di añanan, mi a papia ku hopi di nan, i kada un a duna mi un poko sabiduria òf iluminashon ku a enrikesé mi bida.”

20. Kiko nos por hasi si nos topa un persona ku ta tímido?

20 Kiko si un persona ta parse indiferente ora bo ta purba papia di un tema spiritual? No entregá. Podisé bo por haña un tempu mas oportuno despues. Salomon a bisa: “Un palabra papiá na ora apropiá ta manera un apel di oro den montura di plata.” (Proverbionan 25:11) Mustra komprenshon na esnan ku ta tímido. “Un plan den kurason di un hende ta manera awa hundu, ma un hende di komprondementu ta saka esaki afó.” * (Proverbionan 20:5) Mas ku tur kos, nunka laga e aktitut di otro hende stroba bo di papia tokante e kosnan ku ta konmové bo kurason.

Kòmbersashonnan Spiritual Ta Duna Rekompensa

21, 22. Ki benefisionan nos ta saka dor di partisipá den kòmbersashonnan spiritual?

21 Pablo a konsehá: “No laga ningun palabra dañino sali for di boso boka, sino solamente palabra ku ta bon pa edifikashon, konforme e nesesidat di e momentu, pa esaki por duna grasia na esnan ku ta tende.” (Efesionan 4:29; Romanonan 10:10) Kisas nos mester hasi  esfuerso pa dirigí kòmbersashonnan den e direkshon korekto, pero e rekompensanan ta hopi. Kòmbersashonnan spiritual ta yuda nos kompartí nos fe ku otro hende i edifiká nos hermandat.

22 Pues anto, laga nos usa e don di papia pa animá otronan i alabá Dios. E tipo di kòmbersashonnan ei lo ta un fuente di satisfakshon pa nos i un animashon pa otro hende. Mas ku tur kos, nan lo hasi Yehova su kurason kontentu pasobra e ta presta atenshon na nos kòmbersashonnan i ta alegrá ora nos ta usa nos lenga na e manera korekto. (Salmo 139:4; Proverbionan 27:11) Ora nos kòmbersashonnan ta spiritual, nos por tin sigur ku Yehova lo no lubidá nos. Refiriendo na e hendenan ku ta sirbi Yehova den nos tempu, Beibel ta deklará: “E ora ei esnan ku a teme SEÑOR a papia ku otro, i SEÑOR a presta atenshon i a tende esaki, i un buki di memoria a wòrdu skirbí su dilanti pa esnan ku ta teme SEÑOR i ku ta onra su nòmber.” (Malakias 3:16; 4:5) Ta masha importante anto pa nos kòmbersashonnan ta spiritualmente edifikante!

[Nota]

^ par. 20 Algun pos den Israel tabata hopi hundu. Na Gabaon, arkeólogonan a deskubrí un depósito di awa na un profundidat di 25 meter. E tabatin tret òf ‘tree’ kobá den baranka, loke a yuda hende baha bai den dje pa saka awa.

Kon Lo Bo Kontestá?

• Kiko nos kòmbersashonnan ta revelá tokante nos?

• Kiko ta e kosnan edifikante ku nos por papia tokante dje?

• Ki papel importante kòmbersashon ta hunga den famia i den e kongregashon kristian?

• Kua ta e benefisionan di kòmbersashon edifikante?

[Preguntanan di Estudio]

[Plachinan na página 12]

Kòmbersashonnan edifikante ta enfoká riba . . .

“tur loke ta berdadero”

“tur loke ta onorabel”

“algu digno di alabansa”

“tur loke ta di bon fama”

[Rekonosementu]

Kaft di vidio, Stalin: U.S. Army photo; Kaft di buki Kreadó, Eagle Nebula: J. Hester and P. Scowen (AZ State Univ.), NASA

[Plachi na página 13]

Ora di kome ta un bon oportunidat pa tene kòmbersashonnan spiritual