E Punto Di Bista Bíblico

Bo Mester Risca Bo Bida cu “Deportenan Extremo”?

“E DIANAN AKI MAS I MAS DI NOS A BANDONÁ E ASIENTO DI OBSERVADÓ PA NOS MES BULA FOR DI AVION, BAHA CU CABUYA FOR DI CERU, PASA CU CANOA RIBA WATERVAL I LANDA CU TRIBON.”—KORANT WILLOW GLEN RESIDENT.

E COMENTARIO aki ta describí un tendencia creciente den deporte. E gran aumento den popularidad di actividadnan manera skydiving, ice climbing, paragliding, i BASE jumping * ta reflehá un mundu cu ta enamorá di core riesgo. Tambe hende ta usa snowboard, mountain bike, skateboard i in-line skate pa extendé nan límitenan personal dor di purba conkistá e cerunan di mas steil i barancanan di mas haltu i e saltonan di mas largu. Manera e revista Time ta bisa, e creciente popularidad di “deportenan extremo”—deportenan den cua e participantenan ta core riesgo personal grandi—ta resaltá con ansioso miyones di hende ta pa cana na “e rand figurativo, caminda peliger, abilidad i miedu ta combiná pa duna tantu competidónan di fin di siman como atletanan profesional e sintimentu di ta extendé nan límitenan personal.”

Sin embargo, e aumento aki den popularidad ta trece cuné tambe un alto costo personal. Mas i mas hende ta ser lesioná ora cu hiba deportenan cu ta relativamente safe te den extremo. Na Merca durante 1997, bishitanan na Poli pa lesionnan relacioná cu corementu di skateboard a aumentá cu mas di 33 porciento, cu snowboard 31 porciento i cu subimentu di ceru 20 porciento. Pa otro deportenan, e resultadonan ta asta mas dramático, manera ta bisto n’e cantidad creciente di morto relacioná cu deportenan extremo. Proponentenan dje deportenan aki ta conciente dje peligernan. Un muher cu ta participá den skimentu extremo ta bisa: “Constant mi tin morto na mente.” Un coredó profesional di snowboard ta resumié bisando cu si “bo no ser lesioná, anto e ora ei bo no ta haciendo suficiente esfuerso.”

En bista dje echonan aki, con un cristian mester mira  participacion den actividadnan asina? Con Bijbel por yuda nos dicidí si nos mester participá den deportenan extremo? Un consideracion di loke Dios ta opiná dje santidad di bida lo yuda contestá e preguntanan aki.

Dios Su Punto di Bista di Bida

Bijbel ta bisa nos cu Jehova ta “e fuente di bida.” (Salmo 36:9) Fuera di crea hende, el a soru tambe pa duna nos loke nos mester pa disfrutá di bida. (Salmo 139:14; Echonan 14:16, 17; 17:24-28) P’esei ta razonabel pa concluí cu e ta verwagt cu nos lo cuida loke el a duna nos asina bondadosamente. Ley i principionan duná n’e nacion di Israel ta yuda nos apreciá e echo ei.

E Ley di Moises a rekerí di un persona p’e tuma cierto precaucionnan pa protehá bida di otronan. Si no a haci esaki i un hende a perde su bida, lo a considerá esun cu por a prevení e tragedia culpabel di sanger. Por ehempel, e Ley a manda cu un doño di cas mester a traha un muraya of rand no muchu haltu rond dje dak plat di su cas nobo. Sino, culpa di sanger lo a bini riba e cas si un hende a cai for dje dak i muri. (Deuteronomio 22:8) Si un toro a hinca un hende mata cu su cachu inesperadamente, no por a tene e doño dje toro responsabel. Di otro banda, si tabata conocí cu e toro ta peligroso i a spierta e doño pero e no a tene e toro bon wardá, e ora ei, si e toro a hinca un hende, lo a considerá e doño dje toro culpabel di sanger i por a mat’é. (Éxodo 21:28, 29) Como cu bida ta precioso den bista di Jehova, su Ley a duna masha importancia na conserbá i protehá bida.

Fiel sirbidónan di Dios a comprendé cu e principionan aki a conta pa corementu di riesgo personal tambe. Den un relato bíblico, David a expresá cu e tabatin masha gana di por “bebe awa for dje renbak di Betlehem.” Betlehem tabata bou di control di filisteo e tempu ei. Ora tres soldá di David a tende su deseo, nan a bringa drenta den e campamentu filisteo, saca awa for dje renbak di Betlehem i a trec’é pa David. Con David a reaccioná? E no kier a bebe e awa sino, mas bien a bash’é abou na suela. E di: “Ta inconcebibel di mi parti, pa loke ta mi Dios, pa haci esaki! Ta e sanger dje hombernan aki cu a risca nan alma mi tin cu bebe? Pasobra tabata riscando nan alma cu nan a trec’é.” (1 Crónicanan 11:17-19) Pa David tabata inconcebibel risca un bida pa su satisfaccion personal.

Jesus a reaccioná den un manera similar ora cu, probablemente den un vision, Diabel a tent’é pa tira su mes abou for di dak dje tempel pa wak si e angelnan lo no a proteh’é di lesion. Jesus a respondé: “Bo no mag pone Jehova bo Dios na prueba.” (Mateo 4:5-7) Sí, tantu David como Jesus a reconocé cu tabata robes den bista di Dios pa core riesgonan innecesario cu lo por a peligrá bida humano.

Cu e ehempelnan aki na mente, kisas nos ta puntra nos mes: ‘Con bo ta distinguí loke ta un deporte extremo of peligroso? Ya cu asta formanan comun di recreo, cu riba nan mes no ta peligroso, por ser hibá te na extremo, con nos por determiná te con leu nos mester bai?’

E Ta Bal e Riesgo?

Un evaluacion onesto di cualkier actividad cu nos lo por ta contemplá pa haci, lo yuda nos determiná e contesta. Por ehempel, nos por puntra nos mes: ‘Cuantu accidente ta tuma lugá den e deporte aki? Mi tin e training of ekipo protectivo necesario pa prevení lesion? Kico ta e consecuencianan si mi cai of haci un mal calculacion di un salto of si mi ekipo di siguridad faya? Esei lo ta djis un accidente chikitu, of tin e posibilidad di lesion grave of morto?’

Core riesgo innecesario den nomber di recreo por afectá un cristian berdadero su relacion cu Jehova i tambe su posibilidad pa ta elegibel pa privilegionan special den congregacion. (1 Timoteo 3:2, 8-10; 4:12; Tito 2:6-8) Ta keda claro anto cu asta ora cristiannan ta participá den actividadnan di recreo, nan ta haci bon di tene cuenta cu e manera cu e Creador ta mira santidad di bida.

[Nota]