Durante e tempu ku Hesus tabata siña e hendenan den e region di Sesarea di Filipo, ku tabata keda un 25 kilometer for di Seru Hermon, el a bisa su apòstelnan algu ku a sorprendé nan. El a bisa: “Di bèrdat mi ta bisa boso ku tin algun hende pará akinan ku lo no muri promé ku nan mira e Yu di hende bini den su Reino.”—Mateo 16:28.

Kasi sigur nan lo a puntra nan mes kiko Hesus lo tabata ke men. Awor bon, mas o ménos un siman despues, Hesus a bai riba un seru haltu ku tres di su apòstelnan—Pedro, Santiago i Huan. Probablemente tabata anochi, pasobra nan tur tres tabatin soño. Miéntras ku Hesus tabata hasi orashon, e apòstelnan a mira kon su kara a kuminsá bria manera solo i kon su paña a bira blanku briante manera lus.

Despues, dos persona a aparesé: “Moises i Elías.” Nan a kuminsá kòmbersá ku Hesus tokante ‘su baimentu ku lo mester a tuma lugá na Herúsalèm.’ (Lukas 9:30, 31) Evidentemente, nan tabata papia di Hesus su morto i resurekshon, loke Hesus mes a papia di dje kaba mas promé. (Mateo 16:21) E kòmbersashon akí a duna prueba ku, kontrario na loke Pedro a urgi Hesus, Hesus su morto humiante no tabata algu ku por a ser evitá.

E tres apòstelnan, kendenan na e momento ei sí tabata bon lantá, a keda asombrá; nan tabata opservá i skucha ku atenshon. Loke nan tabata eksperensiá tabata un vishon, pero esaki a parse asina real ku Pedro a enbolbé su mes den e kòmbersashon. El a bisa Hesus: “Rabi, ta masha bon ku nos ta akinan. Pues laga nos lanta tres tènt: ún pa bo, ún pa Moises i ún pa Elías.” (Marko 9:5) Dikon Pedro tabata ke lanta tres tènt? Akaso e tabata ke hasi esei pa e vishon dura un poko mas?

Miéntras ku Pedro tabata papia ainda, un nubia briante a tapa nan i un stèm for di e nubia a bisa: “Esaki ta mi Yu stimá, esun ku tin mi aprobashon; skuch’é.” Ora e apòstelnan a tende e stèm di Dios, nan a tira nan kurpa abou i a haña miedu. Pero Hesus a bisa nan: “Lanta ariba; no tene miedu.” (Mateo 17:5-7) Ora nan a lanta, nan no a mira ningun otro persona mas huntu ku nan, sino Hesus so. E vishon a kaba. E siguiente mainta, ora nan tabata baha for di e seru, Hesus a ordená nan pa “no konta ningun hende e vishon, sino te ora ku e Yu di hende ser lantá for di morto.”—Mateo 17:9.

Awor, komo ku Elías a aparesé den e vishon, e apòstelnan a puntra Hesus: “Dikon anto e eskribanan ta bisa ku Elías mester bini promé?” Hesus a kontestá nan: “Elías a bini kaba, i nan no a rekonos’é.” (Mateo 17:10-12) Hesus tabata papia di Huan Boutista, kende a hunga un papel similar na esun di Elías. Kon asina? Elías a prepará e kaminda pa Eliseo, i Huan a prepará e kaminda pa Kristu.

E vishon sigur a fortalesé tantu Hesus komo su apòstelnan. E vishon a duna un bista adelantá di Kristu den su Reino glorioso. Di e manera ei, e disipelnan a mira “e Yu di hende bini den su Reino,” manera Hesus a primintí. (Mateo 16:28) Sí, ora nan tabata riba e seru, nan a bira “testigu okular di [Hesus] su splendor magnífiko.” Aunke e fariseonan tabata ke pa Hesus duna nan un señal pa proba ku e tabata e Rei ku Dios a skohe, e no a hasi esei. Di otro banda, Hesus su disipelnan di mas será sí a mira Hesus den su gloria mediante un vishon, esta, e transfigurashon, ku a duna prueba ku e profesianan tokante e Reino ta verídiko. P’esei Pedro a skirbi mas despues: “E palabra profétiko a bira mas sigur pa nos.”—2 Pedro 1:16-19.