Storia di Bida

Un Huerfano Bandona Ta Haya un Tata Amoroso

SEGUN E RELATO DI DIMITRIS SIDIROPOULOS

Bentando un rifle abou mi dilanti, e oficial a rous mi: “Ban mira, coi e arma ei y tira.” Mi a nenga trankilamente. Hororisa e soldanan para eibanda a mira con e balanan di scopet di e oficial a cuminsa skeiro rond di mi. A parce cu mi tawata a punto di muri. Felismente, mi a sobrevivi. Pero esaki no tawata e prome biaha cu mi bida tawata na peliger.

MI FAMIA tawata Griego y a biba serca di Kayseri, na Capadocia, Turkia. Aparentemente algun persona di e area ei a acepta Cristianismo den e prome siglo di nos era. (Echonan 2:9) Sinembargo, pa principio di siglo 20 e situacion a cambia drasticamente.

Di Refugiado pa Huerfano

Un par di luna despues cu mi a nace na 1922, conflicto etnico a obliga mi famia hui bai Grecia como refugiado. E unico cos cu mi mayornan morto spanta a bai cu ne tawata ami, nan baby di dies luna. Despues di a sufri masha hopi miseria, nan a yega den un condicion deplorabel na e pueblito di Kiria, serca di e stad Drama, den parti nort di Grecia.

Ora mi tawatin cuater aña, y un poco despues cu mi ruman homber chikito a nace, mi tata a muri. E tawatin apenas 27 aña, pero e sufrimento di e temponan traumatico ei a caba cu ne. Mama a pasa den miseria teribel, y poco despues e tambe a muri. Ami cu mi ruman homber a keda completamente desampara. Nos a pasa di un orfanato pa otro, y na edad di 12 aña, mi a bai para den un orfanato na Tesalonica, caminda mi a ricibi entrenamento como mecanico.

 Segun cu mi tawata crece entre e murayanan friu y inhospitalario di e orfanatonan, mi tawata puntra dicon cierto hende ta pasa den asina tanto sufrimento y inhusticia. Mi tawata puntra mi mes dicon Dios ta permiti tal condicionnan tristo. Den nos lesnan di educacion religioso, nan tawata siña nos cu Dios ta todopoderoso, pero nan no tawata duna un splicacion rasonabel dicon tawata reina asina tanto maldad. Un dicho popular tawata bisa cu Iglesia Griego Ortodox ta e miho religion. Ora mi a puntra: “Si Iglesia Ortodox ta e miho religion, dicon tur hende no ta Ortodox?”, mi no a haya un contesta satisfactorio.

Sinembargo, nos maestro tawatin un respet profundo pa Bijbel, y el a graba den nos mente cu e ta un buki sagrado. E director di e orfanato a desplega e mesun actitud, pero pa un motibo desconoci e no tawata participa den servicionan religioso. Ora mi a puntra tocante esei, nan a bisa mi cu un tempo el a yega di studia cu Testigonan di Yehova, un religion cu mi no tawata conoce.

Mi tawatin 17 aña ora cu mi educacion na e orfanato di Tesalonica a termina. Ya Segundo Guera Mundial a cuminsa, y Grecia tawata bou di dominio Nazi. Hende tawata muri den caya di hamber. Pa mi por a sobrevivi mi a hui bai den cunucu pa traha como peon pa masha tiki placa.

Bijbel Ta Duna Contesta

Ora mi a regresa Tesalonica na april 1945, mi a haya bishita di e ruman mohe di un di mi amigonan di infancia cu ken mi a biba den varios orfanato. Paschalia a conta mi cu su ruman homber a disparce y el a puntra mi si mi tawata sa di su paradero. Durante e combersacion Paschalia a bisa mi cu e ta un Testigo di Yehova y el a menciona Dios su interes den hende.

Amarga, mi a lansa hopi obhecion. Dicon mi ta sufriendo desde mi infancia? Dicon mi a bira huerfano? Unda Dios ta ora cu nos tin mas mester di dje? Paschalia a contesta: “Bo tin sigur cu ta Dios su falta cu e cosnan aki ta tuma luga?” Uzando su Bijbel, el a mustra mi cu Dios no ta pone hende sufri. El a yuda mi mira cu e Creador stima hende y cu pronto lo e drecha e situacion. Uzando textonan biblico manera Isaias 35:5-7 y Revelacion 21:3 y 4, el a mustra mi cu pronto Dios lo elimina guera, conflicto, malesa y morto, y cu hende fiel lo biba pa semper riba tera.

Mi Ta Haya un Famia Cu Ta Apoya Mi

Despues mi a haya sa cu e ruman homber di Paschalia a muri den un bringamento di e forsanan di gueria. Mi a bishita su famia pa consola nan, pero na luga di esei ta nan a duna mi consuelo for di e Scritura. Mi a bai bek pa mas consuelo for di Bijbel, y den corto tempo mi a bira parti di un grupo chikito di Testigonan di Yehova cu tawata reuni den secreto pa studia y adora. Apesar cu e actividadnan di e Testigonan tawata prohibi, mi tawata dicidido pa sigui asocia cu nan.

Den e grupo di Cristiannan humilde ei, mi a haya e ambiente familiar caluroso y amoroso cu mi tawata sinti falta di dje. Nan a percura e apoyo y yudansa spiritual cu desesperadamente mi tawatin mester. Serca nan mi a haya amigonan desinteresa y amoroso, cu tawata cla y dispuesto pa yuda mi y consola mi. (2 Corintionan 7:5-7) Mas importante ainda, nan a yuda mi hala mas serca di Yehova, kende mi tawata mira awor como mi amoroso Tata celestial. Yehova su cualidadnan di amor, compasion y interes profundo tawata masha atractivo. (Salmo 23:1-6) Porfin mi a haya un famia spiritual y un Tata amoroso! Esei a conmove mi curason. Poco despues mi a sinti mi motiva pa dedica mi mes na Yehova, y mi a batisa na september 1945.

Segun cu mi tawata asisti na reunionnan Cristian mi conocemento a aumenta y mi fe tambe a bira mas firme. Como cu no tawatin ningun otro medio di transporte, varios di nos  hopi bes tawata cana e 6,5 kilometer cu tawatin entre nos pueblito y e luga di reunion, y na caminda nos tawatin combersacionnan spiritual inolvidabel. Casi na final di aña 1945 mi a haya sa di e oportunidad di participa tempo completo den e trabou di predica, y mi a cuminsa traha como pionero. Un relacion fuerte cu Yehova tawata masha importante, ya cu poco despues mi fe y integridad a ser poni na prueba te na su limite.

Oposicion Tin un Efecto Contrario

Cada bes polis tawata invadi nos reunion bou di menasa di arma. E pais tawata bou di lei militar, ya cu tawatin un guera civil ta tumando luga den Grecia. Gruponan opositor tawata ataca otro cu un odio salbahe. E miembronan di clero a probecha di e situacion y a combence autoridadnan cu nos tawata comunista y a pone nan persigui nos ferosmente.

Durante un periodo di dos aña, ami cu dos ruman pionero a wordo aresta varios biaha, y seis biaha nan a sentencia nos te na cuater luna di prizon. Sinembargo, e prizonnan tawata yen caba cu presonan politico, pesei nan a laga nos liber. Nos a uza nos libertad inespera pa sigui predica, pero despues di poco tempo nan a bolbe aresta nos, tres biaha den e mesun siman. Nos tawata sa cu hopi di nos rumannan a keda exilia pa islanan desola. Mi fe lo tawata suficiente fuerte pa confronta un prueba asina?

E situacion a bira sumamente dificil ora cu mi a haya libertad condicional y mester a raporta na warda di polis tur dia. Pa nan por a vigila mi, e autoridadnan a manda mi e pueblito Evosmos, serca di Tesalonica, caminda tawatin un warda di polis. Mi a huur un cuarto djis pega cu e warda, y pa mantene mi mes, mi a cuminsa traha como artesano ambulante; mi tawata polish weya y panchi di coper. Segun cu mi a traha pionero den e pueblitonan den bicindario, e ofishi aki a haci posibel cu mi por a bai e casnan facilmente sin lanta sospecho di polis. Como resultado, varios hende a tende e bon nobo y a reacciona faborabel. Cu tempo, mas cu dies di nan a bira adoradonan dedica di Yehova.

Den Dies Aña, Ocho Prizon

Mi a keda bou di vigilancia di polis te na fin di 1949, e ora ei mi a regresa Tesalonica, ansioso pa sigui den e sirbishi di tempo completo. Na 1950, net ora cu mi a pensa cu mi pruebanan a pasa, mi a haya ordo inesperadamente pa drenta den ehersito. Siendo cu mi kier a keda neutral como un Cristian, mi a dicidi di no “train pa guera.” (Isaias 2:4) Asina a cuminsa un serie largo di encarselacion sumamente doloroso cu lo a hiba mi na algun di e prizonnan mas notorio di Grecia.

Tur cos a cuminsa den e stad Drama. Durante e prome simannan di mi encarselacion einan, e soldanan resien recluta a cuminsa train nan habilidad di tira cu scopet. Un dia nan a hiba mi na e cancha di tiro. Un di e oficialnan a benta un rifle mi dilanti y a ordena mi pa tira. Ora mi a nenga, el a cuminsa tira riba mi. Ora cu e otro oficialnan a mira cu lo mi no bai compromete, nan a cuminsa bati mi ferosmente. Nan tawata sende sigaria y paga nan den mi plant’i man. Despues, nan a benta mi den cashot. Esaki a tuma luga tres dia tras di otro. E kimanan di sigaria tawata sumamente  doloroso, y pa hopi aña mi a keda cu e cicatrisnan den mi plant’i man.

Prome cu nan a hiba mi dilanti corte militar, mi a keda transferi pa un campo militar na Iráklion, Creta. Einan, den un intento pa kibra mi integridad, nan a bati mi severamente. Como cu mi tawatin miedo cu lo mi sucumbi pa e presion, mi a haci oracion ferviente, pidiendo mi Tata celestial pa fortalece mi. Anto e palabranan di Yeremias 1:19 a bin na mi mente: ‘“Nan lo bringa contra bo, ma nan lo no vence bo, pasobra ami ta cu bo pa libra bo”, Yehova ta declara.’ E “pas di Dios” refrescante a duna mi un trankilidad. Mi a mira e sabiduria di pone pleno confiansa den Yehova.—Filipensenan 4:6, 7; Proverbionan 3:5.

Despues den corte, mi a keda sentencia na bida largo den prizon. Testigonan di Yehova tawata ser considera como e piyo “enemigonan di Estado.” E castigo di bida largo a cuminsa na un prizon pa criminal situa pafo di Canea, yama Itsedin. Ei nan a sera mi den cashot. Itsedin tawata un baluarte bieu, y mi cel tawata pesta cu djaca. Mi tawata lora mi curpa, for di cabes te pia, den un deken bieu y tur gasta pa asina e djacanan no mishi cu mi curpa ora nan tawata cana riba mi. Mi a haya pulmonia y a bira hopi malo. E docter a bisa cu mi tawatin cu sinta den solo, y asina mi a logra combersa cu hopi di e presonan den e patio. Sinembargo, mi condicion a empeora, y despues di un sangramento pulmonar severo, nan a transferi mi pa e hospital di Iráklion.

Atrobe mi famia spiritual di rumannan Cristian tawat’ei ora mi tawatin mester di nan. (Colosensenan 4:11) E rumannan di Iráklion a bishita mi cu regularidad, y a duna mi consuelo y animacion. Mi a bisa nan cu mi tawatin mester di literatura pa mi por a predica na personanan interesa. Nan a trece un maleta cu un bom falso pa mi, caminda mi por a sconde literatura sin problema. Esta felis mi tawata cu durante mi estadia den e prizonnan ei, mi por a yuda por lo menos seis otro preso bira Cristian berdadero!

Mientrastanto e guera civil a termina, y nan a reduci mi sentencia na dies aña di prizon. Mi a keda e resto di mi sentencia den prizonnan na Rethimno, Genti Koule y Cassandra. Despues di a pasa casi dies aña den ocho prizon, mi a haya mi libertad. Mi a regresa Tesalonica caminda mi rumannan Cristian stima a ricibi mi calurosamente.

 Prosperando den e Hermandad Cristian

Pa e tempo ei e Testigonan na Grecia por a adora cu basta libertad. Mesora mi a probecha di e oportunidad pa sigui den sirbishi di tempo completo. Poco despues mi a haya un otro bendicion ora cu mi a bin conoce Katina, un fiel ruman mohe Cristian cu a stima Yehova y cu tawata hopi activo den e trabou di predica. Nos a casa na october 1959. E nacemento di mi yiu mohe, Agape, y e echo cu mi tawatin mi propio famia Cristian a caba di cura e heridanan di mi bida como huerfano. Mas cu tur cos, nos famia tawata contento di por a sirbi bou di e cuido protectivo di nos amoroso Tata celestial, Yehova.—Salmo 5:11.

Debi na circunstancianan fuera di mi control, mi a haya mi obliga ta stop di traha pionero, pero mi a apoya mi casa segun cu e si a sigui den sirbishi di tempo completo. Un ocasion hopi memorabel den mi bida Cristian tawata na 1969, tempo cu a tene un congreso internacional di Testigonan di Yehova na Nuremberg, Alemania. Segun cu mi tawata prepara pa bai einan, mi a solicita pa haya un paspoort. Ora mi casa a bai warda di polis pa puntra dicon mi no a haya mi paspoort ainda despues di mas cu dos luna, un polis a saca un file diki for di su lachi y a bisa: “Bo ta pidiendo un paspoort pa e persona aki pa asina e por bai comberti hende na Alemania? Absolutamente cu no! E ta peligroso.”

Cu yudansa di Yehova y di algun ruman, mi a keda inclui den un paspoort pa grupo y asina mi a logra asisti na e congreso maraviyoso ei. E asistencia a alcansa un maximo di mas cu 150.000 hende, y mi por a mira bon cla con Yehova su spirito tawata dirigi y uni e famia spiritual internacional aki. Mas despues den bida, mi a haya mas aprecio ainda pa e balor di e hermandad Cristian.

Na 1977 mi casa stima y fiel compañera a fayece. Mi a haci mi best pa lanta mi yiu mohe segun e principionan di Bijbel, pero mi no a keda mi so. Atrobe mi famia spiritual a yuda mi. Semper lo mi keda gradicido pa e sosten di e rumannan durante e tempo dificil ei. Algun di nan asta a bin biba serca nos pa un tempo pa cuida mi yiu mohe. Nunca lo mi lubida nan amor di sacrificio propio.—Huan 13:34, 35.

Agape a bira grandi y a casa cu un ruman homber, Elias. Nan tin cuater yiu homber, y tur ta den berdad. Den ultimo añanan, mi a haya varios atake celebral y mi salu a bai atras. Mi yiu mohe cu su famia ta cuida mi bon. Apesar di mi mal salu, ainda mi tin hopi motibo pa alegra. Mi ta corda tempo cu nos tawata apenas shen ruman den henter Tesalonica, reuniendo secretamente den casnan priva. Awor tin rond di cinco mil Testigo celoso den e area ei. (Isaias 60:22) Na congresonan, rumannan homber hoben sa acerca mi y puntra mi: “Ruman ta corda tempo cu ruman tawata trece revista na nos cas?” Aunke e mayornan kisas no tawata lesa e revistanan ei, nan yiunan si tawata lesa nan, y nan a progresa spiritualmente.

Segun cu mi ta mira con Yehova su organisacion ta crece, mi ta sinti cu tur e pruebanan cu mi a soporta tawata bale la pena. Semper mi ta bisa mi nietonan y otro hobennan pa corda riba nan Tata celestial den nan hubentud, y nunca lo e no bandona nan. (Eclesiastes 12:1) Yehova a cumpli cu su palabra, y a bira pa mi “un tata di huerfano.” (Salmo 68:5) Aunke for di infancia mi tawata un huerfano bandona, cu tempo mi a haya un Tata amoroso!

[Plachi na pagina 22]

Mi a traha como koki den prizon Drama

[Plachi na pagina 23]

Hunto cu Katina, dia di nos casamento, 1959

[Plachi na pagina 23]

Un asamblea den un mondi serca di Tesalonica, fin di decada 1960

[Plachi na pagina 24]

Hunto cu nos yiu mohe, 1967