Beibele e fela e bitša Jesu “Morwa wa Modimo.” (Johane 1:49) Polelwana “Morwa wa Modimo,” e bontšha gore Modimo ke Mmopi goba Mothopo wa bophelo, le gore ke yena a bopilego Jesu. (Psalme 36:9; Kutollo 4:11) Beibele ga e rute gore Modimo o bile le ngwana ka tsela yeo batho ba dirago bana ka yona.

 Beibele e bitša le barongwa gore ke “barwa ba Modimo wa therešo.” (Jobo 1:6) Le gona Beibele e re motho wa pele, e lego Adama, e be e le “morwa wa Modimo.” (Luka 3:38) Eupša, ka ge Jesu e le sebopiwa sa pele sa Modimo, gomme Modimo a mmopile ka go lebanya, Beibele e mo hlalosa e le Morwa wa mathomo wa Modimo.

•  Na Jesu o phetše legodimong pele a ka belegwa lefaseng?

•  Jesu o dirile’ng pele a ka tla lefaseng?

 Ee. Jesu e be e le sebopiwa sa moya legodimong pele a ka belegwa e le motho mo lefaseng. Jesu ka boyena o rile: “Ke theogile [ke etšwa] legodimong.”—Johane 6:38; 8:23.

 Modimo o bopile Jesu pele a ka bopa dilo tše dingwe ka moka. Beibele ge e bolela ka Jesu e re:

•   “Ke . . . leitšibulo la tlholo yohle.”—Bakolose 1:15.

•   Ke “mathomo a tlholo ya Modimo.”—Kutollo 3:14.

 Jesu o phethagaditše boporofeta bjo bo bolelago ka “yoo setlogo sa gagwe e lego sa mehla ya pele, matšatšing a bogologolo.”—Mika 5:2; Mateo 2:4-6.

 O be a na le maemo a godimo kua legodimong. Jesu o boletše ka maemo a gagwe a legodimong ge a ba a rapela a re: “Tate, ntagafatše . . . ka letago leo ke bego ke na le lona ke le kgauswi le wena pele lefase le eba gona.”—Johane 17:5.

 O thušitše Tatagwe go bopa dilo ka moka. Jesu o šomile le Modimo a le bjalo ka “mošomi yo a nago le bokgoni.” (Diema 8:30) Beibele ge e bolela ka Jesu e re: “Dilo tše dingwe ka moka tše di lego magodimong le lefaseng di hlodilwe ka yena.”—Bakolose 1:16.

 Modimo o šomišitše Jesu go bopa dilo ka moka. Se se akaretša dibopiwa tša moya le dilo ka moka legohleng. (Kutollo 5:11) Modimo le Jesu ba be ba šomišana go swana le mothadi wa dipolane le moagi. Mothadi o thala polane ya dilo, ke moka moagi a aga dilo tšeo di thadilwego.

 E be e le Lentšu. Ge Beibele e bolela ka Jesu pele a etla lefaseng, e mmitša gore ke “Lentšu.” (Johane 1:1) Se se ra gore Modimo o be a šomiša Morwa wa gagwe go fetiša ditaba le go nea dibopiwa tša gagwe tša moya ditaelo.

 Gape Modimo o šomišitše Jesu go botša batho mo lefaseng molaetša wa gagwe. Go ka direga gore Modimo o šomišitše Jesu go fa Adama le Efa ditaelo mola ba sa le tšhemong ya Edene. (Genesi 2:16, 17) Mohlomongwe Jesu e be e le morongwa yo a ilego a hlahla Baisiraele ba bogologolo lešokeng, le gona go ka direga gore lentšu la gagwe ke leo Modimo a ilego a laela Baisiraele gore ba le kwe.—Ekisodo 23:20-23. a