Uunake omukiintu Omukriste e na okuzala sha komutse melongelokalunga nomolwashike? Natu tale kwaashoka omuyapostoli Paulus a nwethwa mo a popye kombinga yoshinima shika. Okwe tu pa epukululo ndyoka twa pumbwa opo tu ninge etokolo li li mondjila ndyoka tali simanekitha Kalunga. (1 Kor. 11:3-16) Paulus okwa popi iinima itatu mbyoka tatu vulu okutala kuyo: (1) Iinakugwanithwa mbyoka tayi pula omukiintu a zale sha komutse, (2) oonkalo moka e na okuzala sha komutse nosho wo (3) omatompelo ngoka tage mu inyengitha a zale sha komutse.

Iinakugwanithwa. Paulus okwa tumbula po iinima iyali: egalikano nokuhunganeka. (Ovelise 4, 5, NW) Odhoshili kutya egalikano olyo okupopya naJehova. Kunena okuhunganeka otaku vulu okuukithwa kelongo kehe lyi ikolelela kOmbiimbeli ndyoka omukalele Omukriste ta longo. Ihe mbela Paulus okwa ti kutya omukiintu oku na okuzala sha komutse ethimbo kehe ta galikana nenge ta longo oshili yOmbiimbeli? Hasho. Oshi ikolelela kutya omukiintu ota galikana nenge ota longo aantu monkalo yini.

Oonkalo ndhoka tadhi pula omukiintu a zale sha komutse. Paulus okwa tumbula oonkalo dhopaali, megumbo nomegongalo. Okwa ti: “Omulumentu oye omutse gwomukadhi . . . Nomukiintu kehe ngoka ta galikana nenge [ta hunganeke, NW] melongelokalunga lyaayehe inaa zala sha komutse, oye ota shekitha omulume.” (Ovelise 3, 5) Melongekidho lyuukwanegumbo, Jehova okwa tula po omusamane oye  a kale omutse gwomukulukadhi. Ngele omukulukadhi ita simaneke oonkondopangelo dhomusamane gwe, ota ka sitha ohoni omusamane gwe ngele ota longo iinakugwanithwa mbyoka Jehova a pa omusamane. Pashiholelwa, uuna sha pumbiwa omukiintu a kwatele komeho ekonakonombiimbeli montaneho yomusamane gwe oku na okuzala sha komutse, shoka tashi ulike kutya okwa simaneka uukwamutse womusamane gwe. Shoka oku na oku shi ninga kutya nduno omusamane okwa ninginithwa nenge hasho, molwaashoka oye omutse gwegumbo. * Ngele ota galikana nenge ta longo aantu omanga pu na omwanamati a ninginithwa, oku na okuzala sha komutse, hamolwaashoka omwanamati oye omutse gwegumbo, ihe omolwoonkondopangelo ndhoka dha pewa aalumentu mboka ya ninginithwa megongalo lyopaKriste.

Paulus okwa popi onkalo yomegongalo a ti: “Ngele oku na ngoka e na omaludhi moshinima shika, ngame otandi ti ashike kutya tse yene nosho [wo] omagongalo gaKalunga katu na we omukalo gulwe hatu gu longitha melongelokalunga.” (Ovelise 16) Megongalo lyopaKriste, aalumentu mboka ya ninginithwa oyo ye na okukwatela komeho. (1 Tim. 2:11-14; Heb. 13:17) Aalumentu oyo owala haya langekwa po ye li aakuluntugongalo naayakuligongalo noya pewa oshinakugwanithwa kuKalunga ya sile oshimpwiyu oshigunda she. (Iil. 20:28) Ihe omathimbo gamwe, ohashi vulika pu holoke onkalo tayi pula omukiintu Omukriste a longe oshilonga shoka shi na okulongwa owala komulumentu ngoka a ninginithwa nokwa pyokoka. Pashiholelwa, otashi vulika a kwatele komeho elongekidho lyiilonga yomomapya ngele kapu na omulumentu a ninginithwa ngoka a gwana oku shi ninga. Nenge otashi vulika a kwatele komeho ekonakonombiimbeli lyopegumbo pu na omulumentu a ninginithwa ngele olya longekidhwa komeho yethimbo. * Molwaashoka iilonga mbyoka oyi li lela oshitopolwa shegongalo lyopaKriste, oku na okuzala sha komutse opo u ulike kutya ota longo oshilonga shoka hashi longwa owala kaalumentu.

Mepingathano naashoka, opu na oombinga odhindji dhelongelokalunga moka omumwameme inaashi pumbiwa a zale sha komutse.  Pashiholelwa, ina pumbwa oku shi ninga uuna ta gandja omatyokosha pokugongala kwopaKriste, e li muukalele wegumbo negumbo nomusamane gwe nenge nomulumentu gulwe a ninginithwa nenge uuna ta konakona nota galikana naanona ye mboka inaaya ninginithwa. Nonando ongaaka, omapulo galwe otashi vulika ga holoke, nongele omumwameme ke na uushili moshinima shoka ta pulwa, ota vulu okukonga uuyelele wa gwedhwa po. * Ngele natango ke na uushili nongele eiyuvo lye otali mu lombwele a zale sha komutse, inashi puka oku shi ninga, ngaashi shu ulikwa mefano ndyoka.

Omatompelo ngoka taga ningitha omukiintu a zale sha komutse. Movelise 10 otatu adha mo omatompelo gaali kutya omolwashike omukiintu Omukriste e na okuzala sha komutse: “Omolwaayengeli omukiintu oku na okusiikila omutse gwe, opo a holole kutya oku li mepangelo lyomulume.” Tango ndhindhilika uutumbulilo, “a holole kutya oku li mepangelo.” Okuzala sha komutse ogwo omukalo gwokuulika kutya omukiintu okwa zimina oonkondopangelo dhaJehova ndhoka a pa aalumentu ya ninginithwa megongalo. Kungawo, otu ulike ohole ye nuudhiginini kuJehova Kalunga. Etompelo etiyali tali adhika movelise ndjoka, “omolwaayengeli.” Ongiini omukiintu ha nwetha mo iishitwa mbyoka yopambepo iinankondo mokuzala sha komutse?

Aayengeli oya hokwa okumona kutya oonkondopangelo dhopakalunga odha simanekwa apuhe mehangano lyaJehova, megulu nokombanda yevi. Ohaya mono wo uuwanawa miiholelwa yaantu inaaya gwanenena moshinima shika. Odhoshili kutya nayo oye na wo okuvulika kelongekidho lyaJehova, oshinima shoka aayengeli yamwe ya li ya ndopa okuninga. (Jud. 6) Ngashingeyi, aayengeli ohaya vulu okumona kutya omathimbo gamwe omukiintu Omukriste oku na owino owundji, ontseyo oyindji noondunge odhindji e vulithe omulumentu  ngoka e li megongalo a ninginithwa, ihe nonando ongaaka, omukiintu ngoka ota vulika nehalo ewanawa koonkondopangelo dhe. Poompito dhimwe, omukiintu Omukriste oku li omugwayekwa ngoka ta ka ninga gumwe gwomaathigululi pamwe naKristus. Omukiintu ngoka ota ka yakula pondondo yi vule yaayengeli yoku ka pangela pamwe naKristus megulu. Kashi li tuu oshiholelwa oshiwanawa shoka aayengeli taya vulu okutala kusho ngashingeyi! Aamwameme ayehe kaye na tuu uuthembahenda okuulika evuliko mokwiifupipika okupitila meihumbato lyawo lyuudhiginini nomokuvulika montaneho yaayengeli omamiliyona aadhiginini!