“Otwa hala okukala aanashili miinima ayihe.” — HEB. 13:18NW.

1, 2. Omolwashike Jehova ha kala a nyanyukwa okumona oonkambadhala dhetu dhokukala tu li aanashili? Gandja oshiholelwa.

ESIKU limwe okanona kokamati pamwe nayina oya li ya zi mositola yontumba. Ombaadhilila okanona oka thikama, ka fa ka haluthwa. Oka li ke na okadhanitho peke hoka ka kutha mositola. Oka li ka dhimbwa oku ka shuna po nenge ka pule yina e ke ka landele po. Oka li ki igidha yina e ka kwathele. Yina okwa li e ka hekeleke nokwe ka kwathele ka shune ko okadhanitho hoka nokugandja ombili. Sho okamati ka ningi ngaaka, omutima gwayina ogwa li tagu hunga enyanyu noku uvite uuntsa. Omolwashike mbela?

2 Shimwe shomiinima mbyoka hayi nyanyudha aavali noonkondo osho okumona aanona yawo tayi ilongo nkene sha simana okukala aanashili. Tate yetu gwomegulu ‘Kalunga omunashili’ naye osho ha kala e uvite ngaaka. (Deut. 32:4) Oha kala a nyanyukwa sho e wete tatu koko pambepo nonkene tatu kambadhala okukala aanashili. Molwaashoka otwa hala oku mu nyanyudha nokwiikaleka mohole ye, otu na okukala tu uvite ngaashi omuyapostoli Paulus ngoka a ti: “Otwa hala okukala aanashili miinima ayihe.” (Heb. 13:18, NW) Natu tale kiinima ine ya simana monkalamwenyo moka omathimbo gamwe hatu mono shi li oshidhigu unene okukala aanashili. Opo nduno otatu ka kundathana omayambeko ngoka hage tu zilile mokukala aanashili.

INATU IFUNDJALEKA

3-5. (a) Oohapu dhaKalunga otadhi tu londodha ngiini kombinga yoshiponga shokwiifundjaleka? (b) Oshike tashi tu kwathele twaahi ifundjaleke?

3 Oshi li oshipu noonkondo okwiifundjaleka tse yene, molwaashoka  inatu gwanenena. Pashiholelwa, Jesus okwa lombwele Aakriste yomuLaodikea kutya oya li tayi ifundjaleke yo yene mokudhiladhila kutya oye li aayamba, ihe muushili wo wene oya li ‘oohepelelela ye li olutu lwowala naaposi’ pambepo noya li monkalo yi etitha lela ohenda. (Eh. 3:17) Okwiifundjaleka kwawo okwa li kwa ningitha onkalo yawo yi kale ya nika oshiponga unene.

4 Otashi vulika to dhimbulukwa wo elondodho lyomulongwa Jakob ndyoka tali ti: “Ngele oku na ngoka ta dhiladhila kutya ota longele Kalunga, ndele ita pangele okupopya kwe, nena elongelokalunga lye itali tompola sha, oti ifundjaleke owala.” (Jak. 1:26) Ngele otatu dhiladhila kutya ohatu longele Kalunga, ihe otatu longitha elaka lyetu nayi, otatu ifundjaleke owala. Okulongela Jehova kwetu itaku ka tompola sha. Oshike tashi vulu oku tu kwathela kaatu ye moshiponga shoka?

5 Natango Jakob okwa faathanitha oshili yoohapu dhaKalunga nesipili. Ote tu ladhipike tu tale mompango ya gwanenena yaKalunga nokuninga omalunduluko mpoka sha pumbiwa. (Lesha Jakob 1:23-25.) Ombiimbeli otayi vulu oku tu kwathela twaahi ifundjaleke notu mone shoka tu na okuninga opo tu hwepopaleke onkalo yetu. (Oontak. 3:40; Hag. 1:5, OB-1954) Otatu vulu wo tu galikane kuJehova noku mu pula e tu konakone, e tu kwathele tu mone omapuko getu ga kwata miiti nokuninga omalunduluko. (Eps. 139:23, 24) Okwaahe na oshili okwo uunkundi wa kwata miiti notu na oku ku tala ko ngaashi Tate yetu gwomegulu he ku tala ko. Omayeletumbulo 3:32 otaga ti: “Omugoyoki oye iihuna koshipala shOMUWA, ihe OMUWA okwi inekela aayuuki.” Jehova ota vulu oku tu kwathela tu kale tu uvite ngaashi ye nokukala twi itala ko ngaashi ye he tu tala ko. Dhimbulukwa kutya Paulus okwa ti: “Otwa hala okukala aanashili miinima ayihe.” Itatu vulu okukala twa gwanenena ngashingeyi, ihe otwa halelela notatu kambadhala okukala aanashili.

OKUKALA AANASHILI MUUKWANEGUMBO

Okukala aanashili otashi tu kwathele tu yande eihumbato ndyoka twa hala okuholeka

6. Omolwashike aaihokani ye na okukala haya lombwelathana oshili, notashi ke ya kwathela ya henuke iiponga yini?

6 Iilyo yuukwanegumbo wopaKriste oyi na okukala yi  na oshili. Omusamane nomukulukadhi oye na okukala ya mangulukilathana nokupopya oshili. Aakriste aaihokani kaye na okukala niikala inaayi yogoka, ngaashi okwiihumbata momukalo tagu hilile yalwe momilalo pondje yondjokana, okupanga uukuume meholamo okupitila mo-Internet nenge okutala omafano giipala goludhi kehe. Aakriste yamwe aaihokani oya kutha ombinga meihumbato lya puka noku li holeka kuume kopandjokana ngoka kee na ondjo. Okuninga ngaaka otaku ulike okwaahe na oshili. Tala oohapu dhomukwaniilwa omudhiginini David tadhi ti: “Kandi na uukuume naantu yaa fele; kandi na ko nasha naainingithi.” (Eps. 26:4) Ngele owa hokana, ino kutha nando ombinga miilonga mbyoka tayi ku ningitha wu yi holeke kuume koye kopandjokana.

7, 8. Iiholelwa yini yomOmbiimbeli tayi vulu okukwathela aanona yi ilonge okukala aanashili?

7 Mokulonga aanona yawo ongushu yokukala aanashili, oshi li pandunge aavali ya longithe iiholelwa yomOmbiimbeli. Iiholelwa yaantu mboka ya li ihaaya popi oshili ongaashi Akan, ngoka a yaka e ta kambadhala okuholeka uufuthi we, Gehasi ngoka a li a popi iifundja molwaashoka a hala omaliko nosho wo Judas ngoka a li a yaka nokwa popi iifundja opo a hepekithe Jesus. — Jos. 6:17-19; 7:11-25; 2 Aak. 5:14-16, 20-27; Mat. 26:14, 15; Joh. 12:6.

8 Iiholelwa iiwanawa yaamboka ya li aanashili, ongaashi shaJakob ngoka a li a lombwele oyanamati ya shune ko iimaliwa mbyoka  ya li ya adha moompunda dhawo, molwaashoka okwa li e wete kutya oya tulwa mo papuko. Oshiholelwa oshikwawo oshaJefta nomwanakadhona ngoka a tsu kumwe neuvaneko lyahe nonando osha li tashi pula eiyambo enene nosho wo shaJesus ngoka a li i iholola nuulaadhi montaneho yaantu mboka ya li ye ya oku mu kwata opo a gwanithe po omahunganeko nokugamena ookuume ke. (Gen. 43:12; Aatok. 11:30-40; Joh. 18:3-11) Mbika oyo iiholelwa yimwe mbyoka tayi vulu okupa aavali omayele gomOohapu dhaKalunga ngoka taga vulu oku ya kwathela ya longe aanona yawo okukala ye hole noya lenga oshili.

9. Aavali oye na okuhenuka shike ngele oya hala okutulila po aanona yawo oshiholelwa shokukala aanashili, nomolwashike shika sha simana?

9 Aavali ngele taya longo aanona yawo okukala aanashili otashi ya pe oshinakugwanithwa sha simana. Omuyapostoli Paulus okwa pula a ti: “Ngoye oho longo yalwe, ihe omolwashike ihoo ilongo ngoye mwene? Oho uvithile aantu yaa yake, ngoye oho yaka?” (Rom. 2:21) Aavali yamwe ohaya ngwangwaneke aanona yawo moku ya longa ya kale aanashili, omanga yo yene kaaye shi aanashili. Aavali otashi vulika ya kale ye wete kutya opu na okuyaka nokufundja kwanathangwa. Otashi vulika ya konge omaipopilo taya ti: “Oshinima shika oshishona, mwene gwositola ite ke shi mona,” nenge ya tye: “Mbika kayi shi naanaa iifundja.” Paushili wo wene, okuyaka okuyaka owala kashi na mbudhi kutya oshinima oshi na ongushu yi thike peni, nokufundja okufundja owala kutya nduno oshike tashi popiwa nenge iifundja oya popiwa yi thike peni. * (Lesha Lukas 16:10.) Aanona ohaya dhimbulula nziya iihelele notayi vulu oku ya nwetha mo nayi. (Ef. 6:4) Ihe ngele oyi ilongo oshili miiholelwa yaavali yawo, otaya ka koka nokusimanekitha Jehova muuyuni mbuka waahe na oshili. — Omayel. 22:6.

 OKUKALA AANASHILI MEGONGALO

10. Oshike tu na okukaleka momadhiladhilo uuna tashi ya pokupopya oshili nooitaali ooyakwetu?

10 Okweendathana nAakriste ooyakwetu ohashi tu pe oompito odhindji okukala aanashili. Ngaashi twi ilongo montopolwa 12, otu na okukala twa kotokela omukalo ngoka hatu longitha omagano gokupopya, unene tuu mokati kaamwatate naamwameme. Okupopya kwowala otaku vulu ku shituke nuupu olwaambo nokulundila. Ngele otatu hokolola lwiikando ehokololo ndyoka kaatu shi nawa, otashi vulika tu kwathele mokutaandelitha iifundja. Onkee ano, oshi li nawa okupangela okupopya kwetu. (Omayel. 10:19) Mepingathano naashono, otashi vulika tu kale tu shi oshinima shontumba shoshili, ihe shoka inashi hala okutya osha gwana okulombwela yalwe. Pashiholelwa, oshinima otashi vulika shi kale inaashi tu pamba nenge kaashi li pahole ngele otwe shi lombwele yalwe. (1 Pet. 4:15) Aantu yamwe mboka ihaaya yawala okupopya nayi yakwawo ohayi ipopile kutya otaya popi oshili, ihe oohapu dhetu odhi na aluhe okukala dhombili nodhohenda. — Lesha Aakolossa 4:6.

11, 12. (a) Omomikalo dhini yamwe mboka ya yona sha kwata miiti haya nayipaleke uupyakadhi? (b) Iifundja yini Satana ha humitha komeho kombinga yomayono ngoka ga kwata miiti, nongiini tu na oku yi kondjitha? (c) Ongiini tatu ulike kutya otu li aanashili kehangano lyaJehova?

11 Osha simanenena okukala hatu lombwele oshili mboka  taya kwatele komeho megongalo. Yamwe mboka ya yona omayono ga kwata miiti ohaya nayipaleke uupyakadhi mokukambadhala oku wu holeka nokufundja aakuluntugongalo uuna taye ya pula. Mboka haya ningi ngawo ohaya tameke nokuli okukala nonkalamwenyo yopaali, tayi iningi ya fa taya longele Jehova omanga taya tsikile nokuyona sha kwata miiti. Oshinima shoka ohashi ningi omuntu a kale ta fundju onkalamwenyo ye ayihe. (Eps. 12:2) Yamwe ohaya lombwele aakuluntugongalo uuyelele inaawu gwana po nokuholeka oshili ndjoka ya simana. (Iil. 5:1-11) Iifundja ya tya ngaaka oya za kuSatana ngoka he yi humitha komeho. — Tala oshimpungu “ Iifundja yaSatana kombinga yomayono ga kwata miiti.”

12 Oshi li wo sha simana tu kale aanashili kehangano lyaJehova uuna tatu yamukula omapulo pombapila. Pashiholelwa, ngele tatu gandja olopota yiilonga yetu yuukalele, otu na okukala twa kotoka kaatu gandje omiyalu dhiifundja. Sha faathana, ngele tatu udhitha ofooloma yeindilo lyuuthembahenda wiilonga yontumba, katu na okupengitha oshili kombinga yuukolele wetu wopalutu nenge yuuyelele wontumba wu na ko nasha natse. — Lesha Omayeletumbulo 6:16-19.

13. Ongiini tu na okukala aanashili ngele tashi ya piinima yopangeshefa nooitaali ooyakwetu?

13 Okukala aanashili nooitaali ooyakwetu okwa kwatela mo wo iinima yopangeshefa. Omathimbo gamwe aamwatate naamwameme ohashi vulika yi ilandithe sha. Oye na okukala ya kotoka opo yaaha ninge iinima yopangeshefa ngele ye li pOshinyanga shUukwaniilwa nenge muukalele. Otashi vulika omwiitaali a pe omwiitaali omukwawo iilonga. Ngele otwa kuta aamwatate nenge aamwameme, otu na okuungaunga nayo pauyuuki, moku ya futa pethimbo ondjambi ndjoka tu uvathana nayo noku ya pa omauwanawa ngoka tu uvathana nayo nenge ga tulwa po pampango yoshilongo. (1 Tim. 5:18; Jak. 5:1-4) Mepingathano naashoka, ngele ohatu longele omumwatate nenge omumwameme, otu na okulonga iilonga ya gwana ondjambi yetu. (2 Tes. 3:10) Inatu tegelela tu ningilwe uuwanawa kwaamboka hatu longele omolwekwatathano lyetu  nayo lyopambepo, ngaashi oku tu pa ethimbo lyefudho lya gwedhwa po, omauwanawa galwe ihaaga ningilwa aaniilonga pamwe natse. — Ef. 6:5-8.

14. Uuna Omukriste a tula kumwe nOmukriste omukwawo ya tote po ongeshefa, oshi li pandunge ya ninge shike, nomolwashike?

14 Ongiini ngele ongeshefa yetu oya kwatela mo okutula kumwe nayalwe, tashi vulika twa pungula iimaliwa yi ninge ontanitho nenge twi indila omukuli? Ombiimbeli otayi gandja ekotampango lya simana noli na oshilonga: Natu nyole iinima ayihe mbyoka ya kwatelwa mo. Pashiholelwa, Jeremia sho a landa epya, okwa li a nyola onzapo yelando noku yi shaina montaneho yoonzapo e te yi pungula omolwuuyelele womonakuyiwa. (Jer. 32:9-12; tala wo Genesis 23:16-20.) Ngele tatu ningi ongeshefa nooitaali ooyakwetu e tatu nyola nawa ashihe shoka sha kwatelwa mo nokushaina pu na oonzapo itashi ti kutya inatu inekelathana. Shila otashi kelele okwaahauvathana, okuyematekathana nosho wo oontamanana ndhoka hadhi eta nokuli etopoko. Omukriste ngoka ta ningi ongeshefa nOmukriste omukwawo oku na okudhimbulukwa kutya kapu na nando ongeshefa ya simana yi vule uukumwe nombili yegongalo. * — 1 Kor. 6:1-8.

OKUKALA AANASHILI MIILONGA YOKWIIKONGELA OMBOLOTO

15. Jehova oha kala e uvite ngiini kombinga yomikalo dhopangeshefa ndhoka kaadhi li paushili, nAakriste oye na okutala ko ngiini omikalo ndhoka dhi li apuhe?

15 Omukriste ke na okukala omunashili owala ngele e li megongalo. Paulus okwa ti: “Otwa hala okukala aanashili miinima ayihe.” (Heb. 13:18, NW) Ngele tashi ya piinima yopangeshefa, Omushiti gwetu oha kala a nyanyukilwa okukala kwetu aanashili. Membo lyOmayeletumbulo omwa popiwa lwiikando yontumba kutya oshiviha oshi na okukala shu uka. (Omayel. 11:1; 20:10, 23) Methimbo lyonale, aantu oya li haya longitha iiviha noomasandjundo opo ya vihe iinima mbyoka taya  landitha nosho wo iimaliwa mbyoka taya futwa. Aalandithi mboka kaaye na oshili oya li haya longitha oomasandjundo dhiikengelela niiviha itaayi yeleke paushili opo ya nyokome aalandi yawo. * Jehova oku tonde iilonga ya tya ngaaka. Opo twi ikaleke mohole ye, otu na okuyanda thiluthilu oludhi kehe lwomangeshefo ngoka ihaaga longo paushili.

16, 17. Iifundja yoludhi luni yi li apuhe muuyuni, nAakriste yashili oya tokola toko okuninga shike?

16 Molwaashoka Satana oye omupangeli gwuuyuni mbuka, itashi tu kumitha sho twa kundukidhwa kaantu kaaye na oshili. Okukala aanashili kwetu ohaku makelwa esiku nesiku. Ngele aantu taya nyola kombinga yondjokonona (o-CV) yawo uuna taya kongo iilonga, olundji ohaya fundju nokugwedhela taya gandja omauyelele ngoka kaage shi goshili. Ngele taya ningi omaindilo ya tembukile moshilongo, ya fute iifendela, ya ninge iilyo yomahangano omakwashilipaleki nomiinima iikwawo yilwe olundji ohaya fundju opo ya mone shoka ya hala. Aalongwa oyendji ohaya yaka ngele taya nyola omakonakono nenge omatotwahokololo nosho wo omahokololoningomwa. Ohashi vulika wo ya yake uuyelele wontumba koInternet nokufundja kutya uuyelele mboka owawo. Ngele aantu taya pula ekwatho kaanambelewa mboka ye hole okudhengwa okati kokoonyala, olundji ohaya gandja ombumbo opo ya mone shoka ya hala. Eihumbato ndyoka olyo twa tegelela muuyuni mbuka, moka oyendji ‘yi ihole, ye hole eliko noye tonde uuwanawa.’ — 2 Tim. 3:1-5.

17 Aakriste yashili oya tokola toko kaaya kuthe ombinga momikalo ndhoka. Omathimbo gamwe okukala aanashili oshi li eshongo molwaashoka mboka haya fundju ohaya kala ya fa taye shi pondola nokumona uuwanawa muuyuni mbuka. (Eps. 73:1-8) Ihe Aakriste otashi vulika ya mone iihuna pamahupilo molwaashoka oya hala okukala aanashili ‘miinima  ayihe.’ Mbela eiyambo ndyoka oli na uuwanawa washa? Eeno, oli na lela. Omolwashike mbela? Omalaleko nuuyamba geni haga zi mokukala aanashili?

OMALALEKO NUUYAMBA NGOKA HAGA ZI MOKUKALA AANASHILI

18. Omolwashike sha simana noonkondo okukala omunashili?

18 Okukala wa tseyika wu li omunashili nomwiinekelwa ohashi eta uuwanawa wa dhenga mbanda monkalamwenyo. (Tala oshimpungu “ Mbela ondi li ngaa omunashili miinima ayihe?”) Kala wu shi shi nokutya kehe gumwe ota vulu okukala omunashili. Inashi ikolelela koshipewa shoye, keholokopo lyoye, keputuko lyoye nenge kiinima yimwe mbyoka itoo vulu okuninga. Nonando ongaaka, uukwatya mboka owa pumba maantu oyendji, molwaashoka ohaya ndopa okwiikongela edhina ewanawa mokukala aanashili. (Mika 7:2) Yamwe otashi vulika ye ku sheke molwaashoka wu li omunashili, ihe yamwe otashi vulika ye ku pandule notaya ka kala ye ku inekela noye ku simaneka. Oonzapo dhaJehova odhindji odhe shi mona kutya okukala dhi na oshili oshe dhi kwathela dhi mone uuwanawa pamahupilo. Odha kaleka po iilonga yadho sho aaniilonga mboka kaaye shi aanashili ya tidhwa nenge odha mona iilonga mpoka pwa pumbiwa unene aaniilonga mboka aanashili.

19. Ongiini okukala aanashili monkalamwenyo taku gumu eiyuvo lyetu nosho wo ekwatathano lyetu naJehova?

19 Kutya nduno shoka oshe ku ningilwa nenge hasho, okukala omunashili ohashi eta omalaleko nuuyamba ogendji. Oho kala wu na eiyuvo lya yela. Paulus okwa nyola a ti: “Otse otu na eiyuvo lya yela.” (Heb. 13:18, OB-1954) Natango, Tate yetu gwomegulu omunahole, oha mono uukwatya wetu mboka noku hole aantu mboka aanashili. (Lesha Episalomi 15:1, 2; Omayeletumbulo 22:1.) Okukala omunashili otashi ke ku kwathela lela wu ikaleke mohole yaKalunga, naashoka oshi li ondjambi ya dhenga mbanda ndjoka tatu vulu okumona. Natu ka tale oshikundathanwa sha pamba shika: Nkene Jehova ha tala ko iilonga.

^ okat. 9 Ngele megongalo omu na omuntu ha popi iifundja yi igalala nokwaahe na ko nasha mbyoka ya nuninwa okweehameka yalwe, okwa gwana okukatukilwa onkatu yopampangu kaakuluntugongalo.

^ okat. 14 Kombinga yaashoka omuntu e na okuninga ngele ongeshefa itayi ende nawa, tala Oshigwedhelwako “Okukandula po oontamanana miinima yopangeshefa.”

^ okat. 15 Oya li haya longitha oomasandjundo dhiikengelela opo ya kengelele ngele taya landa nenge ngele taya landitha opo ya likole. Otashi vulika ya li wo haya longitha oshiviha shoka kaashi li paushili, shoka ihaashi yeleke nawa opo ya nyokome aalandi yawo.