OSHILESHWA 30
Aakwanezimo nookuume mboka ya sa, otaya ka yumuka!
Eso ohali tu nikitha oluhodhi nohali tu yemateke noonkondo, nomolwaashono Ombiimbeli tayi li ithana omutondi. (1 Aakorinto 15:26) Moshileshwa 27, owi ilongo kutya Jehova ota ka sinda omutondi ngoka. Ihe oshike tashi ka ningilwa aantu mboka ya sa nale? Moshileshwa shika, oto ki ilonga kombinga yeuvaneko lilwe ekumithi ndyoka Jehova e tu uvanekela, ano okuyumudha aantu omabiliyona ya ka kale nonkalamwenyo ombwanawa sigo aluhe. Ote ke ya yumudha! Shoka otashi ka ningwa ngaa shili? Mbela oonakusa otaya ka yumudhwa ya ka kale megulu nenge okombanda yevi?
1. Jehova okwa hala okuningila shike aakwanezimo nookuume koye mboka ya sa?
Jehova okwa halelela oku ka yumudha oonakusa. Omulumentu gumwe a li e na eitaalo, gwedhina Job, okwa li e na einekelo kutya Kalunga ite ke mu dhimbwa ngele a si. Okwa ti kuKalunga: “Oto ka ithana ndje notandi ku itaale [okuza mombila].” — Lesha Job 14:13-15.
2. Otu shi shi ngiini kutya aasi otaya vulu okuyumudhwa?
Sho Jesus a li kombanda yevi, Kalunga okwa li e mu pe oonkondo dhokuyumudha aantu. Jesus okwa li a yumudha okakadhona komimvo 12 nokamwanamati komuselekadhi gumwe. (Markus 5:41, 42; Lukas 7:12-15) Konima yethimbo, kuume kaJesus, Lasarus, okwa si. Nonando Lasarus okwa adhika a kala mombila omasiku gane, Jesus okwa li e mu yumudha. Konima sho Jesus a galikana kuKalunga, okwi igidha a tala mombila, a ti: “Lasarus, za mo! Nena Lasarus, ngoka a li a sa, okwa zi mo” e na omwenyo! (Johannes 11:43, 44) YaandjaLasarus nookuume ke, kaya li tuu ya nyanyukwa!
3. Aakwanezimo nookuume koye mboka ya sa otaya ka ningilwa shike?
Ombiimbeli oyu uvaneka kutya Kalunga “ota ka yumudha aantu.” (Iilonga 24:15) Mboka ya li ya yumudhwa kuJesus monakuziwa, inaya ya megulu. (Johannes 3:13) Okwe ya yumudhile huka kombanda yevi noya li ya nyanyukwa shili. Sha faathana, masiku Jesus ota ka yumudha aantu omabiliyona, ya ka kale nomwenyo sigo aluhe moparadisa kombanda yevi. Okwa ti kutya ayehe mboka Kalunga e na momadhiladhilo, otaya ka yumudhwa, nokuli naamboka kaapu na we ngoka te ya dhimbulukwa. — Johannes 5:28, 29.
ILONGA OSHINDJI
Konakona mOmbiimbeli wu mone uuyelele mboka tawu ulike kutya oonakusa otaya ka yumudhwa shili. Ilonga wo nkene eyumuko tali vulu oku ku hekeleka noku ku pa etegameno.
4. Jesus oku ulike kutya ota vulu okuyumudha oonakusa
Ilonga oshindji kombinga yaashoka Jesus a ningile kuume ke Lasarus. Lesha Johannes 11:14, 38-44, e tamu kundathana omapulo taga landula:
-
Otu shi shi ngiini kutya Lasarus okwa li a sa shili? — Tala ovelise 39.
-
Ngele Lasarus okwa li a ya megulu, sho to tala, Jesus okwa li ngaa te ke mu yumudha a kale kombanda yevi?
5. Aantu oyendji otaya ka yumudhwa!
Lesha Episalomi 37:29, e tamu kundathana epulo tali landula:
-
Aantu omabiliyona mboka taya ka yumudhwa, otaya ka kala peni?
Jesus ota ka yumudha aantu oyendji, mwa kwatelwa naamboka ya li ihaaya longele Jehova. Lesha Iilonga 24:15, e tamu kundathana epulo tali landula:
-
Olye wa hala oku ka mona monakuyiwa a yumudhwa?
Dhiladhila kwaashika: Jesus ota vulu okuyumudha omuntu nuupu, ngaashi owala omusamane ta vulu okupendula okamwana moomposi
6. Eyumuko otali vulu oku ku hekeleka noku ku pa etegameno
Ehokololo lyomOmbiimbeli lyokamwanakadhona kaJairus, olya hekeleka nolya tsa omukumo oyendji mboka ya silwa. Lesha ehokololo ndyoka muLukas 8:40-42, 49-56.
Manga Jesus inaa yumudha okamwanakadhona kaJairus, okwa lombwele Jairus a ti: “Ino tila, itaala owala.” (Tala ovelise 50.) Ongiini etegameno lyeyumuko tali vulu oku ku kwathela . . .
-
uuna wa silwa omukwanezimo nenge kuume koye?
-
uuna omwenyo gwoye gu li moshiponga?
Dhana OKAVIDIO, e tamu kundathana epulo tali landula.
-
Etegameno lyeyumuko olya hekeleke nolya tsu ngiini omukumo aavali yaPhelicity?
AANTU YAMWE OHAYA TI: “Otaku ka kala ngaa eyumuko shili?”
-
Ngoye oto ti ngiini?
-
Enyolo lini to vulu okulongitha wu ulukile omuntu kutya otaku ka kala eyumuko?
OWI ILONGO SHIKE?
Ombiimbeli oyu uvaneka kutya aantu omabiliyona mboka ya sa otaya ka yumudhwa. Jehova okwa hala ya ka kale ishewe nomwenyo, nokwa pa Jesus oonkondo e ke ya yumudhe.
Omapulo geendululo
-
Jehova naJesus oyu uvitile ngiini oku ka yumudha oonakusa?
-
Aantu omabiliyona mboka taya ka yumudhwa otaya ka kala megulu nenge okombanda yevi? Omolwashike to tile ngawo?
-
Oshike she ku tompa kutya aakwanezimo nookuume koye otaya ka yumudhwa?
UUYELELE WA GWEDHWA PO
Lesha kombinga yiinima mbyoka tayi vulu oku ku kwathela wu idhidhimike uuna wa nika oluhodhi.
“Ekwatho kwaamboka ya nika oluhodhi” (Penduka mo! No. 3 2018)
Omakotampango gOmbiimbeli otaga vulu ngaa shili okukwathela gumwe ngoka a nika oluhodhi?
Ongiini aanona taya vulu okuungaunga neso lyomuntu gwaandjawo nenge lyakuume?
Mbela opu na ngaa aantu taya ka yumudhwa, ya ka kale megulu? Oolye itaaya ka yumudhwa?
“Eyumuko oshike?” (Oshitopolwa shi li kepandja lyetu lyokointaneta)
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
