OSHILESHWA 55
Kala ho ambidhidha egongalo lyeni
Aantu oyendji momagongalo gOonzapo dhaJehova muuyuni awuhe, ohaya longele Jehova ya nyanyukwa. Ohaya pandula elongo nosho wo ewiliko ndyoka haya pewa. Ohaya ambidhidha wo nehalo ewanawa omagongalo moka ye li momikalo dha yoolokathana. Mbela nangoye osho ho ningi megongalo lyeni?
1. Omomikalo dhimwe dhini to vulu okulongitha ethimbo lyoye noonkondo dhoye, wu ambidhidhe egongalo lyeni?
Atuheni otatu vulu okukwathela megongalo. Pashiholelwa, mbela megongalo lyeni omu na aakokele nenge mboka kaaye na uukolele? Mbela ito vulu okukala ho ya faalele kokugongala? Nenge oku ya kwathela miinima yilwe yi ili, ngaashi oku ya landela iipumbiwa yomegumbo nenge wu ya kwathele niilonga yomegumbo? (Lesha Jakob 1:27.) Otatu vulu wo okwiiyamba tu kale hatu opaleke Oshinyanga shUukwaniilwa noku shi kaleka monkalo ombwanawa. Iilonga mbyoka ihatu yi thiminikilwa. Ihe ohole yetu yokuhola Kalunga nosho wo aamwatate oyo hayi tu inyengitha tu, ‘igandje nehalo ewanawa.’ — Episalomi 110:3.
Oonzapo ndhoka dha ninginithwa otadhi vulu okwaambidhidha egongalo momikalo dhi ili nodhi ili. Aamwatate mboka ya gwanitha po iitegelelwa yopamanyolo otaya vulu okuninga aayakuligongalo, nomokweendela ko kwethimbo otaya vulu okuninga aakuluntugongalo. Aamwatate naamwameme otaya vulu okwaambidhidha iilonga yokuuvitha, mokuninga aakokolindjila. Yamwe otaya vulu okukwathela mokutunga omahala gokugongalela, nenge okutembukila kiitopolwa hoka ku na omagongalo ga pumbwa ekwatho.
2. Ongiini tatu vulu okulongitha iiniwe yetu, tu ambidhidhe egongalo?
Otatu vulu ‘okusimanekitha Omuwa niinima yetu.’ (Omayeletumbulo 3:9) Otwa nyanyukwa sho tu na uuthembahenda wokuyambidhidha egongalo lyetu nosho wo iilonga yokuuvitha muuyuni awuhe, pashimaliwa noniiniwe yetu. (Lesha 2 Aakorinto 9:7.) Omayambidhidho getu ohaga longithwa wo mokukwathela mboka ya dhengwa kiiponga yopaunshitwe. Aamwatate oyendji oya tokola ‘okupungula’ sha aluhe shokuyambidhidha. (Lesha 1 Aakorinto 16:2.) Omayambidhidho otatu vulu oku ga tula muuketha womayambidhidho mboka wu li momahala getu gokugongalela nenge tu ga gandje okupitila kepandja lyetu lyokointaneta, donate.jw.org. Jehova okwe tu pa ompito yokuulika kutya otu mu hole, okupitila momukalo moka hatu longitha iiniwe yetu.
ILONGA OSHINDJI
Tala omikalo dhimwe moka to vulu okwaambidhidha egongalo.
3. Otatu vulu okulongitha iiniwe yetu
Jehova naJesus oye hole mboka haya gandja nehalo ewanawa. Pashiholelwa, Jesus okwa li a pandula omuselekadhi ohepele ngoka a li e na iimaliwa iishona, ihe nando ongawo, okwa li a gandja sha kuJehova. Lesha Lukas 21:1-4, e tamu kundathana omapulo taga landula:
-
Mbela otwa pumbwa okugandja omayambidhidho ogendji, opo tu nyanyudhe Jehova?
-
Jehova naJesus ohaya kala ye uvite ngiini, ngele tatu gandja omayambidhidho nehalo ewanawa?
Opo wu mone nkene omayambidhidho getu haga longithwa, dhana OKAVIDIO. Opo nduno kundathaneni omapulo taga landula.
-
Omayambidhidho ohaga longithwa ngiini mokukwathela omagongalo muuyuni awuhe?
4. Otatu vulu okwiiyamba tu kwathele mpoka pu na ompumbwe
Pethimbo lyOmbiimbeli, aalongeli yaJehova oya li haya longo nuudhiginini ya kaleke omahala gawo gokugongalela monkalo ombwanawa. Ihe shoka osha li sha kwatela mo oshindji kaashi shi owala okugandja omayambidhidho gopashimaliwa. Lesha 2 Ondjalulo 34:9-11, e tamu kundathana epulo tali landula:
-
Omwiisraeli kehe okwa li ha kwathele ngiini, mokusila oshimpwiyu egumbo lyaJehova nenge tu tye ehala lyelongelokalunga?
Opo wu mone nkene Oonzapo dhaJehova hadhi landula oshiholelwa shoka shopaMbiimbeli, dhana OKAVIDIO. Opo nduno tamu kundathana omapulo taga landula.
-
Omolwashike sha simana okukaleka Oshinyanga shUukwaniilwa sha yela noshi li monkalo ombwanawa?
-
Omomikalo dhimwe dhini to vulu okukwathela?
5. Aamwatate otaya vulu okwiitulila po elalakano lyokuninga oshindji megongalo
Ombiimbeli otayi ladhipike aalumentu Aakriste yi itulile po elalakano lyokuninga ngaashi taya vulu, ya ambidhidhe egongalo. Opo wu mone oshiholelwa, dhana OKAVIDIO. Opo nduno tamu yamukula epulo tali landula.
-
Ngaashi twe shi mono mokavidio, ongiini Ryan i itulile po elalakano, opo a ambidhidhe lelalela egongalo?
Ombiimbeli oya popya iitegelelwa mbyoka aamwatate ye na okugwanitha po, opo ya ninge aayakuligongalo nenge aakuluntugongalo. Lesha 1 Timoteus 3:1-13, e tamu kundathana omapulo taga landula:
-
Aamwatate mboka ya hala okuninga aayakuligongalo nenge aakuluntugongalo, oya tegelelwa ya kale ye na eihumbato lya tya ngiini?
-
Yaandjawo oya tegelelwa ya kale haya ihumbata ngiini? — Tala ovelise 4 nosho wo 11.
-
Ngele aamwatate ohaya kambadhala ya gwanithe po iitegelelwa mbyoka, kehe gumwe megongalo oha kala e uvite ngiini?
GUMWE OTASHI VULIKA A PULE TA TI: “Oonzapo dhaJehova ohadhi adha peni iimaliwa yokuyambidhidha iilonga yadho?”
-
Oto ke mu yamukula ngiini?
OWI ILONGO SHIKE?
Jehova oha pandula noonkondo oonkambadhala ndhoka hatu ningi, opo tu yambidhidhe egongalo tatu longitha ethimbo lyetu oonkondo dhetu nosho wo iiniwe yetu.
Omapulo geendululo
-
Ongiini tatu vulu okulongitha ethimbo lyetu noonkondo dhetu tu ambidhidhe egongalo?
-
Ongiini tatu vulu okulongitha iiniwe yetu tu ambidhidhe egongalo?
-
Omomikalo dhimwe dhini wa hala okwaambidhidha egongalo?
UUYELELE WA GWEDHWA PO
Tala kutya omolwashike Kalunga inaa tegelela we aapiya ye ya kale haya gandja oshitimulongo.
Tala kutya ‘okulalakanena’ iinakugwanithwa megongalo osha hala okutya ngiini.
Mbela owa “hala okuninga” omukuluntugongalo? (Oshungolangelo, 15 Septemba 2014)
Tala nkene Oonzapo dhimwe dhi na uulaadhi dha li dha ningi omaiyambo, opo dhi faalele ooitaali ooyakwawo iileshomwa.
Tala nkene iilonga yetu hayi yambidhidhwa pashimaliwa momukalo gwa yooloka ko kwaangoka gwomalongelokalunga galwe.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
