1. Gandja eyooloko ndyoka li li pokati kuupika mboka wu shiwike apuhe naamboka tawu popiwa mAaroma 12:11?

UUPIKA wopaKriste owa yooloka ko thiluthilu kuupika mboka aantu oyendji haya dhiladhila. Uuna aantu taya dhiladhila kuupika shoka hashi ya momadhiladhilo gawo okuthindilwa kongudhi nonyanya, okuthiminikwa nosho wo okuungaungiwa naantu kaaku li pauyuuki. Ihe Oohapu dhaKalunga dha nwethwa mo otadhi popi kombinga yuupika mboka omuntu hi igandja nehalo ewanawa a longele Mwene gwe omunahole. Sho omuyapostoli Paulus a kumagidha Aakriste yopetameko ya “kale aapika yokulongela Jehova,” okwa li te ya ladhipike ya longe oshilonga shawo oshiyapuki molwaashoka ye hole Kalunga. (Rom. 12:11, NW) Okukala omupika gwoludhi nduka okwa kwatela mo shike? Ongiini tatu vulu okuyanda okuninga aapika yaSatana nuuyuni we? Otatu ka mona ondjambi yashike omolwiilonga yetu yuudhiginini tu li aapika yaJehova?

2. (a) Oshike sha li hashi vulu okuningitha omupika a hunuthe ompito ye yokumangululwa? (b) Oshike sha li oshindhindhilikwedhi kombinga yokuulula okutsi kwomupika ngoka e hole mwene gwe?

² Okuza mOmpango ndjoka Kalunga a li a pe Aaisraeli, otatu ilongo mo kutya Jehova okwa tegelela tu kale aapika yoludhi luni. Omupika Omuhebeli okwa li e na okumangululwa momumvo omutiheyali. (Eks. 21:2) Ongiini mbela kombinga yomupika ngoka e hole mwene gwe noonkondo noina hala okumanguluka? Jehova okwa li a tula po elongekidho ewanawa. Mwene gwe okwa li e na oku mu tula pomweelo nenge piikulo yomweelo e tu ulula okutsi kwe noniho. (Eks. 21:5, 6) Oshi li oshindhindhilikwedhi shili kutya shika osha li sha kwatela mo okutsi. MOshihebeli, oshitya shoka hashi longithwa okuulika kevuliko, osha pambathana naashoka shokuuva nenge shokupulakena. Ano omupika ngoka oha kala a hala okutsikila okuvulika kumwene gwe. Shika otashi tu kwathele tu uve ko nawa shoka sha kwatelwa mokwiiyapulila  kwetu Jehova, ano okuvulika nehalo ewanawa molwaashoka tu mu hole.

3. Oshike hashi tu inyengitha tu iyapulile Kalunga?

³ Sho twa ninginithwa, otwa adhika twa tokola nale okulongela Jehova, ano tu ninge aapika ye. Ehalo lyetu lyokuvulika kuJehova nokulonga ehalo lye olyo lya li lye tu inyengitha tu mu iyapulile. Kapu na ngoka a li e tu kondjitha tu shi ninge. Nokuli naagundjuka mboka haya ninginithwa ohaye shi ningi owala ngele yi iyapulile Jehova, ihe hamolwokunyanyudha aavali yawo. Ohole oyo hayi inyengitha Aakriste yi iyapulile Mwene gwetu gwomegulu, Jehova. Omuyapostoli Johannes okwa nyola a ti: “Ohole yokuhola Kalunga oyo okuvulika kiipango ye.” — 1 Joh. 5:3.

4. Oshike sha pumbiwa opo tu kale “aapika yiilonga iiwanawa”?

⁴ Inatu pandula tuu Jehova sho e shi ninga tashi wapa tu kale aapika ye! Eitaalo lyetu mekuliloyambo lyaKristus olye tu ningitha tu ze ko kondjoko yuulunde. Nonando inatu gwanenena, otwa zimina nehalo ewanawa okupangelwa kuJehova naJesus. Paulus okwa li e shi yelitha nawa montumwafo ye yimwe a ti: “Omu na okudhiladhila kutya omwa kwatumuka mo muulunde, ihe omu na omwenyo, mu longele Kalunga muukumwe naJesus Kristus.” Opo nduno okwa londodha a ti: “Omu shi shi nawa kutya uuna tamu igandja komuntu gwontumba, nena one aapika yaangoka tamu vulika kuye. Ngele tamu igandja okulonga uulunde, nena ehulilo olyo eso. Ihe ngele tamu vulika kuKalunga, evuliko ndyoka otali mú ningi aayuuki koshipala shaKalunga. Kalunga na hambelelwe! Nale omwa li aapika yuulunde, ihe ngashingeyi ohamu vulika nomwenyo aguhe koshili tayi zi melongo ndyoka mwe li longwa. One omwa mangululwa muulunde, mu ninge aapika yiilonga iiwanawa.” (Rom. 6:11, 16-18) Ndhindhilika kutya omuyapostoli okwa popi ‘kombinga yokuvulika nomwenyo aguhe.’ Eeno shili, eiyapulo lyetu kuJehova ohali tu ningitha tu kale “aapika yiilonga iiwanawa.”

5. Atuheni otu na ekondjo lyashike meni lyetu, nomolwashike?

⁵ Sho tatu kala metsokumwe neiyapulo lyetu, otapu ka kala omandangalati ngoka tu na okutaaguluka. Opu na iinima iyali mbyoka tatu kondjitha. Shotango, opu na uupyakadhi mboka Paulus a li ta kondjo nawo. Okwa nyola a ti: “Meni lyandje onda hokwa ompango yaKalunga. Ihe ondi wete ompango onkwawo yi li molutu lwandje tayi kondjitha ndjoka ya ziminwa komadhiladhilo gandje. Oyo oya kwata ndje, ndi kale omupika gwompango yuulunde yi li molutu lwandje.” (Rom. 7:22, 23) Natse otatu kondjo wo nokwaagwanenena hoka twa thigululula. Omolwonkalo ndjoka, otatu kondjitha aluhe omagamo getu gopanyama. Omuyapostoli Petrus okwe tu kumagidha a ti: “Kaleni mu na emanguluko, ndele emanguluko lyeni inamu li longitha okusiikila uukolokoshi, ihe kaleni ongaamati yaKalunga.” — 1 Pet. 2:16.

6, 7. Ongiini Satana ha ningitha uuyuni mbuka wu kale wa fa tawu monika nawa?

⁶ Otu na wo ekondjo etiyali lyokukondjitha uuyuni mbuka tawu nwethwa mo koompwidhuli. Satana, omupangeli gwuuyuni mbuka, ohe tu umbu iikuti ye nelalakano lyokuteya po uudhiginini wetu kuJehova naJesus. Oha kala a hala oku tu ninga aapika moku tu makela tu igandje kenwethomo lyuuyuni we mbuka wa yonuka. (Lesha Aaefeso 6:11, 12.) Omukalo gumwe Satana ha ningi ngaaka omokuningitha uuyuni we wu kale wa fa tawu monika nawa, tawu heke. Omuyapostoli Johannes okwa londodha a ti: “Ngele omu hole uuyuni, ohole yokuhola Tate kayi mo mune. Iinima ayihe mbyoka yi li muuyuni, inayi za muTate, ihe oyomuuyuni. Iinima mbika oyo uuhalu wopantu okuhola mbyoka aantu taye yi tala notaye yi itangele.” — 1 Joh. 2:15, 16.

⁷ Ehalo lyaantu lyokukala ya yambapala pamaliko olya kwata ko uuyuni. Satana oha hwahwameke aantu yi itaale kutya oshimaliwa ohashi eta enyanyu. Omahala gomalandithilo ogi indjipala. Omatseyitho giipindi ohaga humitha komeho onkalamwenyo yokukala niiniwe oyindji nosho wo omainyanyudho. Omahangano gokugandja  omakwatho giiyenditho ohaga futile aantu ya ye komahala omawanawa hoka olundji aantu haya yi naamboka ye na etaloko lyuuyuni. Eeno, apuhe aantu oye na edhiladhilo lyokuhwepopaleka aniwa oonkalamwenyo dhawo, ihe olundji oshi ikolelela komithikampango dhuuyuni.

8, 9. Opu na oshiponga shini sha kwata miiti, nomolwashike?

⁸ Sho a popi kombinga yaamboka ya li megongalo lyopaKriste lyopetameko mboka ya li ye na etaloko lyuuyuni, Petrus okwa londodha a ti: ‘Pokati komutenya ohaa nyanyukilwa okulonga shaa shoka tashi opalele uuhalu womalutu gawo. Osho esithahoni nesheko, ngele taa kala pamwe nane piililo yeni, kombinga onkwawo ohaa kala moohedhi dhawo oombwinayi. Oyo ohaa popi iitya yuuntsa noyu udha uugoya. Mboka taa kambadhala okuyanda aantu mboka ye li momapuko, ohaa yulwa nuuhalu wopalutu nonuukeeneidhiliko. Aapukithi otaye ya uvanekele emanguluko, manga yo yene ya ningwa aapika komikalo tadhi ya fala [meyonuko]. Oshoka omuntu ota ningwa omupika kukehe shoka tashi mu pangele.’ — 2 Pet. 2:13, 18, 19.

⁹ Okugwanitha po okahalu ‘kaambyoka aantu taye yi tala’ ihaku mangulula omuntu. Pehala lyaashono, oha ningi owala omupika gwamwene gwuuyuni mbuka ngoka ihaa monika, Satana Ondiapoli. (1 Joh. 5:19) Osha nika oshiponga nonkoondo okuninga omupika gwomaliko, uupika mboka wu li uudhigu okumanguluka ko kuwo.

10, 11. Oolye unene kunena ye li iihakanwa yaSatana, nongiini elongo lyomuuyuni tali vulu oku shi ya ningila oshidhigu?

¹⁰ Ngaashi a li a ningi muEden, nokunena Satana ohi isindilile po mboka inaaya pyokoka. Aagundjuka oyo unene e hole okuninga iihakanwa ye. Satana iha kala a nyanyukwa uuna omugundjuka, nenge ngaa kehe gumwe, ti iyamba a ninge omupika gwaJehova. Omutondi gwaKalunga okwa hala ayehe mboka hayi iyapulile Jehova ya kale inaaya gwanitha po eigandjo lyawo nuudhiginini wawo.

¹¹ Natu shune koshiholelwa shomupika ngoka a li a pitike okutsi kwe ku ululwe. Omupika nguka oku na okukala a li u uvu uuwehame pokathimbo; ihe uuwehame owa li wa hulu, nokukala e na endhindhiliko lyaaluhe lyuupika we. Okuhogolola ondjila ndjoka inaayi fa yoomakula otaku vulu nako okukala okudhigu, nokuli tashi vulika ku kale taku ehameke komugundjuka. Satana oha humitha komeho edhiladhilo ndyoka kutya eithano muuyuni we otali etele omuntu enyanyu, ihe Aakriste oye na okukaleka momadhiladhilo kutya osha simana okugwanitha po ompumbwe  yawo yopambepo. Jesus okwa li a longo aantu a ti: “Aanelago oomboka [“ye shi ompumbwe yawo yopambepo,” NW].” (Mat. 5:3) Aakriste mboka yi iyapulila Kalunga ohaya longo ehalo Lye, ihe halyaSatana. Ohaya nyanyukilwa ompango yaJehova, nohaya tedhatedha kuyo omutenya nuusiku. (Lesha Episalomi 1:1-3.) Ihe oompito odhindji dhelongo kunena, ihadhi gandja ethimbo lya gwana komupiya gwaJehova a tedhatedhe nokugwanithe po ompumbwe ye yopambepo.

12. Aagundjuka oyendji kunena oya taalela ehogololo lini?

¹² Mwene gwomuuyuni ota vulu okudhigupaleka onkalamwenyo yomupika Omukriste. Montumwafo ye yotango ndjoka a li a nyolele Aakorinto, Paulus okwa li a ti: “Ngele owa li omupika, sho Kalunga e ku ithana, kashi na mbudhi we. Ihe ngele ou na ompito yokumanguluka, shi ninga.” (1 Kor. 7:21) Okukala wa manguluka oku vule okukala omupika gwamwene ngoka te ku hepeke. Kunena, miilongo oyindji, osikola ohayi dhengele sigo opoomvula dhontumba. Nongele ya kondo oomvula ndhoka ohaya kala ye na emanguluko lyokuhogolola. Okutsikila elongo opo omuntu a lalakanene eithano muuyuni mbuka otaku vulu okukutha po emanguluko lye lyokulalakanena iilonga yethimbo lyu udha. — Lesha 1 Aakorinto 7:23.

13. Elongo lini tali ke etela unene aapiya yaJehova uuwanawa?

¹³ Paulus okwa li a londodha Aakriste yomuKolossa a ti: “Kotokeni ano, mwaa yulwe nando okomuntu nomalongo guunongo wopantu nomafundjaleko gaa fele. Ogo ogi ikwatelela komithigululwakalo dhaantu noga za moombepo ndhoka tadhi pangele mewangandjo, ihe ne kaleni muKristus.” (Kol. 2:8) ‘Omalongo guunongo wopantu nomafundjaleko gaa fele’ oga kwata ko okudhiladhila kwuuyuni hoka haku humithwa komeho kaalongwantu oyendji. Elongo lyopombandeelela, ndyoka ihaali kwathele aalongwa ya kale ye na ontseyo, olundji ihali kwathele naanaa aantu ya kale ye na uunongo, naashoka ohashi ya ningitha ya kale inaayi ilongekidhila oonkalo dhonkalamwenyo. Mepingathano naashono, aapiya yaJehova ohaya hogolola elongo ndyoka hali ya kwathele ya kale ye na uunongo mboka wa pumbiwa opo ya kale ye na onkalamwenyo yanathangwa yokulongela Kalunga. Ohaya tula miilonga omayele ngoka Paulus a li a pe Timoteus, ngoka taga ti: “Eeno, uukriste owo shili eliko, ihe ongele wa gwana naashoka u shi na. Onkee ano natu kale twa gwana, ngele otu na iikulya nomizalo.” (1 Tim. 6:6, 8) Pehala lyokwiimonena oodigilii nomadhina gomaithano gawo, Aakriste yashili  ohaya gandja eitulomo kokumona ‘oontumwafo dhomatumbaleko’ mokulonga yi itula mo ngaashi tashi vulika miilonga yomomapya. — Lesha 2 Aakorinto 3:1-3.

14. Shi ikolelela kAafilippi 3:8, Paulus okwa li a tala ko ngiini uuthembahenda we wokukala omupika gwokulongela Kalunga naKristus?

¹⁴ Natu taleni konkalo yomuyapostoli Paulus. Okwa li a longwa poompadhi dhomulongi gwOmpango yOshijuda, Gamaliel. Elongo ndyoka Paulus a li a mono otali vulu okuyelekwa naandyoka lyokouniveesiti kunena. Ihe mbela Paulus okwa li e li tala ko ngiini sho e li yelekanitha nuuthembahenda we wokukala omupika gwaKalunga naKristus? Okwa nyola a ti: “Iinima ayihe yilwe oyo ekanitho lyowala, ngele tandi yi yeleke nokutseya Jesus Kristus, Omuwa gwandje, shoka osho oshinima shondilo shi vule ayihe.” Opo nduno okwa gwedha ko a ti: “Omolwe onde ekelehi iinima ayihe nonde yi tala oyo iiyagaya yowala, opo ndi likole Kristus.” (Fil. 3:8) Okwiikonakona pamwe noohapu ndhoka ohaku kwathele Aakriste aagundjuka nosho wo aavali yawo aatilikalunga ya ninge etokolo lyomondjila uuna tashi ya pelongo. (Tala omathano.)

15, 16. Ehangano lyaJehova ohali gandja elongo lini, nelalakano lyalyo olyashike?

¹⁵ Mbela kiiputudhilo oyindji yelongo lyopombanda yomuuyuni mbuka oku na onkalo ya tya ngiini? Mbela kaku na oluhondelo nuunkolwe? Mbela iiputudhilo mbika ihayi humitha komeho elongo lyoevolusi? (Ef. 2:2) Mepingathano naashono, ehangano lyaJehova ohali gandja elongo lya dhenga mbanda megongalo lyopaKriste. Kehe gumwe gwomutse oku na ompito yokumona uuwanawa mOsikola yOkudheula Aauvithi oshiwike kehe. Opu na wo ootundi dha sheywa dhaamwatate aakokolindjila mboka inaaya hokana (Osikola yOmbiimbeli yOkudheula Aamwatate Inaaya Hokana) nosho wo yaaihokani aakokolindjila (Osikola yOmbiimbeli yOkudheula Aaihokani Aakriste). Elongo ndyoka lyopakalunga ohali tu kwathele tu vulike kuJehova, Mwene gwetu gwomegulu.

¹⁶ Otatu vulu okufula omaliko gondilo gopambepo mo-Watch Tower Publications Index nenge mo-Watchtower Library ndjoka yi li moka-CD-ROM. Elalakano lyelongo ndika olyo okulongela Jehova. Ohali tu longo nkene tatu vulu okukwathela yalwe ya hangane naKalunga. (2 Kor. 5:20) Ohali ya kwathele wo ya longe yalwe. — 2 Tim. 2:2.

17. Okuhogolola elongo lya dhenga mbanda ohaku etele omuntu omalaleko nuuyamba geni?

¹⁷ Meyele lyaJesus lyiimaliwa, aapika yaali aadhiginini oya li ya pandulwa noya li ya nyanyukwa pamwe namwene gwawo sho e yi inekelele iilonga yilwe oyindji. (Lesha Mateus 25:21, 23.) Okuhogolola elongo ndyoka lya dhenga mbanda kunena ohaku eta enyanyu nohaku petha omuntu ondjambi. Natu tale koshiholelwa shaMichael. Okwa li e shi enditha nawa mosikola naashoka osha li sha ningitha aalongi ye ye mu ithane ya popye naye kombinga yoompito ndhoka e na dhokuya kouniveesiti. Oya li ya kumwa sho Michael a hogolola po okersesa ofupi kosikola yuungomba ndjoka ya li ye mu ningitha a vule okwiiyambidhidha e li omukokolindjila gwondjigilile. Mbela oku uvite a fa a kanitha sha? Okwa ti: “Elongo lyopakalunga ndyoka nda mona ndi li omukokolindjila, nongashingeyi sho ndi li omukuluntugongalo, oli li oshinima itaashi vulu okuyelekwa nasha. Omalaleko nuuyamba niinakugwanithwa mbyoka ndi na oyi na ongushu yi vule piimaliwa mbyoka nda li tandi vulu okukala he mono. Onda nyanyukwa shili sho inaandi lalakanena elongo lyopombanda.”

18. Oshike she ku inyengitha wu hogolole elongo ndyoka lya dhenga mbanda?

¹⁸ Elongo lya dhenga mbanda ohali tu longo ehalo lyaKalunga nohali tu kwathele tu kale aapika yokulongela Jehova. Ohali tu pe etegameno ‘lyokumanguluka muupika weyonuko’ nokonima tu ye “memanguluko nomeadhimo lyaana yaKalunga.” (Rom. 8:21) Komeho gaayihe, ohatu ilongo omukalo gwa dhenga mbanda gwokuulika kutya otu hole shili Mwene gwetu gwomegulu, Jehova. — Eks. 21:5.