Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Kotoba 2013

Eshito otali holola puuyelele Kalunga omunamwenyo

Eshito otali holola puuyelele Kalunga omunamwenyo

“Omuwa, Kalunga ketu! Owa gwana okusimanekwa omolweadhimo, . . . oshoka ongoye wa shiti iinima ayihe.” — EH. 4:11.

1. Oshike tu na okuninga opo tu shilipaleke kutya eitaalo lyetu otali kala lya kola aluhe?

AANTU oyendji ohaya ti kutya oyi itaala owala iinima mbyoka haya mono. Ongiini tatu vulu okukwathela oohandimwe mboka ya kale ye na eitaalo muJehova? Nokuli Ombiimbeli otayi ti kutya ‘kaku na omuntu a mona Kalunga nando olumwe.’ (Joh. 1:18) Molwaashoka ihatu mu mono, ongiini nduno tatu vulu okushilipaleka kutya otatu kala neitaalo lya kola muJehova ‘Kalunga ngoka ihaa monika’? (Kol. 1:15) Oshinima shotango shoka tu na okuninga okundhindhilika mo omalongo ngoka hage shi ningitha oshidhigu tu uve ko oshili kombinga yaJehova. Opo nduno tatu longitha Ombiimbeli nuunkulungu tu hanagule po omadhiladhilo agehe ngoka taga “inenepekele okutseya Kalunga.” — 2 Kor. 10:4, 5.

2, 3. Omalongo gaali geni ngoka ga posipaleka aantu kaaya tseye oshili kombinga yaKalunga?

2 Elongo limwe li li apuhe ndyoka lya posipaleka aantu opo kaaya tseye oshili kombinga yaKalunga olyo elongo lyoevolusi. Elongo ndika lyopantu itali tsu kumwe nOmbiimbeli nohali ningitha aantu kaaya kale ye na etegameno. Elongo ndika ohali tsu omuthindo kutya onkalamwenyo oye ya po ohaluka nokungawo ohali gandja edhiladhilo kutya aantu kaye na elalakano lyasha monkalamwenyo.

3 Oshikwawo, aantu yomomalongelokalunga giifundja gopaKriste ohaya longo kutya uuyuni awuhe, mwa kwatelwa evi naashihe shoka shi li ko shi na omwenyo, oya kala ko owala oomvula omayuvi oonshona. Mboka haya longo aantu elongo ndika, otashi vulika ya kale ya simaneka Ombiimbeli noonkondo, ihe ohaya kondjitha kutya Kalunga okwa shiti iinima ayihe momasiku gahamano go genegene, oomvula owala omayuvi oonshona dha ka pita. Ohaya tindi uunzapo woshili wopaunongononi mboka itaawu tsu kumwe netaloko lyawo. Nomolwoshinima shoka, elongo ndika lyiifundja kombinga yeshito ohali ningitha Ombiimbeli yi kale tayi monika ya fa inaayi simana noya fa kaayi li mondjila. Oohandimwe mboka ye na etaloko lya tya ngaaka otashi vulika ye tu dhimbulukithe aantu yamwe yomethelemumvo lyotango mboka ya li ye  na ehwamo lyokulongela Kalunga ihe “kaye na uunongo oku shi ninga lela.” (Rom. 10:2) Ongiini tatu vulu okulongitha Oohapu dhaKalunga tu hanagule po “omapopilongulu omanene” goevolusi nosho wo gelongo ndyoka lyiifundja kombinga yeshito? * Otatu vulu owala oku shi ninga ngele twa longo nuudhiginini paumwene tu mone ontseyo yashili kombinga yaashoka Ombiimbeli tayi longo.

EITAALO OHALI KALA LYA KANKAMENA KUUNZAPO NOKOKUDHILADHILA KWOPANDUNGE

4. Eitaalo lyetu oli na okukala li ikolelela kushike?

4 Ombiimbeli otayi tu lombwele tu pungule uunongo. (Omayel. 10:14) Jehova okwa hala tu kale neitaalo muye lya kankamena kuunzapo nosho wo kokudhiladhila kwopandunge, ihe hakomadhiladhilo gopantu nenge komithigululwakalo dhomalongelokalunga. (Lesha Aahebeli 11:1.) Opo tu kale tu na eitaalo lya kola muKalunga, otu na tango okukala twa tompwa kutya Jehova oko e li. (Lesha Aahebeli 11:6.) Otatu ka thika pehulithodhiladhilo ndyoka, hamolwaashoka owala twa hala okukala twi itaala moshinima shontumba, ihe omokukonakona uushili mboka kutya oko e li nomokulongitha ‘oonkondo dhetu dhokudhiladhila.’ — Rom. 12:1NW.

5. Etompelo limwe lini tu na lyokukala twa tompwa kutya Kalunga oko e li?

5 Omuyapostoli Paulus okwa gandja etompelo limwe kutya omolwashike tatu vulu okukala twa tompwa kutya Kalunga oko e li, nonando ihatu mu mono. Paulus okwa nyola kombinga yaJehova a ti: “Okuza Kalunga sho a shiti uuyuni, nando oye iha monika, okwa holola puuyelele oonkondo dhe dhaaluhe nuukalunga we.” (Rom. 1:20) Ongiini to vulu okukwathela omuntu ngoka a limbililwa kutya Kalunga oko e li opo a mone kutya oohapu ndhoka dhomuyapostoli Paulus dha nwethwa mo odhoshili? Oto vulu okutala kuunzapo wumwe tawu landula womeshito mboka tawu holola oonkondo nuunongo wOmushiti gwetu.

OONKONDO DHAKALUNGA ODHI IWETIKILE MESHITO

6, 7. Oonkondo dhaJehova odhi iwetikile ngiini miinima iyali mbyoka hayi tu gamene?

6 Oonkondo dhaJehova odhi iwetikile miinima iyali mbyoka hayi tu gamene. Iinima mbyoka oyo ewangandjombepo lyevi nosho wo oonkondo lyadho dhomangeneta. Pashiholelwa, ewangandjombepo ohali longo oshindji shi vulithe owala oku tu pa ombepo ndjoka hatu fudhile mo. Ohali tu gamene wo kiipambu oyindji yomamanya mbyoka hayi gu mewangandjo. Omapambu gomamanya ngoka taga vulu okuyonagula noonkondo evi ohaga pi po sho owala taga thiki mewangandjombepo lyetu, shoka hashi ningitha kegulu ku monike oompola oombwanawa dhuuyelele uusiku.

7 Oonkondo dhomangeneta gevi ohadhi tu gamene wo kaatu ehamekwe kiinima yomewangandjo. Oonkondo dhomangeneta ngoka ohadhi zi mevi muule. Ondingandinga yevi, ndjoka ya ningwa unene membombo lyoshiyela ndyoka hali zi oonkondo dhomangeneta ndhoka dhe tu kundukidha nodha ya sigo omeyalelo. Oonkondo ndhika dhomangeneta ohadhi tu gamene koonte dhetango ndhoka dha nika oshiponga nosho wo komitopo ndhoka hadhi topa moshitopolwa shetango. Otatu pandula omangeneta ngoka gevi, molwaashoka ihaga etha oontetango ndhika dhi fike po iinima ayihe mbyoka yi na omwenyo kombanda yevi. Pehala lyaashono, ohadhi dhi nina po noku dhi keelela kaadhi thike ko kevi. Oonkondo ndhoka ohadhi imonikila nkene tadhi longo kuuyelele wu li momalwaala mboka hawu kala kewangandjo uusiku popepi nOpoole yokUumbangalantu noyokUumbugantu. Nokaapu na omalimbililo, Jehova oku na ‘oonkondo oonenenene.’ — Lesha Jesaja 40:26.

UUNONGO WAKALUNGA OWA HOLOLWA MESHITO

8, 9. Uunongo waJehova owa hololwa ngiini medhingoloko ndyoka hali kaleke po omwenyo kombanda yevi?

8 Uunongo waJehova owi iwetikile momikalo ndhoka hadhi kaleke po omwenyo kombanda yevi. Natu shi thaneke: Natu tye nduno oho zi moshilando shu udha aantu ndo nosha dhingililwa  kekuma moka ihaamu vulu okuza ondoya nenge ihaamu vulu okuya omeya ga yela. Oshilando shoka otashi ka kaka nziya noita mu ka vula okukaliwa. Moonkalo dhimwe, evi lyetu nalyo olya fa oshilando shoka sha dhingililwa kekuma. Oli na omeya ga yela ga ngambekwa noihatu vulu naanaa okweekelahi ondoya meyalelo. Ihe nonando ongawo, oshilando shika sha fa sha kundukidhwa kekuma ohashi vulu okwaambidhidha iishitwa omabiliyona, okuza epipi nepipi. Omolwashike? Omolwaashoka ohashi vulu okulundulula iinima mbyoka ya pumbiwa okukaleka po omwenyo.

9 Natu tale kutya ombepo yohapi ohayi ya po ngiini. Iinamwenyo omabiliyona ohayi fudhile mo ombepo yohapi (oxygen) nohayi fudha mo ombepo yo-carbon dioxide. Nonando ongawo, ombepo ndjoka hatu fudhile mo ihayi pu po, nosho wo kutya ewangandjo ihali udha ombepo ndjoka ya talika ko yondoya ndjoka hatu fudha mo yo-carbon dioxide. Omolwashike mbela? Eyamukulo otali adhika momukalo gumwe omukumithi hagu ithanwa fotosintese. Iimeno ohayi longitha o-carbon dioxide, omeya, oonte dhetango, niitungithi e tayi eta po okabonohidrate nosho wo ombepo yohapi. Tse tatu mana ko nduno edhingoloko ndyoka sho tatu fudhile mo nduno ombepo yohapi. Paulelalela, Jehova oha longitha iimeno mbyoka a shita a pe “aantu ayehe omwenyo nomufudho.” (Iil. 17:25) Mboka kawu shi tuu uunongo wa dhenga mbanda!

10, 11. Oludhi lumwe lwokambilimbili ohalu holola ngiini uunongo waJehova nosho wo iita yalukunku?

10 Uunkulungu waJehova otawu hololwa wo miishitwa oyindji mbyoka yi li kopulaneta yetu ombwanawa. Otaku tengenekwa kutya kombanda yevi oku na omaludhi giishitwa ya yoolokathana okuza poomiliyona 2 sigo opoomiliyona 100. (Lesha Episalomi 104:24.) Ndhindhilika owala uunongo mboka tawu monika momukalo moka iishitwa yimwe mbika ya shitwa.

Uunongo waKalunga owi iwetikile munkene a shita omeho gaiita yalukunku; ethano otali ulike eho lye lya nenepekwa (Tala okatendo 11)

11 Pashiholelwa, opu na oludhi lwokambilimbili kamwe hoka ke na uuluyi wu thike pondungu yopena yohinga. Ihe, ohaka vulu noke na owino yokutuka uule wookilometa tadhi ihilile po 3 000 okuza moKanada sigo okomuthitu gumwe gu li moMeksiko, taka longitha etango lyi ka wilike. Okambilimbili hoka ohaka tuka ngiini uuna etango lye ya pokati kegulu? Jehova okwa shita uuluyi wako uushuushuuka momukalo moka hawu vulu oku ka kwathela ka tuke ku ukilila nonando etango oli inyenge. Nenge dhiladhila komeho giita yalukunku. Okanamwenyo haka oke na omeho gaali omanene. Eho kehe oli na oolense dhi li 30 000. Nonando ongawo, uuluyi uushona wiita yalukunku ohawu vulu okulesha uuyelele mboka hawu zi koolense ndhoka hadhi vulu okumona einyengo kehe eshuushuuka momudhingoloko gwe.

12, 13. Oshike tashi ku kumitha kombinga yankene Jehova a tholoma oosele ndhoka dha tunga po olutu lwoye?

12 Nokuli shimwe ishewe oshikumithi omukalo moka Jehova a shita oosele ndhoka dhi li miinima ayihe mbyoka yi na omwenyo. Pashiholelwa, olutu lwoye olwa thikama po moosele dhi li ootililiyona 100 lwaampo. Mosele kehe omu na okatopolwa okashuushuuka ka fa ongodhi haki ithanwa DNA. Ohawu pungula konyala uuyelele awuhe mboka wa pumbiwa okutunga po olutu lwoye aluhe.

 13 O-DNA oyi na uuyelele wu thike peni? Natu yelekanithe uuyelele mboka hawu pungulwa mograma yimwe yo-DNA naamboka hawu pungulwa moka-CD. Oka-CD ohaka vulu okupungula uuyelele awuhe mboka wu li membwiitya, shoka oshikumithi molwaashoka oka-CD okanima owala ka fuleta kokapulasitika. Ihe, ograma yimwe yo-DNA ohayi vulu okupungula uuyelele owundji wu thike puu-CD otiliyona yimwe. Opo tu shi yelithe momukalo gulwe, okasindo kamwe okashona ko-DNA ya kukutikwa otaka vulu okupungula uuyelele wa gwana okutunga po aantu ye li ootililiyona 2,5 lwaampo!

14. Uuyelele mboka wa monika kaanongononi otawu ku ningitha wu kale wu uvitile ngiini Jehova?

14 Omukwaniilwa David okwa li a popi kombinga yuuyelele mboka wa pumbiwa opo pu tungwe olutu lwomuntu wa fa wa nyolwa membo lyopathaneko. Sho a popi kombinga yaJehova, okwa ti: “Owa mono ndje, manga inaandi valwa. Omasiku nde ga uthilwa, agehe oga nyolelwa membo lyoye, manga inaaga thika.” (Eps. 139:16) Oshi shi okuuviwa ko kutya omolwashike David a li a tanga Jehova sho a dhiladhila kombinga yankene olutu lwe lwa shitwa. Uuyelele mboka wa monika kaanongononi moomvula opo dha piti owa gwedha ko owala konkumwe ndjoka hatu kala tu na uuna tatu dhiladhila kombinga yankene Jehova e tu shita. Uuyelele mbuka otawu tu ningitha tu tse kumwe nomupisalomi ngoka a nyola kombinga yaJehova a ti: “Otandi ku hambelele e tandi ku simaneke, oshoka onda shitwa nuunkulungu. Iilonga yoye iikumithi; shika ondi shi shi nawa.” (Eps. 139:14) Dhoshili, ongiini aantu kaaye wete kutya eshito otali holola puuyelele Kalunga omunamwenyo?

KWATHELA YALWE YA SIMANEKE KALUNGA OMUNAMWENYO

15, 16. (a) Iileshomwa yetu oye tu kwathela ngiini tu kale tu na olupandu lwoonkondo dhaJehova dhokushita? (b) Oshini shomiitopolwa mbyoka hayi holoka mo-Awake! yi na oshipalanyolo “Was It Designed?” wa li wa hokwa unene?

15 Muule woomvula omilongo odhindji, oshifo sho-Awake! osha kala nokukwathela aantu omamiliyona ya kale ye na olupandu lwaashoka tashi hololwa meshito kombinga yaKalunga ketu omunamwenyo. Pashiholelwa, mo 2006 oshifo shaSeptemba osha li shi na oshipalanyolo tashi ti: “Is There a Creator?” Oshifo shika osha li sha longekidhwa unene tuu nelalakano lyokutsikulula omeho gaamboka ya posipalekwa kelongo lyoevolusi nokomalongo galwe giifundja. Omumwameme gumwe okwa li a nyolele koshitayimbelewa moAmerika kombinga yoshifo shoka a ti: “Oshikonga shokugandja oshifo shika shi ikalekelwa oshe enda nawa lela. Omukulukadhi gumwe okwa li a pula iifo yi li 20. Oha longo o-Biology nokwa li a hala aalongwa ye ya mone oshifo shoka.” Omumwatate gumwe okwa nyola a ti: “Onda kala ndi ipyakidhila niilonga yomomapya okuza mo 1940 nasha nondi li pokugwanitha oomvula 75, ihe inandi nyanyukilwa nando nale uukalele wandje ngaashi nde wu nyanyukilwa omwedhi nguka gwokugandja oshifo shika shi ikalekelwa sho-Awake!”

16 Moomvula opo dha piti, iifo oyindji yo-Awake! oya kala yi na oshitopolwa shi na oshipalanyolo “Was It Designed?” Iitopolwa mbika iifupi oya kala nokukundathana kombinga yuuindjiniya mboka tawu kumitha wi iwetikile meshito nokundhindhilika mo omikalo moka aantu ya kala taya kambadhala okuholela Omunduluki Omunene. Mo 2010 otwa li twa mono ishewe okabroshure Was Life Created? ka kwathele aantu ya simaneke Kalunga. Omathano omawanawa ngoka ge li moshileshomwa shoka nuumpungu oya longekidhwa yi tu inyengithe tu kale tu na olupandu lwuunkulungu waJehova. Omapulo ngoka ge li pehulilo lyoshitopolwa kehe oge li le po okukwathela omuleshi a dhiladhile kuuyelele mboka opo owala a lesha. Mbela owa li wa tyapula okulongitha okabroshure haka sho to longo egumbo negumbo, montaneho nenge sho to gandja uunzapo wontukuluka?

17, 18. (a) Aavali, ongiini tamu vulu okukwathela aanona yeni ya kale ye na omukumo opo ya popile eitaalo lyawo? (b) Uubroshure mboka tawu popi kombinga yeshito omwe wu longitha ngiini melongelokalunga lyeni lyuukwanegumbo?

17 Aavali, mbela omwa konakona ngaa okabroshure haka naanona yeni pelongelokalunga lyeni lyuukwanegumbo? Ngele omwe shi ningi, otamu ke ya kwathela ya kale ye na olupandu lwaKalunga ketu omunamwenyo. Otashi vulika mu na aanona  yoomvula omulongo nasha mboka ye li mosikola yopombanda. Aanona mboka oyo unene ye li iihakanwa kwaamboka haya longo elongo ndyoka lyiifundja lyoevolusi. Aanongononi, aalongisikola, mboka haya popi kombinga yeshito niinima mbyoka hayi ulikwa ko-TV nomoomuvi, ohayi humitha komeho edhiladhilo ndyoka kutya oevolusi oshinima shoshili. Oto vulu okulongitha natango okabroshure The Origin of Life — Five Questions Worth Asking, hoka kali ka piti mo 2010, wu kwathele omumwoye gwoomvula omulongo nasha a yaneke pomutenya omalongo ngoka giifundja. Ngaashi okabroshure Was Life Created?, oshileshomwa shika otashi ladhipike aagundjuka ya kale ye na “owino.” (Omayel. 2:10, 11) Otashi ya longo nkene ye na okukonakona uushili waashoka taya longwa mosikola.

Aavali, longekidheni aanona yeni ya popile eitaalo lyawo (Tala okatendo 17)

18 Okabroshure Origin of Life oka longekidhwa nelalakano lyokukwathela aalongwa ya konakone omahokololo ngoka haga popi kutya aanongononi oya mona po iinima yimwe mbyoka tayi popile elongo lyoevolusi. Otake ya ladhipike ya tokole yo yene ngele aantu oya za ngaa shili koondjima. Otake ya longo wo nkene ye na okuyamukula mboka haya popi kutya aanongononi oya konakona moolabora dhawo noya mona kutya omwenyo ogwe ya po owala ohaluka. Aavali, ngele omwa longitha okabroshure haka, otamu ka kwathela aanona yeni ya kale ye na omukumo lela okuyamukula mboka taye ya pula kutya omolwashike yi itaala mOmushiti. — Lesha 1 Petrus 3:15.

19. Atuheni otu neni uuthembahenda washike?

19 Iileshomwa mbyoka yi na uuyelele wa konakonwa nawa mbyoka hatu mono okupitila mehangano lyaJehova ohayi tu kwathele tu mone uukwatya we uuwanawa meshito. Uuyelele awuhe mboka otawu tu inyengitha tu hambelele Kalunga ketu. (Eps. 19:1, 2) Jehova, Omushiti gwiinima ayihe, okwa gwana okuhambelelwa nokusimanekwa. Kashi shi tuu uuthembahenda kutse oku mu pa esimano noku mu pandula! — 1 Tim. 1:17.

^ okat. 3 Opo wu mone uuyelele wa gwedhwa po wankene to vulu okutompathana nomuntu ngoka i itaala elongo ndyoka lyiifundja kombinga yeshito, tala pepandja 24 sigo 28 lyokabroshure Was Life Created?

Tseya oshindji

Omalongo gashili gOmbiimbeli ogeni naanaa?

Oshili kombinga yaKalunga oyini?

Mbela sho to dhiladhila Kalunga oku na ko ngaa nasha nangoye? Ilonga kombinga yomaukwatya ge nankene to vulu okuhedha popepi naye.